ខេត្តកណ្តាល៖ បុរសម្នាក់ជាជាងឆ្លាក់រូបព្រះ ត្រូវបានមិត្តរួមការងារប្រទះឃើញដេកស្លាប់នៅលើគ្រែ ក្នុងកុដិវត្តពោធិ៍អណ្តែត ស្ថិតក្នុងភូមិពោធិ៍កណ្តាល ឃុំត្រើយស្លា ស្រុកស្អាង បង្កឲ្យមានការភ្ញាក់ផ្អើលនៅវេលាម៉ោង៥ និង១០នាទី ថ្ងៃទី០២ ខែវិច្ឆិកា ឆ្នាំ២០១៥ ។
នាយប៉ុស្តិ៍នគរបាលរដ្ឋបាលត្រើយស្លាលោកអនុសេនីយ៍ទោ ពុយ ទ្រី បានឲ្យដឹងថា ជនរងគ្រោះឈ្មោះ អ៊ុន វណ្ណា ភេទប្រុស អាយុ២៧ឆ្នាំ មុខរបរ ជាជាងចម្លាក់ មានទីលំនៅក្នុងភូមិមណ្ឌល១៥ សង្កាត់ផ្សាដើមគ ខណ្ឌទួលគោក រាជធានីភ្នំពេញ ។
លោកអនុសេនីយ៍ទោ ពុយ ទ្រី បានបន្តថា អស់រយៈពេលប្រមាណ៦ខែកន្លងមកហើយជនរងគ្រោះបានមកស្នាក់នៅក្នុងវត្តពោធិ៍អណ្តែត ដើម្បីស៊ីឈ្នួលឆ្លាក់រូបព្រះ ។ នៅពេលកើតហេតុវេលាម៉ោងប្រមាណ៨ និង១៥នាទីយប់ ថ្ងៃទី០១ ខែវិច្ឆិកា ឆ្នាំ២០១៥ ជនរងគ្រោះបានទិញស្រាសចំនួនមួយលីត្រយកមកផឹកជាមួយឈ្មោះ អឿ សុភ័ក្រ ភេទប្រុស អាយុ ២៥ឆ្នាំ ដែលត្រូវជាមិត្តភ័ក្ររួមការងារនិងគ្នា ។ បន្ទាប់ពីផឹកស្រាអស់ចំនួនមួយលីត្រហើយនោះជនរងគ្រោះ និងមិត្តភ័ក្របានឡើងទៅដេកក្នុងកុដិរៀងៗខ្លួន ។
លុះដល់វេលាព្រឹកព្រលឹមថ្ងៃទី២ ខែវិច្ឆិកា ឆ្នាំ២០១៥ មិនឃើញជនរងគ្រោះឈ្មោះ អ៊ុន វណ្ណា ក្រោកពីដេកដូចសព្វមួយដង ទើបឈ្មោះ អឿ សុភ័ក្រ ឡើងទៅដាស់ជនរងគ្រោះឲ្យក្រោក ។ ពេលទៅដល់លូកដៃអង្រន់ជើងជនរងគ្រោះមានសភាពរឹងទើបដឹងថា ជនរងគ្រោះបានស្លាប់បាត់បង់ជីវិតបាត់ទៅហើយ ក៏ប្រញាប់ប្រញាលរាយការណ៍ប្រាប់អាជ្ញាធរ និងសមត្ថកិច្ចនករបាលមូលដ្ឋាន ។
សមត្ថកិច្ចនគរបាលជំនាញបច្ចេកទេស និង វិទ្យសាស្ត្រស្រុកស្អាងបានដាក់ការសន្និដ្ឋានថា ជនរងគ្រោះស្លាប់ដោយសារខ្យល់គ មិនមានជាប់ពាក់ព័ន្ធទៅនឹងករណីអ្វីផ្សេងឡើយ ។ ក្រោយពីពីនិត្យចប់សព្វគ្រប់សាកសពជនរងគ្រោះត្រូវបានសមត្ថកិច្ចនគរបាលទំនាក់ទំនងប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ដោយ៖ ស្អាងជ័យ
