កាលពីថ្ងៃទី២ ខែវិច្ឆិកា ឆ្នាំ២០១៥ មន្ត្រីក្រសួងការពារជាតិអាមេរិកបានថ្លែងថា កម្លាំងទាហានជើងទឹកអាមេរិកមានគម្រោងល្បាត់បន្ថែមទៀតក្នុងចម្ងាយប្រមាណ១២ម៉ៃ (ចម្ងាយវាស់តាមផ្លូវនាវាចរ) ពីប្រជុំកោះសិប្បនិមិត្តភាគខាងត្បូងសមុទ្រចិន ។ ការល្បាតនេះស្របទៅតាមច្បាប់អន្តរជាតិ ក្នុងទំហំប្រមាណ២ភាគបួននៃតំបន់ទាំងមូលរបស់ចិន និងប្រទេសជិតខាង ។
ថ្លែងក្នុងលក្ខខណ្ឌមិនបញ្ចេញឈ្មោះ មន្ត្រីដដែលនោះបានបញ្ជាក់ថា យើងមានគម្រោងល្បាតបន្ថែមទៀតក្នុងទំហំ២ភាគ៤ ឬច្រើនជាងនេះ ។ ប្រភពបន្តថានោះជាសិទ្ធិ របស់យើងនៅក្នុងការល្បាត ដែលត្រូវអនុវត្តឡើងទៅតាមច្បាប់អន្តរជាតិ ហើយក៏ជាការរំលឹកផងដែរឲ្យចិន និងបណ្តាប្រទេសដទៃទៀតបានដឹងអំពីកាត្វកិច្ចនេះ ។
កាលពីថ្ងៃទី២ ខែវិច្ឆិកា ទីប្រឹក្សាឧបការីរងទទួលបន្ទុកសន្តិសុខជាតិអាមេរិក Ben Rhodes បានថ្លែងថា នឹងមានការល្បាតបន្ថែមទៀតរបស់កងកម្លាំងទាហានអាមេរិកដើម្បីធានាដល់ការធ្វើនាវាចរទទួលបានសន្តិសុខនិងសុវត្ថិភាពនៅក្នុងតំបន់ ។
កាលពីសប្តាហ៍មុននេះ អាមេរិកបានបញ្ជូននាវាចម្បាំងបំពាក់ដោយកាំជ្រួចមីស៊ីលនាំផ្លូវមួយគ្រឿងធ្វើដំណើរទៅកៀកដែនកោះសិប្បនិមិត្តដែលបង្កើតឡើងដោយប្រទេសចិន ស្ថិតនៅតំបន់សមុទ្រចិនខាងត្បូង ។
នាយទាហានជាន់ខ្ពស់របស់កម្លាំងទាហានជើងទឹកចិន នៅពេលភ្លាមៗនោះផងដែរបានប្រាប់ទៅកាន់កងកម្លាំងទាហានល្បាតរបស់អាមេរិកនោះថា ឧប្បត្តិហេតុតិចតួចអាចនឹងកើតមាន ហើយអាចក្លាយទៅជាសង្គ្រាមផ្ទុះឡើងផងដែរនៅតំបន់សមុទ្រចិនភាគខាងត្បូងនេះ ប្រសិនបើអាមេរិកមិនបញ្ឈប់អាកប្បកិរិយាបង្ករឿង នៅច្រកសមុទ្រដែលកំពុងមានជម្លោះនេះ ។
នាវាចម្បាំងអាមេរិក USS Lassen ដែលជានាវាចម្បាំងធុនទំនើបបំផុតរបស់អាមេរិកបាននិងកំពុងបោះយុថ្កា ក៏ដូចជាការល្បាតផងដែរនៅលើផ្ទៃទឹកចម្ងាយប្រមាណ១២ម៉ៃ(វាស់តាមផ្លូវនាវាចរ)ប៉ុណ្ណោះពីកោះសិប្បនិមិត្តដែលសាងសង់ឡើងដោយប្រទេសចិននៅប្រជុំកោះស្ព្រាតលី ។
ចិនបានទាមទារស្ទើរតែទាំងស្រុងថា តំបន់សមុទ្រភាគខាងត្បូងចិននោះស្ថិតនៅក្នុងដែនអធិបតេយ្យរបស់ខ្លួន។ ទីតាំងនេះជាច្រកសមុទ្រយ៉ាងសំខាន់ដែលក្នុងមួយឆ្នាំៗមានការចរាចរណ៍ទំនិញឆ្លងកាត់ចេញ ចូលទៅកាន់ពិភពលោកមានតម្លៃប្រមាណ៥ពាន់ពាន់លានដុល្លារអាមេរិក ។ ប្រទេសវៀតណាម ម៉ាឡេស៊ី ប្រ៊ុយណេ ហ្វីលីពីន និងតៃវ៉ាន់ ប្រទេសទាំងនេះសុទ្ធតែជាប្រទេសគូជម្លោះជាមួយប្រទេសចិនទាក់ទងដែនសមុទ្រចិនភាគខាងត្បូងនោះផងដែរ ។
លោក Ben Rhodes បានថ្លែងថា ជម្លោះសមុទ្រចិនខាងត្បូងនេះមានតែដោះស្រាយតាមរយៈផ្លូវការទូតប៉ុណ្ណោះ ។ រដ្ឋមន្ត្រីក្រសួងការពារជាតិអាមេរិក លោក Ash Carter នៅពេលខាងមុខនេះនឹងមានដំណើរទស្សនកិច្ចមកកាន់តំបន់អាស៊ីដើម្បីពិនិត្យមើលសភាពការណ៍ផងដែរ ៕
ប្រែសម្រួល៖ ថាច់ យ៉ាត
