ខេត្ដកំពង់ធំ៖ ក្រុមអ្នកសារព័ត៌មាន និងបុគ្គលិកអង្គការសង្គមស៊ីវិល១១នាក់ ត្រូវបានកម្លាំងសមត្ថកិច្ចនគរបាលខេត្ដកំពង់ធំឃាត់ខ្លួនពីបទជំរិតទារប្រាក់ពី ប្រជាកសិករដែលដឹកជញ្ជូនផលិតផល ព្រៃឈើ តាមគោយន្ដកន្ដ្រៃ , រ៉ឺម៉ក, រទេះ គោ-ក្របី ដែលនៅតាមដងផ្លូវត្រង់ ចំណុចភូមិប្រហ៊ូត ឃុំផាន់ញើម ស្រុក ប្រាសាទបល្ល័ង្ក ខេត្ដកំពង់ធំ ។
ការឃាត់ខ្លួនមនុស្សទាំង១១នាក់នេះ ធ្វើឡើងកាលពិវេលាម៉ោង៤រសៀល ថ្ងៃទី១ ខែវិច្ឆិកា ឆ្នាំ២០១៥ ដោយយោង តាមបណ្ដឹងរបស់ប្រជាពលរដ្ឋចំនួន១៥នាក់ ដោយហេតុផលថា ក្រុមអ្នកសារ ព័ត៌មាននិងបុគ្គលិកអង្គការសង្គមស៊ីវិលទាំងនេះបានជំរិតទារប្រាក់ពីពួកគេ ។
មនុស្សដែលត្រូវឃាត់ខ្លួនទាំង១១នាក់នោះរួមមានឈ្មោះ សែម សម្បត្ដិ , សឿង សេង, ប៉ូវ ប្រុស , ឃុត ឌីណា , ថែង ផល, រដ្ឋ ថា, ថេង ប៊ុនលាង , លន់ ម៉ៅ, តឹក សុជាតិ, ហូរ ហឿន , លេខ វុទ្ធី ជាអ្នក អ្នកសារព័ត៌មានរបស់កាសែតជ័យ ជម្នះ៧មករា និងអង្គការការពារបរិស្ថាន អង្គការអភិរក្សព្រៃឈើដែលពួកគាត់រស់នៅក្នុងស្រុកសន្ទុក និងស្រុកបារាយណ៍ ស្រុកប្រាសាទសំបូរ ស្រុកប្រាសាទបល្ល័ង្ក ខេត្ដកំពង់ធំក្នុងនោះមានវត្ថុតាងម៉ូតូ ចំនួន៨គ្រឿងថែមទៀតផង ។
ទាក់ទិននឹងករណីនេះ ប្រជាពលរដ្ឋ ដែលរស់នៅក្នុងមូលដ្ឋានខាងលើបាន លើកឡើងពីហេតុផលផ្ទុយលើការឃាត់ខ្លួនមនុស្សទាំង១១នាក់នេះថា ជាហេតុ ផលនៃទំនាស់ផលប្រយោជន៍ គ្រាដែល មនុស្សទាំង១១នាក់នោះតែងរំខានរុកកួនដល់ការរកស៊ីកាប់ព្រៃដឹកឈើ ដែលជា ទង្វើល្មើសច្បាប់របស់ពួកគេ ។ ពួកគាត់ ថា ក្រុមសមត្ថកិច្ចទាំងនោះតែងត្រូវរ៉ូវ និងទទួលលាភសក្ការៈពីឈ្មួញទុច្ចរិត ដើម្បីកាប់ឈើចាប់សត្វព្រៃតាមតែទំនើងចិត្ដរបស់ខ្លួន ។ ដោយមើលឃើញពីទង្វើ ខុសច្បាប់ក្រុមមនុស្សទាំង១១នាក់ ដែលមានអ្នកខ្លះជាបុគ្គលិរបស់អង្គការអភិរក្សព្រៃឈើ ខ្លះជាអ្នកសារព័ត៌មាន និងខ្លះជាអ្នកឃ្លាំមើលសិទ្ធិមនុស្សតែង តែហាមឃាត់និងផ្សព្វផ្សាយពីសកម្ម ភាពរបស់ពួកក្រុមជនល្មើសទាំងនោះ ទើបធ្វើឱ្យពួកគេក្ដៅក្រហាយចាប់ខ្លួន បែបនេះ ។
ប្រជាពលរដ្ឋបានបន្ដទៀតថា ទង្វើ បែបនេះសឹងតែក្លាយជាវប្បធម៌របស់ សមត្ថកិច្ចខេត្ដកំពង់ធំទៅហើយ ដែល តែងតែចាប់យកក្រុមអ្នកអភិរក្សព្រៃ ឈើ និងអ្នកសារព័ត៌មានធ្វើជាចំណាប់ ខ្មាំង ដើម្បីជាខែលការពារទង្វើរបស់ខ្លួន ដោយចោទប្រកាន់ថា ជាអ្នកឃុបឃិត នឹងក្រុមឈ្មួញកាប់ឈើខុសច្បាប់ គឺអ្នក អភិរក្សព្រៃឈើនិងអ្នកសារព័ត៌មាន ទាំងនោះ ។
ដោយឡែកលោកវរសេនីយ៍ទោ ជា ពឿន ប្រធានការិយាល័យកណ្ដាលនគរ បាលព្រហ្មទណ្ឌនៃស្នងការដ្ឋាននគរបាលខេត្ដកំពង់ធំបានឱ្យដឹងថា ការឃាត់ខ្លួន មនុស្សទាំង១១នាក់នោះ គឺដោយយោង តាមពាក្យបណ្ដឹងរបស់ប្រជាពលរដ្ឋដែល ដឹកកសិផលតាមគោយន្ដ និងរទេះថា ក្រុមមនុស្សទាំងនេះតែងជរិតទារប្រាក់ ពួកគាត់ ។ ម្យ៉ាងទៀតគាត់ធ្វើក៏គោរព តាមបញ្ជារបស់លោកអភិបាលខេត្ដ និង លោកព្រះរាជអាជ្ញាអមសាលាដំបូងខេត្ដដែរពុំមែនគាត់ធ្វើដោយអត្ដនោម័ត នោះទេ ។
ទោះជាយ៉ាងណាប្រជាពលរដ្ឋក៏បានបង្ហាញពីជំហរគាំទ្រដល់សកម្មភាពទប់ស្កាត់បទល្មើសរបស់ក្រុមសមត្ថកិច្ច តែ យ៉ាងណាពួកគាត់បានសំណូមពរថា សូម សមត្ថកិច្ចមេត្ដារកឱ្យឃើញនូវភស្ដុតាងជាក់លាក់ដើម្បីជួយរកយុត្ដិធម៌ឱ្យជន រងគ្រោះពិតប្រាកដ ហើយប្រសិនបើ មនុស្សទាំង១១នាក់ពិតជាបានធ្វើដូច ការចោទប្រកាន់ពិតមែនក៏សូមឱ្យអាជ្ញាធរមានសមត្ថកិច្ចដាក់ទោសទៅតាម ច្បាប់ និងក៏សូមឱ្យចាប់មនុស្សផ្សេង ទៀតដែលល្មើសច្បាប់ផង ចៀសវាង ការចោទប្រកាន់ថា ការចាប់ឃុំខ្លួន ចំពោះតែមនុស្សណាដែលជាឆ្អឹងទទឹងក បង្កបញ្ហាបំបាត់លាភសក្ការៈរបស់ខ្លួន នោះ ៕
ដោយ៖ ប៊ុន រិទ្ធី
