ខេត្តរតនគិរី ៖ កន្លងទៅ«ចែច្រិប និងប្អូនឈ្មោះថាន» ជញ្ជូនឈើទៅវៀតណាមតាមច្រករបៀងខ្លាធំ និងច្រកអូរថ្ម សុទ្ធតែប្រភេទឈើហ៊ុបក្នុងឆ្នាំ២០១៦ ។ ការប្រព្រឹត្តរបស់ពួកគាត់ សមនិងទទួលខុសត្រូវបទល្មើសឧក្រិដ្ឋបំផ្លាញព្រៃឈើនៅស្រុកលំផាត់ ខេត្តរតនគិរី ប៉ុន្តែ គាត់រួចខ្លួន ចំណែកយាយព្រឿងជាប់គុក ។
បច្ចុប្បន្ន «ចែច្រិប និងប្អូនឈ្មោះថាន»បន្តសកម្មភាពបទល្មើសដឹកជញ្ជូនឈើទៅវៀត ណាម តាមច្រករបៀងខ្លាធំ និងច្រកអូរថ្មកក្រើកឡើងវិញ និងមានទ្រង់ទ្រាយក្នុងអំឡុង ដើមខែមីនានេះ លក្ខណៈចំហរ ដោយសំអាងបង់លុយអោយសមត្ថកិច្ច អាជ្ញាធរ ជំនាញ ជាច្រើនស្ថាប័ន…..។
ឈ្មួញ ឈ្មោះ ចែច្រឹប និងប្អូន ប្រុសឈ្មោះ ថាន គឺជាឈ្មោះមនុស្សដាក់សម្រាប់ហៅ ។ យ៉ាងណាឈ្មោះទាំង២ខាងលើនេះ ត្រូវបានគេស្គាល់និងហៅថា «ឈ្មួញឈើ» នាំពីស្រុកលំផាត់ចេញទៅប្រទេសវៀតណាម» ។ ពួកគេបានប្រកបអាជីពដឹកជញ្ជូន ឈើដោយប្រើរថយន្តកែច្នៃរាប់សិបគ្រឿង ឬលើសពីនេះ ជាយូរមកហើយ ចុះហេតុក៏គ្មានសមត្ថកិច្ច ឬស្ថាប័នជំនាញមានប្រតិកម្ម បង្ក្រាប ទប់ស្កាត់? ដូច្នេះថ្នាក់លើគួរពិនិត្យ និងចាត់វិធានការទៅលើមន្ត្រីជំនាញក្នុងដែនសមត្ថកិច្ចគ្រប់គ្រងរបស់ខ្លួនផង?
ប្រភពច្បាស់ការពីសមត្ថកិច្ចពាក់ព័ន្ធបានលួចទម្លាយឲ្យដឹងថា នៅដើមខែមីនា ឆ្នាំ២០១៨នេះ ប្អូនប្រុសចែច្រឹប ឈ្មោះ ថាន បានចេញមុខរត់ការសម្របសម្រួលជាមួយមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័ន ដើម្បីសម្រេចគោលបំណងដឹកជញ្ជូនឈើចេញទៅស្រុកយួនតាមច្រករបៀងខ្លាធំ និងច្រករបៀងអូរថ្ម ស្រុកអូរយ៉ាដាវ ។
យោងតាមរបាយការណ៍មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុងខេត្តរតនគិរីបានបង្ហាញថា «រយៈពេលប៉ុន្មានថ្ងៃកន្លងទៅនេះ ឈ្មួញ ឈ្មោះ ចែច្រឹប និងឈ្មោះ ថាន បានប្រើប្រាស់រថយន្តកែច្នៃរាប់សិបគ្រឿង ឬអាចលើសជាងនេះ ដោយប្រើរូបភាពប្រមូល ឈើ ប្រភេទឈើសុក្រំ និងឈ្លីក ដឹកចេញពីមូលដ្ឋានពួកគាត់យ៉ាងរលូនរួចដឹកជញ្ជូនចេញពីស្រុកលំផាត់ចេញទៅប្រទេសវៀតណាម» ។
ប្រភពដោយឡែកមួយទៀតបានឲ្យដឹងថា ក្រៅពីនាំឈើចេញពីចំណុចភូមិសាស្ត្រខាងលើឈ្មួញឈ្មោះ ចែច្រឹប និងបក្ខពួក បានដឹកជញ្ជូនឈើចេញពីតំបន់អូរជីប អូរក្រែង អូរបោក និងសហគមន៍កែងសាន់ ដោយបើកកាត់ទីប្រជុំជន់យ៉ាងគឃ្លើន ក្រោមក្រសែភ្នែកសមត្ថ កិច្ចជំនាញពាក់ព័ន្ធ រួចបន្តដំណើរឆ្ពោះទៅច្រករបៀងខ្លាធំ និងច្រករបៀងអូរថ្ម ស្រុកអូរយ៉ាដាវ ដោយគ្មានសមត្ថកិច្ចណាហ៊ានចាត់វិធានការបង្ក្រាបនោះទេ ។ កុំថាឡើយ សូម្បីតែមន្ត្រីគណៈកម្ម ការបង្ក្រាប និងទប់ស្កាត់បទល្មើសព្រៃឈើកំពុងឈរជើងនៅខេត្តរតនគិរី ក៏មិនហ៊ានប៉ះពាល់មុខរបរឈ្មួញឈ្មោះ «ចែច្រឹប» នោះដែរ ចាត់ទុកឈ្មួញឈើរូបនេះជាប្រភពចំណូលដ៏សំខាន់សម្រាប់ពួកគេ ។
គេមិនដឹងថា តើអាជ្ញាធរខេត្ត ក្នុងនាមជាគណៈបញ្ជាការឯកភាព ក៏ដូចជាអាជ្ញាធរ សមត្ថកិច្ចពាក់ព័ន្ធ ក្រោមការចាត់ ចែងពីមន្ត្រីជំនាញរដ្ឋបាលព្រៃឈើបានដឹងអំពីបញ្ហាបទល្មើសជួញដូរឈើដែលអាជ្ញាធរស្រុកនេះឃុបឃិតគ្នាបង្កើតឡើងប្រមូលប្រាក់ដែរឬយ៉ាងណានោះទេ? ប៉ុន្តែបើថ្នាក់ដឹកនាំខេត្តឆ្លើយថាមិនដឹង ដូចជាមិនសម ពីព្រោះបទល្មើស នៃ ទីតាំងស្តុកប្រមូលទិញឈើ គេអាចមើលដោយភ្នែកទទេ ផ្ទុយពីបទល្មើសគ្រឿងញៀន ដែលពួកឈ្មួញទុច្ចរិត មានចេតនាយកទៅលាក់ទុកនៅទីងងឹតនោះឡើយ ៕ ជាយក្រុង
