ភ្នំពេញ៖ បរុសម្នាក់បើករថយន្តម៉ាក RENGE ROVER មួយគ្រឿងសង្ស័យឈ្លោះប្រកែកគ្នាជាមួយសង្សារដែលនៅក្នុងរថយន្តហើយក៏បានទាញដៃចង្កូតរថយន្តជ្រុលទៅបុកបង្គោលភ្លើងបាក់ទ្រេតសង្កត់លើស្លាកយីហោ អមតៈត្រេឌីង ទទួលបញ្ចាំ ។
ហេតុការណ៍នេះកើតឡើងកាលពីវេលាម៉ោង១២ និង២០នាទីរំលងអាធ្រាត្រឈានចូលថ្ងៃទី៤ ខែវិច្ឆកា ឆ្នាំ២០១៥ ស្ថិតនៅតាមបណ្តោយផ្លូវកម្ពុជាក្រោម ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
បើតាមប្រភពព័ត៌មានពីសាក្សីកន្លែងកើតហេតុបានឱ្យដឹងថា មុនពេលកើតហេតុគេបានឃើញបុរសម្នាក់បើកបររថយន្តមួយគ្រឿងម៉ាក RENGE ROVER ពណ៌ស មិនចាំស្លាកលេខ ដោយនៅក្នុងរថយន្តនោះក៏មាននារីម្មាក់ទៀតដែលរួមដំណើរជាមួយបើកបរក្នុងទិសដៅពីលិចទៅកើត ហើយឃើញអ្នកទាំង២នាក់ធ្វើកាយវិការឈ្លោះប្រកែកគ្នាក្នុងរថយន្ត និងបានប្រទាញប្រទង់គ្នាទៀត លុះមកដល់ចំណុចកើតហេតុស្រាប់តែនារីជាសង្សារបានទាញដៃចង្កូតរថយន្តបណ្តាលឲ្យរេចង្កូតជ្រុលទៅបុកបង្គោលភ្លើងបាក់ទ្រេតសង្កត់ទៅលើស្លាកយីហោ ក្រុមហ៊ុនទទួលបញ្ចាំ អមតៈត្រេឌីង ធ្វើឲ្យខូចខាតតែមិនបណ្តាលឲ្យមានអ្នកណារងរបួសនោះទេ ។
ក្រោយពេលកើតហេតុរថយន្តបង្កបានបើករត់គេចខ្លួនបាត់ស្រមោលបន្សល់ទុក បង្គោលភ្លើងបាក់ទ្រេតនៅកន្លែងកើតហេតុ ៕
...
ដោយ៖ ស រស្មី
