ខេត្តឧត្តរមានជ័យ៖ ក្មេងស្ទាវជើងកាងប្រចាំភូមិ៥នាក់ ត្រូវនគរបាលចាប់ខ្លួន ក្រោយពីបានធ្វើសកម្មភាពជិះម៉ូតូស៊ីម៉ាំងប្រែនប្រណាំងគ្នា ជ្រែតាមផ្លូវ ព្រមទាំងស្រែកហ៊ោកញ្ជ្រៀវក្នុងពេលរាត្រី រំខានដល់ការរស់នៅ និងការសម្រាកសម្រាន្ដរបស់អ្នកស្រុក ។
ការឃាត់ខ្លួនក្រុមក្មេងទំនើងខាងលើ បានធ្វើឡើងកាលពីវេលា ម៉ោង១១និង៥០នាទី ថ្ងៃទី០២ ខែវិច្ឆិកា ឆ្នាំ២០១៥ នៅឃុំ បាក់អន្លូង ស្រុកត្រពាំងប្រាសាទ ខេត្តឧត្តរមានជ័យ ។
តាមប្រភពព័ត៌មានពីសមត្ថកិច្ចបានឲ្យដឹងថា ក្មេងស្ទាវទាំង៥នាក់ដែលត្រូវនគរបាលចាប់ខ្លួនរួមមាន១/ឈ្មោះ ចាន់ ចេន ភេទប្រុស អាយុ ២៥ឆ្នាំ ២/ឈ្មោះ ស៊ិន សុភក្ត្រ័ ភេទប្រុស អាយុ៣១ឆ្នាំ ៣/ឈ្មោះ ខៀន ឃាន់ ភេទប្រុសអាយុ៣០ឆ្នាំ ៤/ឈ្មោះ គង់ ចាន់ធាន ភេទប្រុស អាយុ១៨ឆ្នាំ និង៥/ឈ្មោះ ត្រាច រិម ភេទប្រុស អាយុ១៧ឆ្នាំ ទាំង៥នាក់រស់នៅក្នុងភូមសំបូរ ឃុំបាក់អន្លូង ស្រុកត្រពាំងប្រាសាទ។ក្រៅពីនេះសមត្ថកិច្ចដកហូតបាន ម៉ូតូ៣គ្រឿង ។
ប្រភពដដែលបានឲ្យដឹងថា ក្មេងទំនើងទាំង៥នាក់ ត្រូវបាននគរបាលចាប់ខ្លួន ខណៈដែលពួកគេជិះម៉ូតូលឿនហើយបង្កសម្លេងរោទិ៍ខ្លាំង និងបានស្រែកឡូឡា បង្កការរំខានដល់ពលរដ្ឋ ធ្វើឲ្យខូចសណ្តាប់ធ្នាប់ និងបង្កអសន្តិសុខដល់សង្គម ។
បច្ចុប្បន្នក្រុមក្មេងទំនើរទាំងនោះ ស្ថិតក្រោមការសួរនាំ ដើម្បីកសាងសំណុំរឿងចាត់ការតាមច្បាប់ ៕
ដោយ៖ វិបុល
