ភ្នំពេញ៖ តារាសម្តែងប្រុសស្រីល្បីឈ្មោះ និងអ្នកនិយមហ្វឹកហាត់ក្បាច់គុនបុរាណខ្មែរជាច្រើនរួបនឹងរួមគ្នាសម្តែងក្នុងខ្សែភាពយន្តខ្នាតធំរឿង “វិស្សមកាលមរណៈ” របស់ផលិតកម្ម ចក្រវាឡពេជ្រភាពយន្ត។
ការប្រមូលផ្តុំតួសម្តែង នេះត្រូវបានធ្វើឡើងក្នុងពិធី ក្រុងពលី កាលពីថ្ងៃទី៣ វិច្ឆិកាឆ្នាំ២០១៥ ក្នុងទីស្នាក់ការរបស់ក្រុមផលិតកម្មចក្រវាឡស្ថិតនៅក្នុងបុរីវិមានភ្នំពេញ។
ខ្សែភាពយន្តរឿង«វិស្សមកាលមរណៈ»ជាប្រភេទរឿងដុំដែលនិយាយពីចំណុចសំខាន់ៗ ក្នុងនោះមានកំប្លែង ខ្មោចលង និងការវាយតប់ដោយត្រូវបានចាងហ្វាងផលិតកម្មរៀបចំឲ្យតួសម្តែងទាំងអស់មកប្រជុំគ្នាហាត់រៀនវិជ្ជាគុនជាមុន ដើម្បីបានសម្តែងមើលទៅបែបធម្មជាតិ ។ ក្រៅពីបង្ហាត់ជំនាញក្បាច់គុនបុរាណដល់តារាសម្តែងពីក្រុមអ្នកជំនាញភាពយន្តថ្មីនេះក៏ប្រមូលផ្តុំទៅដោយតារាសម្បូរបទពិសោធអស់ជាច្រើនឆ្នាំមករួមគ្នាសម្តែងកសាងខ្សែភាពយន្តនេះឲ្យមានកម្រិតទាក់ទាញពីសំណាក់ទស្សនិកជនដោយផលិតកម្មបានចំណាយទុនជាច្រើនដើម្បីឲ្យមានគុណភាពខ្ពស់។
តារាដែលមានវត្តមានសម្តែងរឿង«វិស្សមកាលមរណៈ»រួមមានកញ្ញានី មុនីនាថ នាងខ្ញុង អ្នកនាងឆៃលី ដាឡែន អ្នកនាងតូច ស្រីពេជ្រ លោកសាយ សៀរ៉ា លោកថៃ ប៊ុននាង អ្នកស្រីចាន់តារាទី អ្នកនាងប៉ែន សុផានី កញ្ញាថន លក្ខិណា លោកហម ឈរ៉ាព្រមទាំងតារាមួយចំនួនទៀតផងដែរ។
អ្នកស្រីថុង ស៊ីវទៀង អគ្គនាយិការផលិតកម្មចក្រវាឡពេជ្របានមានប្រសាសន៍ថា អ្នកស្រីបានចំណាយដើមទុនច្រើនគួរសមប្រមាណជាង៤ម៉ឺនដុល្លារសម្រាប់បង្ហាញសមិទ្ឋិផលថ្មីនេះឲ្យល្អសំដៅធ្វើយ៉ាងណាកុំឲ្យគេថា កុនខ្មែរអន់ថយ ក៏ដូចជាខំដើរឲ្យទាន់កុនបរទេស ។
អ្នកស្រីបញ្ជាក់ថា ទស្សនិកជនខ្មែរនៅតែស្រឡាញ់ និងគាំទ្រកុនខ្មែរទើបអ្នកស្រីខិតខំរិះរកអ្វីដែលប្លែកឲ្យមើលទៅមានកម្រិតទទួលបានក្រោយពេលបញ្ចាំងជាផ្លូវការ។អ្នកស្រីបន្ថែមថាផលិតកម្មបានចំណាយប្រាក់ទិញរបស់ល្អៗទំនើបយកមកថតដោយកាម៉ារ៉ាខ្លះទិញមកពីក្រៅស្រុកគឺមកពីជប៉ុនមានទាំងអាចថតលើអាកាសនិងថតនៅក្នុងទឹកបានទៀត ។ រឿង«វិស្សមកាលមរណៈ»នេះត្រូវថតជាច្រើនសប្តាហ៍នៅលើនាវាដោយមានប្លង់ជាច្រើនត្រូវថតនៅតាមដងទន្លេមេគង្គ។
អ្នកស្រីលើកឡើងដែរថា រឿងនេះគឺជាប្រភេទរឿងវាយតប់ក្បាច់គុនដោយទាំងស្រីទាំងប្រុសត្រូវតែចេះសម្តែងបានវាយតប់ឲ្យល្អទើបអ្នកស្រីចេញបញ្ជាឲ្យតារាៗមានឈ្មោះថតមកហាត់រៀនជាគោលឲ្យទំនងអត់ធ្វើលេងៗបានទេមហាជនពិតជារិះគន់កាលណាចេញទៅឆ្គង ។ អ្នកស្រីរំពឹងថា រឿងនេះពិតជាជោគជ័យ ព្រោះថាយើងចំណាយទុនច្រើនហើយអត់ស្តាយប្រាក់ទេបូកផ្សំទាំងតួសម្តែងសុទ្ឋតែជាអ្នកមានជំនាញព្រមទាំងអ្នកដឹកនាំរឿងផលិតករក៍សម្បូរបទពិសោធន៍សំខាន់ការចំណាយទុននេះជារឿងចម្បង។
តារាសម្តែងកញ្ញានី មុនីនាថដែលជាតួអង្គឯកក្នុងរឿងនេះដែរ បានឲ្យដឹងថា អ្នកនាងបានថតរឿងជាច្រើនមកហើយសុទ្ឋតែជាតួស្លូតយំនិងខ្លះក្រម៉ិចក្រមើម ។ ប៉ុន្តែលើកនេះត្រូវបញ្ចេញកាយវិការវាយតប់ក្បាច់គុនបុរាណខ្មែរផងនោះ ពិតជាលំបាកត្រូវតែខំស៊ូឲ្យមើលទៅល្អសមជាតារាមហាជនឲ្យតម្លៃ ។ យ៉ាងណា ក៏នាងមិនសូវជាលំបាកដូចពេលមិនទាន់មើលសាច់រឿងទេ ព្រោះនាងបានមកហ្វឹកហាត់ក្បាច់គុនបានមួយរយៈដែរដើម្បីបានទុនខ្លះក្នុងការសម្តែងទើបមិនសូវជាភ័យខ្លាចសម្តែងស្ទើរ ។ នាងសង្ឃឹមថា ផ្ទៃរឿងនេះ ក៏ពិតជាមានអ្នកគាំទ្រស្របពេលដែលម្ចាស់ផលិតកម្មគាត់ចំណាយទុនច្រើនសូម្បីតែម៉ាស៊ីនថត មើលទៅសុទ្ឋតែជារបស់មានគុណភាព ខណៈដែលរឿងខ្មែរ ក៏នៅមានអ្នកឲ្យតម្លៃទៀតនោះ៕
ដោយ៖ វឌ្ឍនា
