ខេត្តបាត់ដំបង ៖ បុរសម្នាក់ជិះម៉ូតូក្នុងល្បឿនយ៉ាងលឿន ហើយបានជ្រុលទៅបុកនឹងគូទត្រាក់ទ័រចំពីក្រោយពេញទំហឹងដោយសារតែភ្លើងម៉ូតូមិនសូវភ្លឺផង និងការបើកបរក៏ខ្វះការប្រុងប្រយ័ត្នផងរងរបួសធ្ងន់ ហើយក្រោយមកត្រូវបានសាច់ញាតិ និងក្រុមគ្រួសារ ដឹកបញ្ជូនទៅកាន់មន្ទីរពេទ្យដើម្បីសង្គ្រោះ តែគ្រូពេទ្យសង្គ្រោះមិនបានក៏ស្លាប់បាត់បង់ជីវិតទៅ ។
ឧប្បត្តិហេតុគ្រោះថ្នាក់ចរាចរណ៍នេះកើតឡើងកាលពី វេលាម៉ោង៥ព្រឹក ថ្ងៃ សៅរ៍ ១ កើត ខែ ចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៧ ខែមីនា ឆ្នាំ២០១៨ ត្រង់ចំណុចភូមិអន្លង់ក្រូច ឃុំបួរ ស្រុកភ្នំព្រឹក ខេត្តបាត់ដំបង។
ជនរងគ្រោះ ឈ្មោះ ទឹម ទឺ ភេទប្រុស អាយុ៥២ឆ្នាំ រស់នៅភូមិស្ពានទំនាប ឃុំបួរ ស្រុកភ្នំព្រឹក ជិះ ម៉ូតូម៉ាកហុងដាវេវ ពណ៌ក្រហម ស៊េរីឆ្នាំ២០០០ ត្រាក់ទ័រម៉ាកហ្វត ពណ៌ខៀវ បើកបរដោយ ឈ្មោះ ឡាយ វាន្នី ភេទប្រុស អាយុ៦៣ ឆ្នាំ រស់នៅភូមិជាមួយ ។
សមត្ថកិច្ចនគរបាលចរាចរ ស្រុកភ្នំព្រឹកបានឲ្យដឹងថា មុនពេលកើតហេតុត្រាក់ទ័រ កំពុងបើកបរនៅលើផ្លូវជាធម្មតា នៅពេលនោះស្រាប់តែម៉ូតូជនរងគ្របានបើក បោះពួយលឿនស្របទិសគ្នា ក៏បានបុក ត្រាក់ទ័រចំពីក្រោយ បណ្តាលឲ្យរងរបួសជាទម្ងន់។ បន្ទាប់មកក្រុមគ្រួសារ និងសាច់ញាតិក៏បានដឹកបញ្ជូនទៅកាន់មន្ទីរពេទ្យសំពៅលូនដើម្បីសង្គ្រោះ ហើយក្រោយមកក៏បានស្លាប់បាត់ទៅ ។
បច្ចុប្បន្នសពជនរងគ្រោះ ត្រូវបានក្រុមគ្រួសាររៀបចំធ្វើបុណ្យតាមប្រពៃណីហើយ ដោយឡែក ម៉ូតូ និងត្រាក់ទ័រ ត្រូវបានសមត្ថកិច្ចនាំយកទៅរក្សាទុកនៅប៉ុស្តិ៍នគរបាលរដ្ឋបាលបួរ ជាបណ្តោះអាសន្នរង់ចាំដោះស្រាយពេលក្រោយ៕
