ខេត្តមណ្ឌលគិរី ៖ ជនជាតិវៀតណាមទាំង៨នាក់ ដែលបានស៊ីឈ្មួលកាប់ឈើឲ្យក្រុមហ៊ុន ដួង ស្រួចហើយត្រូវបានសាលាដំបូងខេត្តមណ្ឌលគិរីសំរេចឃុំខ្លួននៅពន្ឋនាគាខេត្តមណ្ឌលគិរីអស់រយៈពេលជាង៣ខែ ក្នុងសំនុំរឿងលេខ៩/១២-១ ២០១៨។
ពេលនេះលេចលឺថាត្រូវបានសាលាឧទ្ធរណ៍សម្រេចឲ្យនៅក្រៅឃុំហើយមន្ត្រីអ្នកច្បាប់ជាច្រើនកំពុងកើតមានចម្ងល់ពីការអនុវត្តច្បាប់របស់មន្ត្រីសាលាឧទ្ធរណ៍នោះ។
ប្រភពពីសាលាដំបូងខេត្តមណ្ឌលគិរីបានឲ្យដឹងថាក្រុមហ៊ុនដួងស្រួច បានសុំឲ្យជនជាតិវៀតណាម៨នាក់នោះ នៅក្រៅឃុំ ប៉ុន្តែសាលាដំបូងមណ្ឌលគិរីមិនព្រមអនុញ្ញាតទេ។
ពួកគេមានសិទ្ធិ៥ថ្ងៃដើម្បីប្តឹងទៅសាលាឧទ្ធរណ៍ទទួលដំណឹងមិនឲ្យនៅក្រៅឃុំរបស់សាលាដំបូងខេត្តមណ្ឌលគិរីថ្ងៃទី០៦ កុម្ភៈ២០១៨រហូតដល់ថ្ងៃទី២១ កុម្ភៈ ២០១៨ អស់១៥ថ្ងៃទៅហើយ ទើបគេប្តឹងទៅឧទ្ធរណ៍ ។
ប្រភពបានបញ្ជាក់ថាពេលបញ្ជូនទៅដល់សាលាឧទ្ឋរណ៍ បែរជាសាលាឧទ្ឋរណ៍ឲ្យនៅក្រៅឃុំ។
ក្រុមអ្នកច្បាប់បាននិយាយថា បើសិនជាព័ត៌មានដែលលេចធ្លាយខាងលើ ពិតជាអនុញ្ញាតឲ្យជនជាតិវៀតណាមទាំង ៨នាក់នៅក្រៅឃុំពិតមែននោះ គឺខុសច្បាប់ទាំងស្រុងហើយ ព្រោះទុកសិទ្ធប្តឹងឧទ្ធរណ៍អាចធ្វើទៅបានមានសុពលភាពត្រឹម៥ថ្ងៃប៉ុណ្ណោះ តែករណីនេះមានរយៈពេលរហូតដល់១៥ថ្ងៃទៅហើយទើបគេប្តឹងទៅឧទ្ធរណ៍ដូច្នេះការអនុវត្តន៍ច្បាប់របស់មន្ត្រីដែលកាន់សំនុំរឿងនេះនៅសាលាឧទ្ធរណ៍អាចមានការភាន់ច្រលំឬមានផលប្រយោជន៍អ្វីមួយមិនខាន?។
នៅរសៀលថ្ងៃ សុក្រ១៥ រោច ខែ ផល្គុនឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី ១៦ ខែ មីនា ឆ្នាំ ២០១៨នេះមិនអាចសុំការបំភ្លឺបានទេ ពីមន្ត្រីសាលាឧទ្ធរណ៍ ។
អ្នកនាំពាក្យសាលាដំបូងខេត្តមណ្ឌលគិរីលោកម៉ម វ៉ាន់ដា បានឲ្យដឹងថា បច្ចុប្បន្នជនជាតិវៀតណាមទាំង៨នាក់នោះកំពុងឃុំខ្លួននៅពន្ធនាគារខេត្តហើយក្រុមហ៊ុន ដួង ស្រួច ស្នើសុំឲ្យនៅក្រៅឃុំ ប៉ុន្តែសាលាដំបូងខេត្តមណ្ឌលគិរីបានច្រានចោលចំពោះការស្នើសុំនេះ ។
តំណាង ក្រុមហ៊ុន ដួង ស្រួចបានប្ដឹងទៅសាលាឧទ្ធរណ៍ ដូច្នេះករណីនេះគឺផុតដែនសមត្ថកិច្ចរបស់សាលាដំបូងខេត្តមណ្ឌលគិរីហើយ។
ជនជាតិវៀតណាមចំនួន៨នាក់ នោះត្រូវបានព្រះរាជអាជ្ញាររងអមសាលាដំបូងខេត្តមណ្ឌលគិរី ដឹកនាំកម្លាំងចម្រុះចុះឃាត់ខ្លួន បញ្ជូនទៅសាកសួរនៅខណ្ឌរដ្ឋបាលព្រៃឈើមណ្ឌលគិរី ក្រោយទទួលព័ត៌មានពីប្រជាពលរដ្ឋថា ពួកគេបាននឹងកំពុងធ្វើសកម្មភាពកាប់នឹងឈូសឆាយព្រៃឈើខុសច្បាប់នៅក្នុងដែនជម្រកសត្វព្រៃស្រែពក ក្នុងភូមិសាស្ត្រ ឃុំក្រង់តេះ ស្រុកពេជ្រាដា ប្រតិបត្តិការនេះបានធ្វើឡើងតាំងពីព្រឹកថ្ងៃទី១០ ខែមករា ឆ្នាំ២០១៨មកម្លេះ។
ទីស្តីការគណៈរដ្ឋមន្ត្រីបានចេញលិខិតមួយច្បាប់លេខ២៤៤ សផណ.កស ចុះថ្ងៃទី២៦ កុម្ភៈ ២០១៨ ដែលមានកម្មវត្ថុ ករណីសំណើរសុំការសម្រេចជាគោលការណ៍ ក្នុងការបញ្ឈប់ការអនុញ្ញាតឲ្យក្រុមហ៊ុន ដួង ស្រួច គ្រុប ឬក្រុមហ៊ុនឯកជនណាមួយប្រមូលផល-អនុផលព្រៃឈើ នៅក្នុងតំបន់គម្រោងសម្បទានដីសង្គមកិច្ច ។
យោងលិខិតលេខ២៤០ស.ណ ប.ស្ថ ចុះថ្ងៃទី២០ កុម្ភៈ ២០១៨របស់ក្រសួងបរិស្ថាន ចំណារដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី២២ កុម្ភៈ ២០១៨ មិនអនុញ្ញាតឲ្យក្រុមហ៊ុនដួង ស្រួច គ្រុប ឬក្រុមហ៊ុនផ្សេងទៀតធ្វើអាជីវកម្មប្រមូលផល-អនុផលព្រៃឈើលើដី ដែលរដ្ឋាភិបាលបានចេញអនុក្រឹត្យ ធ្វើអនុបយោគជាដីឯកជនរដ្ឋ សម្រាប់ផ្តល់កម្មសិទ្ធិជូនប្រជាពលរដ្ឋកន្លងមកឬធ្វើអាជីវកម្មប្រមូលអនុផលព្រៃឈើនៅក្នុងទីតាំងគម្រោងសម្បទានសង្គមកិច្ចទាំងអស់។
អ្នកតាមដានករណីខាងលើនេះ បានលើកឡើងជាសំនួរថាករណីនាំជនជាតិវៀតណាមទៅធ្វើ សកម្មភាពខុសច្បាប់ក្នុងតំបន់ហាមឃាត់ ហើយសមត្ថកិច្ចមានទាំងវត្ថុតាងជាក់ស្តែង តែម្ចាស់ក្រុមហ៊ុន ដួង ស្រួច បែរជាមិនទាន់មានការចោទប្រកាន់ណាមួយពីតុលាការនៅឡើយ៕ ដោយៈជីវន្ត
