ភ្នំពេញ៖ ជនសង្ស័យម្នាក់ត្រូវម្ចាស់ផ្ទះឃាត់ខ្លួនប្រគល់ឱ្យនគរបាលប៉ុស្តិ៍វាលវង់បន្ទាប់ធ្វើសកម្មភាពប៉ុនប៉ងចូលលួចយកទ្រព្យសម្បត្តិក្នុងផ្ទះគេ នៅអគារបុរីកីឡា(អគារB)ជាន់ទី៣បន្ទប់លេខ៧ ផ្លូវលេខ២១១ ភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ ។
បន្ទាប់ពីមា្ចស់ផ្ទះដឹងហើយបានរាយការណ៍ឲ្យសមត្ថកិច្ចមូលដ្ឋានធ្វើការឃាត់ខ្លួន ហេតុការណ៍នេះកើតឡើងកាលពីវេលាម៉ោង ០៥និង៥០នាទីល្ងាចថ្ងៃទី៤ ខែវិច្ឆិកាឆ្នាំ២០១៥ ។
ជនសង្ស័យដែលឃាត់ខ្លួននោះឈ្មោះ ឈុន ផៃរ៉ាត់ ភេទប្រុស អាយុ២៥ឆ្នាំ មុខរបរនិងស្នាក់នៅមិនពិតប្រាកដ មានស្រុកកំណើតនៅស្រុកកំពង់សៀម ខេត្តកំពង់ចាម ដែលទើបតែចេញពន្ធធានាគារព្រៃសនិងជាប់ពន្ធធានាគារព្រៃសចំនួន២លើកមកហើយ ពីបទឆក់ទូរស័ព្ទមិនបានសម្រេចនៅសង្កាត់ទឹកល្អក់ទី៣ខណ្ឌទួលគោក។ ចំណែកជនរងគ្រោះឈ្មោះ រ័ត្ថ ឆន ភេទប្រុសអាយុ៤៨ឆ្នាំ មុខរបរកងកម្លាំងវិសកម្ម ស្នាក់នៅកើតហេតុខាងលើ ។
បើតាមប្រភពព័ត៌មានពីជនរងគ្រោះបានប្រាប់ឲ្យដឹងថា មុនពេលកើតហេតុគេឃើញជនសង្ស័យមា្នក់ បានឡើងទៅលើបុរីកីឡាអគារBជាន់ទី៣ហើយចូលទៅក្នុងបន្ទប់លេខ៧ រួចប៉ុនប៉ងលួចយកសម្ភារៈនៅក្នុងផ្ទះ តែពេលនោះក៏ស្រាប់តែម្ចាស់ផ្ទះក្រឡេកឃើញទាន់ក៏បានចាប់បានភ្លាមៗរួចឃាត់ខ្លួនប្រគល់ឲ្យសមត្ថកិច្ចម្តង ។ បន្ទាប់ពីសមត្ថកិច្ចធ្វើការសាកសួរជនសង្ស័យបានសារភាពថា ខ្លួនមិនបានលួចរបស់របរអ្វីនោះទេ គ្រាន់តែឡើងទៅអើតរកមើលបន្ទប់ជួលស្នាក់នៅតែប៉ុណ្ណោះ ព្រោះមុនពេលកើតហេតុរូបគេបានទៅលេងបន្ទប់របស់មិត្តភក្កិនៅក្បែរនោះសុំស្នាក់នៅត្រូវសាច់ញាតិរបស់មិត្តភក្កិមិនអនុញ្ញាតឲ្យគេចូលទៅលេងទេ ។
ក្រោយកើតហេតុសមត្ថកិច្ចបានប្រាប់ឲ្យដឹងថា ជនសង្ស័យខាងលើនេះធ្លាប់ជាប់ពន្ធនាគារចំនួន២ដងមកហើយ ពីបទឆក់ទូរស័ព្ទមិនបានសម្រេច ។ បច្ចុប្បន្នជនសង្ស័យ ត្រូវនគរបាលប៉ុស្តិ៍វាលវង់ កសាងសំណុំរឿងបញ្ជូនទៅអធិការដ្ឋានខណ្ឌ៧មករា ដើម្បីចាត់ការតាមច្បាប់ ៕
...
ដោយ៖ ស រស្មី
