ភ្នំពេញ៖ រថយន្ត១គ្រឿងរបស់ កងវិស្វកម្មដោយមានសណ្ដោង កន្ទុយរ៉ឺម៉កផង បានដឹកដែកពុម្ពសសរ ចំនួន២២ដើម និងទម្ងន់រាប់សិបតោន បានបាក់ចម្រឹងដែកទ្រុង បណ្ដាលឲ្យធ្លាក់ដែកពុម្ពសសរនោះ សង្កត់ ម៉ូតូសណ្ដោងរ៉ឺម៉ក១គ្រឿង រងការខូចខាតយ៉ាងដំណំ និង ធ្លាក់រាយប៉ាយពេញផ្លូវ ។
កាលពីវេលាម៉ោង ៨ ព្រឹក ថ្ងៃទី៥ ខែវិច្ឆិកា ឆ្នាំ២០១៥ នៅលើកំណាត់ ផ្លូវជាតិលេខ3 ត្រង់ចំណុចភូមិទួលកី សង្កាត់ភ្លើងឆេរទះ ខណ្ឌ ពោធិ៍សែនជ័យ រាជធានីភ្នំពេញ ប៉ុន្តែជាសំណាងល្អ មិនបានបណ្ដាលឲ្យមាន នរណាម្នាក់រងគ្រោះនោះ ឡើយ ។
រថយន្តបង្កនោះម៉ាក ហ៊ីណូ ពណ៍ខៀវ ពាក់ស្លាកលេខ ភ្នំពេញ 3A-1487 ជារថយន្តរបស់កងវិស្វកម្ម ក្រសួងការពារជាតិ ហើយអ្នកបើកបរមិនត្រូវបានគេស្គាល់ឈ្មោះឡើយ ចំណែកម៉ូតូសណ្ដោងរ៉ឺម៉ក ម៉ាកហុង ដាវ៉េវ ពណ៍ខ្មៅ បើកបរដោយបុរសម្នាក់ឈ្មោះ ញ៉ុញ កាន អាយុ៣៥ឆ្នាំ មុខរបរជាងដែក មានទីលំនៅភូមិ ដំណាក់ ត្រាច ឃុំទួលអំពិល ស្រុកបរសេដ្ឋ ខេត្តកំពង់ស្ពឺ ហើយម៉ូតូនេះរួមនិងកន្ទុយ រ៉ឺម៉កបានរងការខូចខាត យ៉ាងដំ ។
ប៉ូលិសបានឲ្យដឹងថា នៅមុនពេលកើតហេតុ ម៉ូតូសណ្ដោងរ៉ឺម៉ក ជិះគ្នា៣នាក់ទាំងអ្នកបើកបរ បានធ្វើ ដំណើរទៅដឹកដែក នៅម្ដុំថ្នល់បំបែកចោមចៅ ក្នុងទិសដៅពីត្បូងទៅជើង ប៉ុន្តែពេលទៅដល់ ត្រង់ចំណុច កើតហេតុ បានឈប់នៅលើចិញ្ចើមផ្លូវ ខាងស្ដាំដៃ រួចនាំគ្នាដើរឆ្លងផ្លូវ ទៅហូបបាយ ។ លុះពេល ដើរចេញ និង ឆ្លងផ្លូវផុតបន្តិច ស្រាប់តែរថយន្តបង្កនោះ មាន សណ្ដោងរ៉ឺម៉កផង ដឹកដែកពុម្ពសសរខំនួន២២ដើម បើកបរក្នុងទិសដៅ ស្របគ្នាទៅដល់ល្មម ។ពេលនោះចម្រឹងដែកទ្រុងរថយន្តបានបាក់ បណ្ដាលឲ្យ ធ្លាក់ដែក ពុម្ពសសរសង្កត់ម៉ូតូសណ្ដោងរ៉ឺម៉កនោះទាំងកំរោល បណ្ដាលឲ្យរងការខូចខាតយ៉ាងដំណំ ហើយដែកពុម្ព នោះបានខ្ទាតរប៉ាត់រប៉ាយពេញផ្លូវផងដែរ ។
ប្រភពដដែលបានបន្តថា រថយន្តនោះបានបើកចេញពីទីតាំងរបស់ខ្លួនដែល ស្ថិតនៅក្នុងភូមិវត្តស្លែង សង្កាត់ ពងទឹក ខណ្ឌដង្កោ ទៅកាន់ទីតាំងស្ថាបនាផ្លូវនៅ ខេត្តកំពង់ចាម ហើយដោយសារការធ្វេសប្រហែស និងការដឹកលើសចំណុះ ទើបបណ្ដាលឲ្យមានបញ្ហាបែបនេះកើតឡើង។ ដោយឡែកដែកពុម្ពសសរ នោះក្នុង ១ដើម ៗ មានមុខកាត់ ទំហំប្រមាណកន្លះម៉ែត្រ និងបណ្ដោយ ប្រវែងប្រមាណ៥ម៉ែត្រ ហើយនៅចំណុច ដែលធ្លាក់ នោះ ខូងដីជម្រៅប្រមាណ ៣ទៅ៤តឹក ប្រសិនបើធ្លាក់ត្រូវមនុស្សវិញ គឺចំដៃដាច់ដៃ ចំជើងដាច់ ជើងឬចំខ្លួន ដាច់ខ្លួនតែម្ដង ។ ម្យ៉ាងទៀតធ្លាក់ខុសពេលដែលកម្មករកម្មការិនី ធ្វើដំណើរទៅធ្វើការរោងចក្រ និងពេលដែលអ្នកបើកបរនិងអ្នកជិះ ម៉ូតូសណ្ដោងរ៉ឺម៉កនោះដើរចេញផុត ទើបគ្មានអ្នកគ្រោះថ្នាក់បែបនេះ។
ក្រោយពេលកើតហេតុ ភាគីទាំងសង្ខាងបាន សម្រួលគ្នាបញ្ចប់រឿង នៅនឹងកន្លែងកើតហេតុ ដោយម្ចាស់ រថយន្តចេញសំណង ចំនួន៣០០ដុល្លារទៅឲ្យម្ចាស់ម៉ូតូសណ្ដោងរ៉ឺម៉កដើម្បីជួសជុលឡើងវិញ ៕
ដោយ៖ សុខាសែនជ័យ
