ភ្នំពេញ៖ បុរសម្នាក់ជិះម៉ូតូមួយគ្រឿងទៅបុកអ្នកដើរឆ្លងផ្លូវ ហើយដួលទៅលើថ្នល់ ក៏ត្រូវរថយន្តដឹកស្រាបៀរកម្ពុជា បើកក្នុងទិសដៅបញ្ច្រាសទិសកិនបែកក្បាលនិងបាក់កជាប់ក្រោមរថយន្ត បណ្តាលឱ្យ ស្លាប់ភ្លាមៗយ៉ាងអាណោចអាធ័មនៅនឹងកន្លែងកើតហេតុ ។
ហេតុការណ៍គ្រោះថ្នាក់ចរាចរណ៍នេះបង្កអោយមានការភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី៥ ខែវិច្ឆិកា ឆ្នាំ២០១៥ នៅចំណុចមុខក្លឹបបាល់ទាត់ហ្វូតាបា តាមបណ្តោយផ្លូវជាតិលេខ៥ ស្ថិតក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។
សមត្ថកិច្ចបានឱ្យដឹងថា ជនរងគ្រោះបានឈ្មោះ ប៊ូ ណារិទ្ឋ ភេទប្រុស អាយុ៤២ឆ្នាំ មានស្រុកកំណើតនៅសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
ប្រភពព័ត៌មានជុំវិញកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូហុងដាឌ្រីម សេ១២៥ ពណ៍ខ្មៅ សេរីឆ្នាំ២០១៣ ពាក់ស្លាកលេខ ភ្នំពេញ 1BM-8622 ជិះតាមបណ្តោយផ្លូវជាតិលេខ៥ ទិសដៅពីត្បូងទៅជើង ពេលមកដល់ចំណុចកើតហេតុមានបុរសម្នាក់ កំពុងដើរឆ្លងផ្លូវទិសដៅពីកើតមកលិច ចាប់ហ្វ្រាំងមិនទាន់ក៏បុកពេញទំហឹងបណ្តាលឱ្យអ្នកដើររងរបួសធ្ងន់ ។ ប្រភពដដែលបន្តថា បន្ទាប់ពីបុកគេរួចមកគាត់ក៏ដួលម៉ូតូខ្ទាត ទៅកណ្តាលថ្នល់ ភ្លក៏ត្រូវរថយន្តដឹកស្រាបៀរកម្ពុជាមួយគ្រឿង បើកបរដោយបុរសម្នាក់ ពាក់ស្លាកលេខ ភ្នំពេញ 2R-4881 បើកក្នុងទិសដៅបញ្ច្រាសទិសគ្នាចាប់ហ្វ្រាំងមិនទាន់ក៏កិននិងអូសប្រហែល៥ម៉ែត្រ បណ្តាលឱ្យកល់ជាប់ក្រោមរថយន្ត ស្លាប់យ៉ាងអាណោចអាធម៌នៅនឹងកន្លែងកើតហេតុ នាំឱ្យអ្នកដំណើរនិងប្រជាពលរដ្ឋនៅជិតនោះនាំគ្នាចោមរោមមើលយ៉ាងច្រើនកុះករ ។ ចំនែកអ្នករងរបួសត្រូវបានបញ្ជូនទៅសង្គ្រោះនៅមុន្ទីរពេទ្យ។
ក្រោយមកសមត្ថកិច្ចក៏បានចុះមកអន្តរាគមន៍ភ្លាមៗនៅនឹងកន្លែងកើតហេតុ និងបានឃាត់អ្នកបើករថយន្តយកទៅអធិការដ្ឋាននគរបាលខណ្ឌឬស្សីកែវ ចំណែកសពជនរងគ្រោះសមត្ថកិច្ចទំនាក់ទំនង ទៅក្រុមគ្រួសារ ឱ្យមកទទួលយកទៅធ្វើបុណ្យតាមប្រពៃណីឯស្រុកកំណើត ។ ចំណែករថយន្ត និងម៉ូតូ សមត្ថកិច្ចបានវាស់វែងយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរង់ចាំដោះស្រាយទៅតាមផ្លូវច្បាប់ ៕
ដោយ៖ ជឹម ភារ៉ា
