ភ្នំពេញ៖ បុរសម្នាក់ត្រូវគេប្រទះឃើញស្លាប់ ដែលករណីនេះ សមត្ថកិច្ចសន្និដ្ឋានថា បណ្តាលមកពីខ្យល់គ និងគាំងបេះដូរ ។ ហេតុការណ៍ភ្ញាក់ផ្អើលបានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី៦ ខែវិច្ឆិកា ឆ្នាំ២០១៥ នៅយានដ្ឋានមួយកន្លែងផ្ទះលេខ១០៧ ផ្លូវលេខ៤៣០កែងនឹងលេខ២០៥ ស្ថិតក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ។
សពឈ្មោះ ថោង ម៉េងហេងលាង ហៅ ហេងទិត្យ ភេទប្រុស អាយុ២៥ឆ្នាំ ស្រុកកំណើតនៅឃុំរកាលើ ស្រុកសំបូរមាស ខេត្តកំពង់ចាម មុខរបរជាជាងជួសជុលរថយន្ត ស្នាក់នៅកន្លែងធ្វើការ ។
មុនពេលកើតហេតុ បានជជែកគ្នាលេង និងចូលដេកនៅកន្លែងរបស់ខ្លួនដូចសព្វមួយដងនៅកន្លែងធ្វើការ ។ លុះដល់វេលាទៀបភ្លឺ បុរសរងគ្រោះតែងតែក្រោមមុនគេដើម្បីរៀបចំបើកទ្វារយានដ្ឋាន ប៉ុន្តែចំឡែកអីថ្ងៃនេះ មិត្តភក្តិរួមការងារមិនឃើញបុរសក្រោក ក៏មានការសង្ស័យទើបនាំគ្នាទៅដាស់ ទើបដឹងថា ជនរងគ្រោះបានដាច់ខ្យល់ស្លាប់មិនដឹងតាំងពីពេលណាមកហើយ ។
ក្រោយមកកម្លាំងជំនាញបានចុះពិនិត្យដល់កន្លែងកើតហេតុ ហើយបានសន្និដ្ឋានថា ជនរងគ្រោះបាត់បង់ជីវិតដោយសារតែខ្យល់គ និងគាំងបេះដូង ។
បច្ចុប្បន្ន សពត្រូវយកទៅតម្កល់ទុកដើម្បីធ្វើបុណ្យនៅវត្តសំបូរមាស ៕
ដោយ៖ ស រស្មី
