ខេត្តស្វាយរៀង៖ បុរសម្នាក់ត្រូវបានសមត្ថកិច្ចនគបាលឃាត់ខ្លួនបន្ទាប់ពីប្រើអំពើរហិង្សាយកពូថៅកាប់ទៅលើជនរងគ្រោះ ព្រោះតែរឿងទំនាស់ពាក្យសំដី ។
កាលពីវេលាម៉ោង១០និង៣០នាទីព្រឹក ថ្ងៃទី៥ ខែវិច្ឆិកា ឆ្នាំ២០១៥ ស្ថិតក្នុង ភូមិអង្គប្រស្រែ ឃុំអង្គប្រស្រែ ស្រុករមាសហែក ខេត្តស្វាយរៀង ។ សមត្ថកិច្ចនគរបាលស្រុករមាសហែកបានអោយដឹងថា ជនសង្ស័យមានឈ្មោះ ប៉ែន គន្ធា អាយុ២៣ឆ្នាំមានទីលំនៅក្នុងភូមិឃុំកើតហេតុខាងលើ ។
រីឯជនរងគ្រោះមានឈ្មោះ ម៉ុន ចាន់ អាយុ២២ឆ្នាំ មានទីលំនៅភូមិ ឃុំ ជាមួយគ្នាដោយរងរបួសត្រូវក្បាលចំនួន៣ពូថៅរងរបួសធ្ងន់សន្លប់នឹងកន្លែងតែម្ដង ។
តាមចម្លើយសាភាពរបស់ជនសង្ស័យឈ្មោះប៉ែន គន្ធា បានអោយដឹងថា មូលហេតុគឺដោយសារខឹងជនរងគ្រោះនិយាយឌឹដងពាក្យសំដីដាក់រូបគេខ្លាំងពេក ទើបទ្រាំមិនបានក៏រត់ទៅទាញពូថៅកាប់តែម្ដង។
ក្រោយកើតហេតុប្រជាពលរដ្ឋ ក៏បានរាយការណ៍មកសមត្ថកិច្ចនគរបាលប៉ុស្តិ៍រដ្ឋបាលមកអន្តរាគមន៍ និងឃាត់ខ្លួនជនសង្ស័យបានភ្លាមៗបញ្ជូនមកអធិការដ្ឋាននគបាលស្រុករមាសហែកដើម្បីសាកសួរ ។ រីឯជនរងគ្រោះត្រូវបានបញ្ជូនមកកាន់មណ្ឌលសុខភាពអង្គប្រស្រែដើម្បីព្យាបាលមុខរបួសផងដែរ។
បច្ចុបន្ន ជនសង្ស័យត្រូវបានសមត្ថកិច្ចនគរបាលស្រុកកសាងសំណុំរឿងបញ្ជូនមកស្នងការដ្ឋាននគបាលខេត្តស្វាយរៀងចាត់ការតាមច្បាប់ ៕
ដោយ៖ យឹម សុថាន
