ខេត្តបាត់ដំបង៖ សមត្ថកិច្ចនគរបាលបង្ការ និងបង្ក្រាបល្បែងស៊ីសង នៃស្នងការនគរបាលខេត្ត បានចុះបង្ក្រាបវង់អាប៉ោង២កន្លែង ក្នុង២ស្រុកផ្សេងគ្នា កាលពីល្ងាថ្ងៃទី៥ ខែវិច្ឆិកា ឆ្នាំ២០១៥ នៅចំណុចភូមិអូរ ឃុំពេជ្រចិន្តា ស្រុកភ្នំព្រឹក និងនៅចំណុចភូមិតាគ្រក់ ឃុំត្រែង ស្រុករតនៈមណ្ឌល ដោយឃាត់ខ្លួនអ្នកញៀនល្បែងបាន ១២នាក់ និងវត្ថុតាងនាំយកមកអប់រំ ធ្វើកិច្ចសន្យាឲ្យត្រឡប់ទៅផ្ទះវិញ។
ប្រភពព័ត៌មានពីនគរបាលបានឲ្យដឹងថា ដើម្បីអនុវត្តគោលនយោបាយ ភូមិឃុំមានសុវត្ថិភាព នៅក្នុងខេត្ត និងដោយមានការណែនាំ ពីលោកឧត្តមសេនីយ៍ ស ថេត ស្នងការនគរបាលខេត្ត ការិយាល័យជំនាញ បាននាំកម្លាំងចុះបង្ក្រាបទីតាំង ល្បែងស៊ីសង(អាប៉ោង)២កន្លែងមាន៖ ទី១ កាលពីវេលាម៉ោង១៥និង៣០នាទី ថ្ងៃទី៥ ខែវិច្ឆិកា ឆ្នាំ២០១៥ នៅចំណុចភូមិតាគ្រក់ ឃុំត្រែង ស្រុករតនមណ្ឌល កម្លាំងបានឃាត់ខ្លួន អ្នកញៀនល្បែងបានចំនួន៥នាក់ និងវត្ថុតាងមួយចំនួន និងទី២ កាលពីវេលាម៉ោង១៧និង០០នាទី ល្ងាចថ្ងៃទី៥ ខែវិច្ឆិកា ឆ្នាំ២០១៥ នៅចំណុចភូមិអូរ ឃុំពេជ្រចិន្តា ស្រុកភ្នំព្រឹក កម្លាំងយើងបានឃាត់ខ្លួនអ្នកញៀនល្បែង បានចំនួន៧នាក់ និងរឹបអូសវត្ថុតាងបានមួយចំនួន នាំយកមកការិយាល័យជំនាញ នៃស្នងការខេត្តដើម្បីសាកសួរ។
បន្ទាប់ពីបានបញ្ជូនខ្លួន ក្រុមអ្នកញៀនល្បែងអាប៉ោងទាំង២កន្លែង ចំនួន១២នាក់ មកដល់ស្នងការខេត្តហើយ សមត្ថកិច្ចនគរបាលបានអប់រំ ធ្វើកិច្ចសន្យា និងមានអ្នកធានាបញ្ឈប់ មិនឲ្យលេងល្បែងបន្តទៀត។ ក្រោយពីធ្វើការអប់រំហើយ សមត្ថកិច្ចបានធ្វើការដោះលែង ឲ្យត្រឡប់ទៅផ្ទះរៀងៗវិញ៕
ដោយ៖ វិបុល
