ខេត្តកណ្តាល៖ ជនសង្ស័យម្នាក់ត្រូវបានសមត្ថកិច្ចនគរបាលស្រុកពញាឮ សហការជាមួយនគរបាលខណ្ឌព្រែកព្នៅឃាត់ខ្លួន បន្ទាប់ពីរូបគេបានធ្វើសកម្មភាពលួចម៉ូតូរបស់គេ កាលពីវេលាម៉ោង៩ ព្រឹក ថ្ងៃទី៥ ខែវិច្ឆិកា ឆ្នាំ២០១៥ នៅចំណុចផ្សារព្រែកក្ដាម ស្ថិតក្នុងភូមិព្រែកក្ដាម1 ឃុំកោះចិន ស្រុកពញាឭ ខេត្តកណ្ដាល។
ប្រភពព័ត៌មានពីនគរបាលបានឲ្យដឹងថា ជនសង្ស័យដែលត្រូវបានឃាត់ខ្លួន ឈ្មោះ ជុំ សុផល ភេទប្រុស អាយុ៤០ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅក្រុម២១ សង្កាត់ស្រះចក ខណ្ឌដូនពេញ រាជធានីភ្នំពេញ។ ចំណែកជនរងគ្រោះជាម្ចាស់ម៉ូតូឈ្មោះហាក់ សុខា ភេទស្រី អាយុ៤១ឆ្នាំជនជាតិខ្មែរមុខរបរជាងទង មានទីលំនៅភូមិកោះចិន ឃុំកោះចិន ស្រុកពញាឮខេត្តកណ្តាល។ ដោយឡែកម៉ូតូដែលត្រូវជនសង្ស័យប៉ុនប៉ងលួចយកទៅនោះ ម៉ាក YAMAHA EXCITER ពណ៌ ស លាយខ្មៅ ផលិតឆ្នាំ២០០៩ពាក់ផ្លាកលេខ កណ្ដាល1H-6811។
ប្រភពដដែលបានបន្ដឲ្យដឹងថា មុនពេលកើតហេតុ ជនរងគ្រោះបានជិះម៉ូតូខាងលើ មកផ្សារព្រែកក្ដាមដើម្បីទៅទិញម្ហូបដោយបានទុកម៉ូតូនៅកន្លែងកើតហេតុខាងលើ។ ពេលនោះជនល្មើសបានបានជិះម៉ូតូសង់កូរ៉េមួយគ្រឿងពណ៌ក្រហម គ្មានស្លាកលេខ មកឈប់នៅក្បែរម៉ូតូរបស់ជនរងគ្រោះ ហើយបានធ្វើសកម្មភាពលួចយកម៉ូតូរបស់ជនរងគ្រោះ ដោយបន្សល់ទុកម៉ូតូរបស់គេនៅទីនោះ។ ក្រោយពីបានលួចយកម៉ូតូនោះបានហើយ ជនសង្ស័យបានជិះម៉ូតូនោះ ហើយគេចខ្លួនតាមផ្លូវជាតិលេខ៥សំដៅទៅភ្នំពេញ។ ភ្លាមនោះកម្លាំងជំនាញសហការជាមួយកម្លាំងអន្តរាគមន៍ខណ្ឌព្រែកព្នៅ តាមឃាត់ខ្លួនជនល្មើស រួមទាំងម៉ូតូ១គ្រឿង បញ្ជូនមកអធិការនគរបាលស្រុកពញាឮ។
បច្ចុប្បន្នសមត្ថកិច្ចកំពុងកសាងសំណុំរឿង បញ្ជូនជនសង្ស័យទៅកាន់កាន់តុលាការ ដើម្បីចាត់ការបន្ដតាមនីតិវិធី៕
ដោយ៖ វិបុល
