ភ្នំពេញ៖ បុរសម្នាក់និងរថយន្តមួយគ្រឿងត្រូវកម្លាំងព្រហ្មទណ្ឌខណ្ឌ៧មករាសហការជាមួយសមត្ថកិច្ចប៉ុស្តិ៍បឹងព្រលិតដេញតាមស្ទាក់រថយន្តចាប់និងឃាត់ខ្លួនបានភ្លាមៗតែម្តង ខណៈបុរសម្នាក់កំពុងបើករថយន្តរបស់ថៅកែបម្រុងយកទៅបញ្ចាំយកលុយលេងល្បែងបន្ទាប់ពីបុរសម្នាក់នេះបានយករថយន្ត១គ្រឿងដែលជារបស់ថៅកែជាយមន្ត្រីគយទៅបញ្ចាំលេងល្បែងចាញ់អស់ ។
ហេតុការណ៍ដេញតាមស្ទាក់និងចាប់ឃាត់ខ្លួនបុរសខាងលើនេះ កាលពីវេលាម៉ោង៩ និង១០នាទីយប់ថ្ងៃទី០៦ វិច្ឆិកា ឆ្នាំ២០១៥ នៅចំណុចផ្លូវលេខ១០៥ ស្ថិតក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ ។
ជនសង្ស័យដែលសមត្ថកិច្ចឃាត់ខ្លួនមានឈ្មោះ សេង ប៊ុនធី ភេទប្រុស អាយុ៣៤ឆ្នាំ មុខរបរជាអ្នកបើកបររថយន្តឲ្យមន្ត្រីគយម្នាក់ ស្នាក់នៅក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ។ ចំណែកម្ចាស់រថយន្តដែលជាមន្ត្រីគយមានឈ្មោះ ញឹម សុខណា ភេទប្រុស អាយុ៥១ឆ្នាំ រស់នៅវិឡាលេខ៤១១ ផ្លូវលេខ២០៤ សង្កាត់ទំនប់ទឹក ខណ្ឌចំការមន រាជធានីភ្នំពេញ ។
បើតាមប្រភពព័ត៍មានពីសមត្ថកិច្ចបានឲ្យដឹងថា កាលពីរសៀរម៉ោង២ថ្ងៃទី០៦ ខែវិច្ឆិកា ឆ្នាំ២០១៥ ក្រោយពីដឹងថាជនសង្ស័យខាងលើបានយករថយន្តរបស់គាត់យកទៅបញ្ចាំហើយមន្ត្រីគយដែលជាថៅកែបានដាក់ពាក្យបណ្ដឹងនៅការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ ។ថាជនសង្ស័យជាអ្នកបើកបររថយន្តឲ្យគាត់បានយករថយន្តរបស់គាត់ម៉ាកកូរ៉ូឡា សេរីឆ្នាំ២០០៨ ពណ៌ខ្មៅ ពាក់ស្លាកលេខ ភ្នំពេញ 2K-2627 យកទៅបាត់ហើយ បន្ទាប់មកក៏មកយករថយន្តម៉ាកស៊ីុណា សេរីឆ្នាំ២០១១ ពណ៌ស ពាក់ស្លាកលេខ ភ្នំពេញ 2AI-0270 យកទៅទៀត ក្រោយពីដឹងថាជនសង្ស័យបានយករថយន្ដរបស់គាត់មួយគ្រឿងទៀត គាត់ក៏បានទៅដាក់ពាក្យបណ្ដឹងនៅការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ បើឃើញរថយន្តខាងលើដែលជនរងគ្រោះបានដាក់ពាក្យបណ្ដឹងនោះជួយស្ទាក់និងចាប់ឲ្យផង ។
បន្ទាប់ពីបានទទួលបណ្ដឹងពីជនរងគ្រោះសមត្ថកិច្ចក៏បានធ្វើការប្រកាសតាមវិទ្យុទាក់ទងឲ្យតាមបណ្ដាសមត្ថកិច្ចគ្រប់ខណ្ឌទាំង១២នៅក្នុងរាជធានីភ្នំពេញឱ្យតាមរកមើលតាមផ្លូវ បើបានឃើញរថយន្តដូចខាងលើ ត្រូវធ្វើការស្ទាក់ចាប់និងយកមកធ្វើការសាកសួរសិន ។ រហូតដល់ម៉ោងប្រមាណជា៩យប់ថ្ងៃដដែល កម្លាំងព្រហ្មទណ្ឌខណ្ធ៧មករាសហការជាមួយ សមត្ថកិច្ចប៉ុស្តិ៍បឹងព្រលិតក៏បានប្រទះឃើញរថយន្តម៉ាកស៊ីណាខាងលើ ក៏ដេញស្ទាក់ចាប់និងឃាត់ខ្លួនជនសង្ស័យបានតែម្តង ។
ក្រោយពីសមត្ថកិច្ចឃាត់ខ្លួនជនសង្ស័យខាងលើយកមកសាកសួរហើយនោះ ជនសង្ស័យបានសារភាពថា រូបខ្លួនពិតជាបានយករថយន្តម៉ាកកូរ៉ូឡា១គ្រឿងរបស់ថៅកែដែលជាមន្រ្តីគយ យកទៅបញ្ចាំបាន៨៥០០ដុល្លា ហើយយកទៅលេងល្បែងចាញ់អស់ហើយ បន្ទាប់មកជនសង្ស័យក៏បានទៅយករថយន្តមួយគ្រឿងទៀតម៉ាកស៊ីណានៅក្នុងផ្ទះថៅកែដែលជាមន្ត្រីគយដែលរថយន្តនោះមានតម្លៃប្រមាណជាង១០ម៉ឺនដុល្លារបម្រុងយកទៅបញ្ចាំយកលុយទៅលេងល្បែងដើម្បីស្រង់ដើមវិញ តែមិនទាន់បានយកទៅបញ្ចាំផងក៏ត្រូវកម្លាំងព្រហ្មទណ្ឌខណ្ឌ៧មករាសហការជាមួយសមត្ថកិច្ចឃើញដេញស្ទាក់ចាប់បានតែម្តង ។
ក្រោយពីសមត្ថកិច្ចប៉ុស្តិ៍បឹងព្រលិតធ្វើការសាកសួរបានមួយជំហានហើយនោះ សមត្ថកិច្ចក៏បញ្ជូនជនសង្ស័យនិងរថយន្តទៅប៉ុស្តិ៍នគរបាលទំនប់ទឹក ខណ្ឌចំការមន ដើម្បីធ្វើការសាកសួរបន្ត និងកសាងសំណុំរឿងចាត់ការតាមនីតិវិធីច្បាប់ ៕
...
ដោយ៖ ស រស្មី
