ខេត្តកំពត៖ នៅព្រឹកថ្ងៃទី៧ ខែកក្កដា ឆ្នាំ២០១៥ លោកវរសេនីយ៍ត្រី ឃាម វិចិត្រ នាយរងការិយាល័យ តំណាងឲ្យលោកវរសេនីយ៍ឯក ទូច គង្គា នាយការិយាល័យព័ត៌មាននិងសន្តិសុខ សេនាធិការដ្ឋាន កងរាជអាវុធហត្ថលើផ្ទៃប្រទេស បានដឹកនាំប្រតិភូនាយអាវុធហត្ថ នាំយកថវិកាពីបញ្ជាការដ្ឋានកងរាជអាវុធហត្ថលើផ្ទៃប្រទេស ទៅប្រគល់ជូនគ្រួសារសពមន្ត្រីកងរាជអាវុធហត្ថដែលបានទទួលមរណភាពដោយសារឧប្បត្តិហេតុគ្រោះថ្នាក់ចរាចរណ៍ ពេលកំពុងបំពេញភារកិច្ច កាលពីវេលាម៉ោង៤ព្រឹកថ្ងៃទី៤ ខែកក្កដា ឆ្នាំ២០១៥កន្លងទៅ នៅលើកំណាត់ផ្លូវជាតិលេខ៥ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
លោកវរសេនីយ៍ត្រី ឃាម វិចិត្រ នាយរងការិយាល័យព័ត៌មាននិងសន្តិសុខ បានឲ្យដឹងថា ក្នុងនាមរូបលោក ក៏ដូចជាថ្នាក់ដឹកនាំគ្រប់ជាន់ថ្នាក់នៃបញ្ជាការដ្ឋានកងរាជអាវុធហត្ថលើផ្ទៃប្រទេស បានសម្តែងការសោកស្តាយចំពោះវីរភាពលោក អែម វែ ដែលបានលះបង់កម្លាំងកាយចិត្ត ពេលវេលា ប្រកបដោយការទទួលខុសត្រូវ គោរពតាមភារកិច្ច តួនាទីចូលរួមបម្រើជាតិ មាតុភូមិ និងការពារសន្តិសុខ សណ្តាប់ធ្នាប់ជូនប្រជាពលរដ្ឋ ។ លោកឃាម វិចិត្របន្តថា ថ្នាក់ដឹកនាំក៏បានថ្លែងអំណរគុណដ៏ជ្រាលជ្រៅចំពោះឪពុកម្តាយ ភរិយា សពលោកអែម វែ ដែលបានផ្តល់ពេលវេលាគ្រប់គ្រាន់ ដល់កូន-ប្តី បានទៅបំពេញការងារជូនជាតិមាតុភូមិ និងបម្រើឲ្យប្រជាពលរដ្ឋ ។
លោកស្រី យន់ ស្រីណែត ដែលត្រូវជាភរិយាសពលោកអែម វែ រស់នៅភូមិតាទែន ឃុំសំរោងក្រោម ស្រុកបន្ទាយមាស ខេត្តកំពត ព្រមទាំងឪពុកម្តាយផងដែរបានថ្លែងអំណរគុណចំពោះប្រតិភូនាយអាវុធហត្ថដែលបានចុះមកដល់លំនៅឋាន និងបានជួយឧបត្ថម្ភជាថវិកា ដោយពួកគាត់យល់ឃើញថា ថ្នាក់ដឹកនាំអាវុធហត្ថពិតជាបានយកចិត្តទុកដាក់មកលើក្រុមគ្រួសាររបស់គាត់ និងជូនពរឲ្យថ្នាក់ដឹកនាំទាំងអស់ទទួលបានសេចក្តីសុខចម្រើន សុភមង្គលគ្រប់ពេលវេលា ៕
