ខេត្តព្រៃវែង៖ នៅទីបញ្ជាការកងរាជអាវុធហត្ថខេត្តព្រៃវែង នាព្រឹកថ្ងៃចន្ទ ៩រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៩ ខែមេសា ឆ្នាំ២០១៨ រៀបចំពិធីប្រជុំត្រួតពិនិត្យ ការអនុវត្ត តួនាទី ភារកិច្ច ការងារកងរាជអាវុធហត្ថត្រីមាសទី១ និងទិសដៅត្រីមាសទី២ ឆ្នាំ២០១៨ និងប្រកាសផ្លាស់ប្តូរមុខងារ បំពាក់ឋានន្តរស័ក្តិ ជូននាយ នាយរង អាវុធហត្ថទូទាំងខេត្តចំនួន៨០រូប ក្រោមអធិបតីភាព លោកឧត្តមសេនីយ៍ត្រី ឈួន គឹមសាន មេបញ្ជាការកងរាជអាវុធហត្ថខេត្តព្រៃវែង ។
លោកឧត្តមសេនីយ៍ត្រី ឈួន គឹមសានមេបញ្ជាការកងរាជអាវុធហត្ថខេត្តព្រៃវែងបានមានប្រសាសន៍លើកឡើងអំពីកិច្ចខិតខំប្រឹងប្រែងរបស់នាយ នាយរង ក៏ដូចជាពលកងរាជអាវុធហត្ថ ដែលបានលះបង់កម្លាំងកាយចិត្ត គំនិតស្មារតី ប្រកបដោយការទទួលខុសត្រូវខ្ពស់ តាមភារកិច្ច និងតួនាទី នៅតាមបណ្តាថ្នាក់ស្រុក ក៏ដូចជានៅក្នុងបញ្ជាការដ្ឋានកងរាជអាវុធហត្ថខេត្តទាំងមូល ។
ក្នុងនោះ ជាលទ្ធផល កម្លាំងកងរាជអាវុធហត្ថរបស់យើងបានដើរតួនាទីយ៉ាងសំខាន់ក្នុងការរក្សាសន្តិសុខជាតិ សុវត្ថិភាព សន្តិសុខសង្គម ជូនប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាល ។ នាពេលថ្មីៗខាងមុខនេះ នៅខេត្តព្រៃវែងនឹងរៀបចំពិធីសង្ក្រាន្តព្រៃវែង ដែលជាបុណ្យចូលឆ្នាំថ្មីប្រពៃណីជាតិរបស់យើង ចាំបាច់កម្លាំងកងរាជអាវុធហត្ថ ក៏ត្រូវបានសហការជាមួយសមត្ថកិច្ចអាជ្ញាធរ ដើម្បីការពារសន្តិសុខ សណ្តាប់ធ្នាប់ ទប់ស្កាត់រាល់បទល្មើសផ្សេងៗ ដើម្បីធានាឲ្យបាន នូវសន្តិសុខជូនប្រជាពលរដ្ឋ ឲ្យគាត់មានឱកាសបានចូលរួមរីករាយសប្បាយ ទទួលទេវតាឆ្នាំថ្មី ក៏ដូចជា ការចូលរួមសប្បាយ បែបប្រពៃណីរបស់ជាតិគ្រប់ទីកន្លែង ៕ សុខ ខេមរា
