ភ្នំពេញ៖ ស្ត្រីម្នាក់ដែលរួមដំណើរក្នុងរថយន្តហើយត្រូវភ្លើងឆេះខ្លួនប្រាណស្លាប់ភ្លាមៗនៅក្នុងរថយន្តនោះត្រូវបានស្គាល់អត្តសញ្ញាណហើយ ក្រោយហេតុការណ៍រថយន្ត២គ្រឿងបានដេញបុកគ្នាបណ្ដាលឲ្យជ្រុលចង្កូតទៅបុកផ្ទះលក់សាំង និងហ្គាស កាលពីវេលាម៉ោង១២និង៥០នាទី រំលងអាធ្រាត្រ ឈានចូលថ្ងៃទី០៨ ខែវិច្ឆិកា ឆ្នាំ២០១៥ នៅចំណុចម្តុំក្បែរស្ថានីយ៍សាំងសូគីមិច ក្រុមទី៨ ភូមិមិត្តភាព សង្កាត់ប្ញស្សីកែវ ខណ្ឌប្ញស្សីកែវ ។
សពស្ត្រីរងគ្រោះឈ្មោះអេន ណា អាយុ២៤ឆ្នាំ ស្នាក់នៅសង្កាត់បឹងកក់ទី២ ខណ្ឌទួលគោក ជាអ្នករួមដំណើរក្នុងរថយន្តម៉ាកកាមរីស៊េរីឆ្នាំ២០០៧ ពាក់ស្លាកលេខ៖ 2W-2627 ចំណែកឯសពត្រូវបានគេយកទៅតម្កល់ទុកនៅវត្តទឹកថ្លា ខណ្ឌឫស្សីកែវ ។
តាមប្រភពពីប្រជាពលរដ្ឋដែលបានឃើញហេតុការណ៍នេះ បានឲ្យដឹងថា នៅមុនពេលកើតហេតុ គេឃើញរថយន្តពីរគ្រឿងបានបើកដេញបុកគ្នានោះមួយគ្រឿងម៉ាកឆ្លាម ពាក់ស្លាកលេខ៖ 2D-8072 និងមួយគ្រឿងម៉ាក កាមរី០៧, ហើយស្ត្រីដែលស្លាប់នៅក្នុងរថយន្តនោះគឺជាអ្នករួមដំណើរជិះក្នុងរថយន្តកាមរី០៧ ពាក់ស្លាកលេខ៖ 2W-2627 ចំណែកបុរសជាអ្នកបើកបានរត់ចេញពីកន្លែងកើតហេតុបាត់ស្រមោលតែម្តង ។
បើតាមប្រភពពីសមត្ថកិច្ចមូលដ្ឋាន បានឲ្យដឹងថា នៅមុនពេលកើតហេតុ គឺរថយន្តទាំងពីរគ្រឿង នេះបានបើកប្រដេញបុកគ្នា បន្ទាប់មក ក៍ជ្រុលចង្កូតទៅបុកហាងយីហោ ២៥០០រៀល នឹងបន្តជ្រុលទៅបុកទីតាំងលក់សាំង និងហ្គាស បណ្តាលឲ្យផ្ទុះចេញជាអណ្តាតភ្លើងឆាបឆេះយ៉ាងសន្ធោសន្ធៅ។ ចំណែកផ្ទះលក់សាំងនោះ ត្រូវភ្លើងឆេះខូចខាតទ្រព្យសម្បត្តិជាច្រើន ក្នុងនោះក៍មានម៉ូតូ៣គ្រឿងផងដែរ ។
ក្រោយកើតហេតុរថយន្តទាំង២គ្រឿងនោះត្រូវបាននគរបាលជំនាញស្ទួចយកទៅរក្សាទុកនៅការិយាល័យនគរបាលចរាចរជើងគោករាជធានីភ្នំពេញចាត់ការតាមច្បាប់ ហើយរហូតមកដល់ពេលនេះ គេនៅមិនទាន់ដឹងថា តើសមត្ថកិច្ចបានរកឃើញជនសង្ស័យដែលបើករថយន្តបង្កដែលបណ្តាលឲ្យស្រ្តីរងគ្រោះស្លាប់នៅឡើយទេ ខណៈដែលស្លាកលេខរថយន្ត ត្រូវសមត្ថកិច្ចក្តាប់ជុំរួចអស់ហើយនោះ ៕
ដោយ៖ ស ដារ៉ា
