ភ្នំពេញ៖ កីឡាករ អាំង សំអាត មកពីក្លិបតាព្រហ្មមានជ័យបាន ប្រកួតឈ្នះអ្នកប្រដាល់ថៃឈ្មោះ ព្យ៉ា ណយ ដោយពិន្ទុ ខណៈដែលកីឡាករ ឯម សារ៉ាក់មកពីក្លិបប្ញទ្ធីពោធិសែនជ័យ បានប្រើស្នៀតជើង ទាត់ឲ្យ កីឡាករ គឿន សុខហេងសន្លប់ក្នុងទឹកទី២កាលពីល្ងាចថ្ងៃទី៧ខែវិច្ឆិកា។ រីឯកីឡាករ ហ៊ុន គីរី មកពីក្លិប តាព្រហ្មមានជ័យសងសឹកកីឡាករ មាស ឆូយ មកពីក្លិបសុភានូមានជ័យបាន សម្រេចកាល ពីយប់ ថ្ងៃអាទិត្យ ទី៨ ខែវិច្ឆិកាឆ្នាំ២០១៥នៅលើសង្វៀនទូរទស្សន៍ប៉ុស្តិ៍លេខ៥អារីណា ។
សកម្មភាពប្រកួតរវាងកីឡាករ អាំង សំអាតនឹង កីឡាករថៃ ព្យ៉ាណយ មានសភាពស្វិតស្វាញ តាំងពីវិនាទីដំបូងហើយ អាំង សំអាត ក៏ទទួលរងការឈឺសាច់ ដោយថ្វីដៃ កីឡាករ ព្យ៉ាណយ មិនតិចដែរ ប៉ុន្តែជាលទ្ធផលកាត់សេចក្តីគណៈកម្មការចៅក្រម៥រូបបានសម្រេចឲ្យ អាំង សំអាត ឈ្នះព្យ៉ា ណយដោយពិន្ទុ។
ចំណែកឯ កីឡាករ ឯម សារ៉ាក់បានប្រើពេលត្រឹមតែទឹកទី២ប៉ុណ្ណោះ ដោយការទាត់ផ្កាប់ចានត្រូវចំកញ្ចឹងករបស់កីឡាគឿន សុខហេងឲ្យសន្លប់ភ្លាមៗក្នុងទឹកទី២។ ដូច្នេះសារ៉ាក់ នឹងត្រូវទទួលបានប្រាក់ឧបត្ថម្ភលើកទឹកចិត្តចំនួន១លានរៀលពីកម្មវិធីស៊ីម៉ងត៍អូដ្ឋ តាមរយៈការប្រើស្នៀតពិសេស ផ្ដួលដៃគូឲ្យសន្លប់។
កីឡាករសៅ ប៊ុនធឿន មកពីក្លិបតាព្រហ្មមានជ័យបានវាយឈ្នះ កីឡាករ ប្រាក់ ស៊ីណាត មកពីក្លិបតាឯកដំបងដែកមានប្ញទ្ធីខេត្តព្រៃវែង ដោយពិន្ទុ ខណៈដែលកីឡាករ ព្រឿង សុជាតិ មកពីក្លិបកងពលធំអន្តរាគមន៍លេខ២ វាយ កីឡាករ ផុន សុភា មកពីក្លិបពន្លឺសាមគ្គីខេត្តដំបងឲ្យវង្វេងវង្វាន់រហូតដល់អាជ្ញាកណ្តាលបញ្ឈប់ការប្រកួតក្នុងទឹកទី៤តែម្តង។
ចំណែកឯជំនួបប្រកួតសងសឹករវាងកីឡាករ ហ៊ុន គីរី និងកីឡាករ មាស ឆូយ បានធ្វើឲ្យទស្ស និកជនផ្ទុះសំនើច នៅសកម្មភាពក្រម៉ិចក្រមើម របស់ ហ៊ុន គីរីជាខ្លាំងហើយ នេះគឺជាការប្រកួតលើក ទី៣ របស់ពួកគេដែលកាលពីលើកទី១និងលើកទី២ពួកគេឈ្នះគ្នាម្តងម្នាក់ រីឯជំនួបលើកទី៣នេះ ហ៊ុន គីរីវាយឈ្នះដោយពិន្ទុ។
ចំណែកឯការប្រកួតកួតរបស់កីឡាករ ឡុង ប៊ុនយីម មកពីក្លិបសាលវ័ន្តកីឡានិងកីឡាករ សំណាង សីលា មកពីក្លិបដួងសែនសុខគុនខ្មែរ ត្រូវអាជ្ញាកណ្តាលដេញចុះពីលើរេញ ដោយប្រកួតមិន ប្រក្រតីក្នុងទឹកទី២។ការបណ្ដេញចុះលែងឲ្យប្រកួតក្នុងទឹកទី២ របស់កីឡាករទាំង២នាក់ កើតឡើង ដោយសារ ឡុង ប៊ុនយីម សន្លប់ព្រោះរងនូវស្នៀតជើងទាត់ពីកីឡាករ សំណាង សីលា ចំកញ្ចឹងកតែមិនត្រូវធ្ងន់គួរសន្លប់នោះឡើយ។
បើតាមការអះអាងរបស់គណៈកម្មការឲ្យដឹងថា ឡុង ប៊ុនយីម មានបំណងធ្វើសន្លប់ដោយបើកឲ្យ សីលា ទាត់កញ្ចឹងក ដើម្បីសីលាទទួលបានប្រាក់មួយលានរៀលដែលជារង្វាន់ ពិសេសសម្រាប់ការទាត់ផ្កាប់ចានពីសំណាក់ម្ចាស់កម្មវិធីស៊ីម៉ងត៍អូដ្ឋ។
គណៈកម្មការបានកត់សម្គាល់ទៅលើសកម្មភាព ប្រកួត របស់កីឡាករ ឡុង ប៊ុនយីម ហាក់ ខុសពីប្រក្រតីដោយក្នុងទឹកទី២ ប៊ុនយីមដួល២ដងដោយសារសីលា វាយ ហើយ ត្រូវអាជ្ញាកណ្ដាលរាប់ដល់៨ចំនួន២ដង ហើយចុងក្រោយ ប៊ុនយីមមានចេតនាបើកដៃឲ្យ សំណាង សីលា ទាត់ដោយមិនបានលើកដៃរងនោះទេ ។
បើតាមការអះអាងរបស់លោក មាស សុខគ្រី គ្រូបង្វឹក ក្លិប តាព្រហ្មមានជ័យនិង ជាអ្នកសម្រប សម្រួលក្នុងកម្មវិធីប្រដាល់ប៉ុស្តិ៍លេខ៥ ក៏ដូចជា លោក អេ ភូថង អ្នកអត្ថាធិប្បាយកីឡាប្រដាល់ទូរ ទស្សន៍ប៉ុស្តិ៍លេខ៥សុទ្ធតែបានបញ្ជាក់ដូចគ្នាថា ប្រកួតមិនប្រក្រតី៕
ដោយ៖ សារីម
