ប្រភពព័ត៌មានពីកម្លាំងយោធាយេមែនបានប្រាប់ប្រភពរ៉យទ័រកាលពីថ្ងៃទី៨ ខែវិច្ឆិកា ឆ្នាំ២០១៥ថា យ៉ាងហោចណាស់ទាហានរដ្ឋាភិបាលយេមែន១៦នាក់បានបាត់បង់ជីវិត ដោយសារតែការបំផ្ទុះគ្រាប់បែកនៅតាដងផ្លូវមួយស្ថិតនៅភាគខាងកើតតំបន់ Marib ទីក្រុង Sanaa ។
ប្រភពដដែលបានបន្តថា ការបំផ្ទុះគ្រាប់បែកនេះ ក្រៅពីបណ្តាលឲ្យស្លាប់១៦នាក់ នៅមានទាហាន៦នាក់ផ្សេងទៀតរងរបួសផងដែរ ។ កងកម្លាំងទាហានទាំងនោះមានភារកិច្ចល្បាតនៅជិតជំរំយោធាមួយកន្លែងក្នុងតំបន់ Marib ។ ករណីនេះ ក្រុមស៊ើបអង្កេតនៅមិនទាន់ដឹងឡើយថា តើនគរជាមេខ្លោងនៅពីក្រោយខ្នងនោះ ។
ក្នុងរយៈពេលត្រឹម៧ខែនៃសង្គ្រាមស៊ីវិលក្នុងប្រទេសយេមែននេះ មនុស្សយ៉ាងតិច៥.៦០០នាក់បានបាត់បង់ជីវិត ។ យេមែនជាប្រទេសក្រីក្រលំដាប់អន់ថយជាងគេបំផុតស្ថិតនៅក្នុងឧបទ្វីបអារ៉ាប់ទាំងមូល ។
ជម្លោះបានកើតទៅជាសង្គ្រាមស៊ីវិល រវាងក្រុម Houthis សម្ពន្ធមិត្តរបស់អ៊ីរ៉ង់ ជាមួយកម្លាំងយោធាស្មោះត្រង់អតីតប្រធានាធិបតី Ali Abdullah Saleh ប្រឆាំងនឹងក្រុមប្រដាប់អាវុធដែលគាំទ្ររដ្ឋាភិបាលនិរទ្ទេសខ្លួនរបស់ប្រធានាធិបតី Abd-Rabbu Mansour ព្រមជាមួយកម្លាំងសម្ធន្ធមិត្តអារ៉ាប់ផងដែរ ។
កងកម្លាំងសម្ពន្ធមិត្តដឹកនាំដោយអារ៉ាប៊ីសាអ៊ូឌីតបានដណ្តើមគ្រប់គ្រងដែនដីភាគខាងត្បូង ប្រទេសយេមែននោះ ប៉ុន្តែក្រុមឧទ្ទាម Houthi នៅតែមានសមត្ថភាពគ្រប់គ្រងដែនដីភាគច្រើន បើទោះបីថា ការវាយប្រហារតាមដែនអាកាសបានកើតមានស្ទើរជារៀងរាល់ថ្ងៃយ៉ាងណាក៏ដោយ ៕
ប្រែសម្រួល៖ ថាច់ យ៉ាត
