ខេត្តកណ្តាល៖ បើទោះជាក្រុមហ៊ុនចិនហុង ហ្វុង បានទទួលស្គាល់ពីកំហុសរបស់ខ្លួន ដឹកជញ្ជូនថ្ម ផ្ទុកលើសទម្ងន់បំផ្លាញផ្លូវក្រាលកៅស៊ូ ផ្លូវបេតុង ក្នុងមូលដ្ឋានឃុំស្អាងភ្នំ ស្រុកស្អាង ខេត្តកណ្តាល និងសន្យាជាមួយអាជ្ញាធរស្រុកដើម្បីស្ថាបនាឡើងវិញ ឲ្យដូចបច្ចេកទេសរបស់ផ្លូវបេតុង ផ្លូវក្រាលកៅស៊ូតាមបច្ចេកទេសស្តង់ដាររបស់មន្ទីរសាធារណការក៏ដោយ ក៏មកទល់បច្ចុប្បន្ន ក្រុមហ៊ុនចិនហុង ហ្វុងមិនទាន់ដំណើរការស្ថាបនានៅឡើយទេ។ នេះបើតាមការអះអាងពីប្រជាពលរដ្ឋ អាជ្ញាធរមូលដ្ឋានកាលពីព្រឹកថ្ងៃសៅរ៍ ១៣រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែឧសភា ឆ្នាំ២០១៨ ។
មន្ត្រីមូលដ្ឋានបានបញ្ជាក់ថា ក្រុមហ៊ុនចិន ហុង ហ្វុងមានច្បាប់វិនិយោគលើសិទ្ធិវាយកម្ទេចភ្នំខ្សាក ដែលជាភ្នំបុរាណ ស្ថិតនៅឃុំស្អាងភ្នំ ស្រុកស្អាង ខេត្តកណ្តាលដើម្បីយកថ្មលក់ចែកចាយ ។ ប៉ុន្តែការវិនិយោគរបស់ក្រុមហ៊ុនមួយនេះ មិត្រឹមតែបង្កប៉ះបាល់បរិស្ថានការរស់នៅរបស់ប្រជាពលរដ្ឋប៉ុណ្ណោះទេ ក្នុងនោះប្រជាពលរដ្ឋបានលើកឡើងថា រថ យន្តដឹកថ្ម ផ្ទុកលើសទម្ងន់បណ្តាលឲ្យផ្លូវសាងសង់ពីបេតុង និងផ្លូវក្រាលកៅស៊ូមួយចំនួនក្នុងឃុំខាងលើខូចខាតជាបណ្តើរៗ ដូចជាស្រុតប្រេះស្រាំ គំហុកតូចធំ និងបង្កឲ្យប្រជាពលរដ្ឋធ្វើដំណើរទោចក្រក្រយាន យានយន្ត គ្រោះថ្នាក់ចរាចរណ៍ជាបន្តបន្ទាប់ ។
បញ្ហាទាំងអស់នេះ ប្រជាពលរដ្ឋក៏បានសំណូមពរឲ្យអាជ្ញាធរមានវិធានការជំរុញឲ្យក្រុមហ៊ុនចិនហុងហ្វុងស្ថាបនាឡើងវិញ ក្នុងនោះលោកសរ វិចិត្រ អតីតមេឃុំស្អាងភ្នំ ក៏បានសំណូមពរឲ្យអាជ្ញាធរស្រុករកដំណោះស្រាយជាមួយ នឹងក្រុមហ៊ុនចិនហុងហ្វុង ដើម្បីស្ថាបនាឡើងវិញនូវផ្លូវបេតុង ផ្លូវក្រាលកៅស៊ូ តាំងពីចំណុចក្រុមហ៊ុនវាយកម្ទេចថ្មភ្នំខ្សាក មកដល់ផ្លូវជាតិលេខ២១ B តាមសំណូមពររបស់ប្រជាពលរដ្ឋ ។
ក្រុមហ៊ុនចិនបានទទួលយកនូវដំណោះស្រាយនេះ និងធានាជួសជុលស្ថាបនាឡើងវិញទៅតាមបទដ្ឋានបច្ចេកទេសស្តង់ដា តាមការកសាងដូចអង្គភាពមន្ទីរសាធារណការ និងដឹកជញ្ជូនខេត្តកណ្តាល ប៉ុន្តែជាលទ្ធផល ក្រុមហ៊ុនមួយនេះបានត្រឹមតែធ្វើសកម្មភាពឈូសឆាយ ពង្រាបជាដំណាក់កាលនៅចំណុចទីតាំងដែលខូច ដើម្បីខ្លួនមានឱកាស ដឹកថ្មយកទៅចែកចាយ ក្នុងអាជីវកម្មរបស់ខ្លួនប៉ុណ្ណោះ ។ បញ្ហានេះមិនត្រឹមតែមានប្រតិកម្មពីប្រជាពលរដ្ឋ អាជ្ញាធរ ឃុំប៉ុណ្ណោះទេ សូម្បីតែប្រធានគណៈពង្រឹងឃុំស្អាងភ្នំ មានប្រតិកម្មជុំវិញបញ្ហានេះ ក្នុងនោះបានឲ្យអាជ្ញាធរស្រុក ត្រូវបញ្ជាឲ្យក្រុមហ៊ុនចិនហុងហ្វុងកសាងផ្លូវទាំងនោះឡើយវិញ ទៅតាមកត្តាជាក់ស្តែង ដូចអ្វីដែលក្រុមហ៊ុនបានអះអាង ក៏ដូចជាសន្យាដោយលិខិតស្នាមជាមួយអាជ្ញាធរស្រុក ។
គួររំលឹកថា ក្នុងពេលបើកវេទិកាសាធារណៈនៅទីនោះ និងមានការចូលរួមពីអាជ្ញាធរសមត្ថកិច្ច ក៏ដូចជាជំនាញ ខាងអាជ្ញាធរបានប្រកាសជាសាធារណៈជូនដល់ប្រជាពលរដ្ឋឲ្យបានដឹងអំពីការវិនិយោគរបស់ក្រុមហ៊ុនចិនហុងហ្វុងថា ការវាយកម្ទេចភ្នំខ្សាក ដែលជាភ្នំបុរាណនេះ ដើម្បីយកថ្មទៅស្ថាបនាផ្លូវជាតិជូនប្រជាពលរដ្ឋ ។ ផ្ទុយទៅវិញ ក្រុមហ៊ុនចិនហុងហ្វុងមិនបានធ្វើដូចអ្វីដែលអាជ្ញាធរអះអាងនោះទេ គឺវាយកម្ទេចថ្មភ្នំ ដឹកជញ្ជូនលក់ធ្វើអាជីវកម្មចែកចាយគ្រប់ទីកន្លែង បំផ្លាញផ្លូវបេតុង ផ្លូវក្រាលកៅស៊ូក្នុងមូលដ្ឋានឃុំស្អាងភ្នំយ៉ាងធ្ងន់ធ្ងរ ក្នុងនោះ ក៏គេទទួលស្គាល់ថា ក្រុមហ៊ុនក៏យកលេសដើម្បីធ្វើអាជីវកម្មរ៉ែទៀតផង ។
ជុំវិញករណីនេះ អង្គភាពនគរវត្តមិនអាចទាក់ទងបានទេពីលោកប្រធានមន្ទីររ៉ែ និងថាមពលនៅព្រឹកថ្ងៃសៅរ៍ ១៣រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែឧសភា ឆ្នាំ២០១៨ ដោយគ្មានលេខទូរស័ព្ទ ។
ដោយឡែកលោក ញ៉ឹម វណ្ណឌិន អភិបាលនៃគណៈអភិបាលស្រុកស្អាង មិនបានធ្វើអត្ថាធិប្បាយជុំវិញការបំផ្លាញផ្លូវកៅស៊ូ និងផ្លូវបេតុងនៅឃុំស្អាងភ្នំនោះទេតាមទូរស័ព្ទ ដោយលោកគ្រាន់តែបញ្ជាក់យ៉ាងខ្លីថា «ពេលនេះខ្ញុំកំពុងមានភារកិច្ចជាប់ប្រជុំ» ។ មន្ត្រីមូលដ្ឋាន ក៏ដូចជាប្រជាពលរដ្ឋបានចោទប្រកាន់ថា អ្វីដែលក្រុមហ៊ុនចិនហុងហ្វុងមិនបានស្ថាបនាផ្លូវឡើងវិញ គឺជាអំពើឃុបឃិតគ្នារវាងក្រុមហ៊ុន នឹងអាជ្ញាធរស្រុក ក៏ដូចជាជំនាញពាក់ព័ន្ធ ដូច្នេះប្រជាពលរដ្ឋក្នុងមូលដ្ឋាននឹងបង្ខំចិត្ត ផ្តល់ដំណឹងនេះទៅកាន់លោកប្រាក់ សុខុន ប្រធានគណៈពង្រឹងឃុំស្អាងភ្នំ ដើម្បីមានវិធានការដោះស្រាយ ។
កន្លងទៅ ប្រធានគណៈពង្រឹងឃុំ លោកប្រាក់ សុខុន ក៏បានឲ្យអាជ្ញាធរស្រុកពិភាក្សាឡើងវិញជាមួយក្រុមហ៊ុនខាងលើ ដើម្បីគោរពទៅតាមកិច្ចសន្យារបស់ខ្លួន និងសំណូមពររបស់ប្រជាពលរដ្ឋ តែបើនៅបន្តការបំផ្លាញផ្លូវ និងមិនទទលខុសត្រូវស្ថាបនាឡើងវិញទេ លោកនឹងចាត់ឲ្យមន្ត្រីក្រុមការងាររបស់ខ្លួនចុះទៅពិនិត្យសិក្សាស្រាវជ្រាវជាក់ស្តែងដើម្បីបំពេញតម្រូវការប្រជាពលរដ្ឋ ក៏ដូចជាចូលរួមការអភិវឌ្ឍហេដ្ឋារចនាសម្ព័ន្ធផ្លូវថ្នល់នេះ ដើម្បីជាមធ្យោបាយផ្តល់ភាពងាយស្រួលជូនប្រជាពលរដ្ឋក្នុងការធ្វើដំណើរ ក៏ដូចជាមធ្យោបាយដឹកជញ្ជូនទំនិញ កសិកឧស្សាហកម្ម ផ្លែឈើ បន្លែ ។ល។ ទៅកាន់ទីផ្សារបានដោយស្រួល សម្រាប់ដោះស្រាយជីវភាពរស់នៅរបស់ពួកគាត់ ស្របតាមគោលនយោបាយឈ្នះឈ្នះរបស់រាជរដ្ឋាភិបាល ដែលមានសម្តេចតេជោហ៊ុន សែន ជាប្រមុខដឹកនាំរាជរដ្ឋាភិបាលកម្ពុជាទទួលបានសុខសន្តិភាព ការអភិវឌ្ឍក្នុងក្របខ័ណ្ឌទូទាំងប្រទេសនេះ ៕ ស្អាងជ័យ
