ខេត្ដកោះកុង៖ ថ្មីៗនេះប្រមុខរាជរដ្ឋា ភិបាលកម្ពុជាបានណែនាំឱ្យស្ថាប័នជំនាញ និងអាជ្ញាធរខេត្ដ-រាជធានី ពិនិត្យមើល ការសាងសង់ខុសបច្ចេកទេសរំលោភ លើផ្លូវសាធារណៈជាដើម ។ ប៉ុន្ដែអាជ្ញាធរ ក្រុងខេមរភូមិន្ទហាក់មិនយកចិត្ដទុក ដាក់ចំពោះអនុសាសន៍សម្ដេចតេជោ នោះឡើយ ។
សំណង់ខុសច្បាប់របស់អ្នកមានលុយកំពុងសាងសង់យ៉ាងរឹងមាំ និងទ្រង់ទ្រាយ ធំនៅតាមបណ្ដោយព្រែកកោះប៉ោ ស្ថិត ក្នុងភូមិ២ សង្កាត់ដងទង់ ក្រុងខេមរ ភូមិន្ទ ដោយពុំមានអាជ្ញាធរឬសមត្ថកិច្ច ពាក់ព័ន្ធហាមឃាត់ឬឈឺឆ្អាលនោះទេ ។
ប្រជាពលរដ្ឋនៅក្បែរនោះបាននិយាយថា ព្រែកកោះប៉ោនេះត្រូវបានអាជ្ញាធរ ហាមឃាត់មិនឱ្យមានការសាងសង់ សំណង់អ្វីនោះទេ តែពួកគាត់បែរជា ឃើញឈ្មួញដ៏មានលុយម្នាក់ និងជាថៅ កែប្រមូលទិញគ្រឿងសមុទ្រយកទៅលក់នៅប្រទេសថៃផងនោះសាងសង់សំណង់ជាកំពង់ផែដ៏រឹងមាំ ដោយមិនរំខានដល់ អាជ្ញាធរនិងសមត្ថកិច្ចពាក់ព័ន្ធមកហាមឃាត់ឡើយ្ប គឺពួកគេចុះមកយកលុយ រួចក៏ទៅវិញបាត់ ។
ប្រជាពលរដ្ឋរិះគន់ថា អាជ្ញាធរបាន ត្រឹមតែមានចំណាត់ការលើប្រជាពល រដ្ឋតូចតាចប៉ុណ្ណោះ ដូចជាកន្លងមក ប្រជាពលរដ្ឋដាក់តែសរសរមួយចូល ទៅក្នុងព្រែកនោះអាជ្ញាធរនឹងមកដល់ ភ្លាម ហើយបញ្ជាឱ្យដកចេញមិនឱ្យចាំ យូរឡើយ តែបើអ្នកមានលុយ មាន អំណាច ដូចឈ្មួញខាងលើវិញ គេដាំ បង្គោលធំៗ សាងសង់ជាកំពង់ផែថ្ម តែ អាជ្ញាធរហាក់មើលមិនឃើញហើយ សម្ងំឱ្យឈឹង ។
ចំពោះសំណង់កំពង់ផែថ្មីខុសច្បាប់ នេះ លោក ដួង ប៊ុនធឿន ជាម្ចាស់សំណង់ មួយនេះបានថ្លែងតាមទូរស័ព្ទថា “កំពង់ផែ នេះចង់វាយចោលម៉ោងណាក៏បានដែរ” ។
ចំណែកលោក ហាក់ បូរ៉ា ប្រធាន ការិយាល័យនគររូបនីយ៍កម្មដែនដី និង សំណង់ក្រុងខេមរះភូមិន្ទបានថ្លែងទទួលស្គាល់ថា សំណង់នេះពិតជាសំណង់មិន មានច្បាប់មែន ហើយកន្លងមកខាង លោកក៏បានចេញលិខិតហាមឃាត់ជា ច្រើនលើក ច្រើនសារណាស់មកហើយ តែខាងម្ចាស់សំណង់នៅតែបន្ដ តែលោក គ្រាន់តែជាជំនាញក្នុងការត្រួតពិនិត្យ ប៉ុណ្ណោះ ចំណែកឯចំណាត់ការវិញ គឺទៅ លើខាងអាជ្ញាធរនោះទេ ព្រោះខាងអាជ្ញាធរ គាត់មានកម្លាំងសមត្ថកិច្ចនៅក្នុងដៃ ៕
ដោយ៖ ហេង នរិន្ទ្រ
