ភ្នំពេញ៖ ជនសង្ស័យម្នាក់ត្រូវមា្ចស់ផ្ទះឃាត់ខ្លួនប្រគល់ឱ្យនគរបាលប៉ុស្តិ៍អូរឬស្សីទី៤បន្ទាប់ធ្វើសកម្មភាពចូលលួចយកទ្រព្យសម្បត្តិក្នុងផ្ទះគេហើយត្រូវអ្នកជិតខាងចេញមកឡោមព័ទ្ធចាប់បានស្វាគមន៍ម្នាក់មួយដៃ ម្នាក់មួយជើងទ្រមខ្លួន ។
ហេតុការណ៍នេះកើតឡើងកាលពីវេលាម៉ោង២និង៣០នាទីយប់ថ្ងៃទី១៦ ខែវិច្ឆិកា ឆ្នាំ២០១៥ ស្ថិតតាមបណ្តោយផ្លូវលេខ ១០៩ កែងនិងផ្លូវលេខ១០៧ ក្នុងសង្កាត់ផ្សារអូឫស្សី៤ ខណ្ឌ៧មករា រាជធានីភ្នំពេញ ។ ជនសង្ស័យមានឈ្មោះ ពុត ពីន អាយុ៣០ឆ្នាំ មុខរបរនិងស្នាក់នៅមិនពិតប្រាកដ ។
ប្រភពព័ត៌មានពីម្ចាស់ផ្ទះបានប្រាប់ឱ្យដឹងថា មុនពេលកើតហេតុ គាត់កំពុងដេកលក់នៅក្នុងផ្ទះរបស់គាត់ បន្ទាប់មកស្រាប់តែឭសំឡេងដូចមានមនុស្សលួចចូលមកក្នុងផ្ទះ ដោយម្ចាស់ផ្ទះមានការសង្ស័យគាត់ក៏បានក្រោកមកមើលក៏ស្រាប់តែឃើញជនសង្ស័យម្នាក់កំពុងធ្វើសកម្មភាពរុរឺនិងលួចទ្រព្យសម្បត្តិរបស់គាត់ ។ ភ្លាមៗនោះម្ចាស់ផ្ទះក៏ស្រែកឆោឡើងថាមានចោរចូលផ្ទះៗបង្កឱ្យមានការភ្ញាក់ផ្អើលដល់អ្នកជិតខាងនាំគ្នាចេញមកឡោមព័ទ្ធនិងដេញចាប់បានជនសង្ស័យភ្លាមៗ រួចក៏នាំគ្នាស្វាគមន៍ម្នាក់មួយដៃ ម្នាក់មួយជើងនិងទ្រមខ្លួន ទើបប្រគល់ឱ្យសមត្ថកិច្ច ។
បច្ចុប្បន្នជនសង្ស័យ ត្រូវនគរបាលប៉ុស្តិ៍អូរឬស្សីទី៤ កសាងសំណុំរឿងបញ្ជូនទៅអធិការដ្ឋាននគរបាលខណ្ឌ៧មករា ដើម្បីចាត់ការតាមច្បាប់ ៕
...
ដោយ៖ ស រស្មី
