ខេត្តកំពង់ស្ពឺ៖ នៅថ្ងៃ ៧ ខែវិច្ឆិកា ឆ្នាំ២០១៥ ក្រុមស្ម័គ្រចិត្តណាហ្គាវើលបេះដូងសប្បុរស ដែលដឹកនាំដោយ លោកJames Ma នាយកផ្នែកទំនាក់ទំនងបុគ្គលិកនិងការងារសង្គមណាហ្គាវើល បាននាំយកនូវសម្ភារសិក្សាទៅចែកជួនដល់សិស្សានុសិស្សនៅសាលាបឋមសិក្សារស្មីសាមគ្គីស្ថិតក្នុងស្រុកបរសេដ្ឋ ខេត្តកំពង់ស្ពឺ។
លោក James Maនាយកផ្នែកទំនាក់ទំនងបុគ្គលិក និងការងារសង្គមណាហ្គាវើលបានមានប្រសាសន៍ថា “ក្រុមហ៊ុនណាហ្គាវើលបានផ្តួចផ្តើមបង្កើតកម្មវិធីការងារសង្គមដើម្បីផ្តល់នូវតម្រូវការចាំបាច់ជាមូលដ្ឋានដល់កុមារក្រីក្រនិងកុមារកំព្រាក្នុងវិស័យអប់រំនៅតាមបណ្តាខេត្តតាំងពីដើមឆ្នាំ ២០១៤។ ថ្ងៃនេះយើងបាននាំយកនូវកាបូបស្ពាយសៀវភៅសរសេរ និងប៊ិច ដើម្បីចែកជូនដល់សិស្សានុសិស្សនៅសាលាបឋមសិស្សា រស្មីសាមគ្គី។កុមារកម្ពុជា គឺជាអនាគតនៃប្រទេសកម្ពុជា។ជាមួយនិងការផ្តល់សិទ្ធិអំណាចក្នុងវិស័យការអប់រំ វានឹងជួយប្រទេសដើម្បីអភិវឌ្ឍនិងមានការរីកចំរើនលឿននៅថ្ងៃអនាគត។តាមរយៈការចូលរួមចំណែករបស់យើងយើងសង្ឃឹមថាកុមារនឹងត្រូវបានលើកទឹកចិត្តដើម្បីឲ្យខិតខំប្រឹងប្រែងរៀនសូត្រជាងមុនសម្រាប់អនាគតល្អប្រសើររបស់ខ្លួន និងសម្រាប់ប្រទេសកម្ពុជាផងដែរ”។
លោកបានបន្ថែមទៀតថា “រហូតមកដល់បច្ចុប្បន្ននេះ ណាហ្គាវើលបេះដូងសប្បុរសបានឧបត្ថម្ភសម្ភារៈសិក្សាទៅដល់សាលារៀនជាង ៩០សាលារៀន និងអង្គការមិនមែនរដ្ឋាភិបាលជាង៩។ កុមារកម្ពុជាជាង ៦០.០០០នាក់ នៅតាមបណ្តាខេត្ត និងរាជធានីភ្នំពេញ ដែលបានទទួលផលប្រយោជន៍ពីកម្មវិធី”។
គណៈកម្មការទ្រទ្រង់សាលាមួយរូបដែលបានចូលរួមក្នុងកម្មវិធីចែកសម្ភារសិក្សានេះបានមានប្រសាសន៍ថា “យើងសប្បាយរីករាយណាស់ដែលឃើញបុគ្គលិករបស់ក្រុមហ៊ុនណាហ្គាវើលមកទីនេះដើម្បីជួយកុមាររបស់យើង។ ណាហ្គាវើលបេះដូងសប្បុរសបានមកទស្សនកិច្ច និងបានឧបត្ថម្ភសម្ភារៈសិក្សាចាំបាច់មួយចំនួនដល់កុមារនៅទីនេះជាច្រើនលើកមកហើយ។ តាមរយៈការគាំទ្ររបស់ណាហ្គាវើលបេះដូងសប្បុរសយើងជឿជាក់ថាវានឹងជួយឲ្យកុមារបន្តការសិក្សាបានចប់ចុងចប់ដើម ក្លាយទៅជាឯករាជ្យលើខ្លួនឯងនិងមានភាពគ្រប់គ្រាន់ហើយបន្តវិជ្ជាជីវៈដែលពួកគេចង់បាន។យើងសូមអរគុណយ៉ាងជ្រាលជ្រៅដល់ណាហ្គាវើលបេះដូងសប្បុរសចំពោះសណ្តានចិត្តល្អរបស់ពួកគេដែលបានជួយគាំទ្រកុមាររបស់យើង”។
លោកហែមនៅនាយកសាលាបឋមសិក្សារស្មីសាមគ្គី បានមានប្រសាសន៍ថា “នេះមិនមែនជាលើកទីមួយទេសម្រាប់បុគ្គលិកក្រុមហ៊ុនណាហ្គាវើលដែលបានមកទស្សនៈកិច្ចនិងបានឧបត្ថម្ភសម្ភារសិក្សាជាច្រើនដល់សាលា និងកុមាររបស់យើង សម្ភារសិក្សាទាំងនោះមានដូចជា កាបូបដាក់សៀវភៅ សៀវភៅសរសេរ ប៊ិចសរសេរ កូនកាតាបដាក់ខ្មៅដៃប៊ិច សៀវភៅរឿង សៀវភៅសម្រាប់ប័ណ្ណាល័យ សម្ភារកីឡា និងក្តារខៀនជាដើម។
បន្ថែមពីលើនេះទៀត ណាហ្គាវើលបេះដូងសប្បុរសបានចូលរួមចំណែកជាមួយសហគមន៍ដើម្បីកសាងសាលារៀនមួយខ្នងសម្រាប់សិស្សានុសិស្សរបស់យើង។ សិស្សានុសិស្សមួយចំនួនមិនអាចចូលរៀនបានទៀងទាត់ ដោយសារតែមានបញ្ហាផ្នែកហិរញ្ញវត្ថុនៅក្នុងគ្រួសារ ហើយសិស្សមួយចំនួនទៀតបានបោះបង់ការសិក្សា ដោយសារពួកគេខ្វះនូវសម្ភារសិក្សា។ ដោយសារមានការឧបត្ថម្ភសម្ភារសិក្សាពីក្រុមហ៊ុនណាហ្គាវើល ចំនួនសិស្សានុសិស្សចូលរៀនមានការកើនឡើង។ យើងសូមអរគុណដល់បុគ្គលិកក្រុមហ៊ុនណាហ្គាវើលសម្រាប់កិច្ចខិតខំប្រឹងប្រែងរបស់ពួកគេដើម្បីជួយដល់សាលារៀនរបស់យើង”៕
ដោយ៖ ស ដារ៉ា
