ខេត្តកណ្តាល៖ សង្ស័យឪពុកម្តាយមានការធ្វេសប្រហែសពេក ទើបបណ្តោយឲ្យកូនអាយុ២ឆ្នាំ កំពុងពេញរពិស ត្រូវឡានកិនបែកក្បាលស្លាប់កាលពីវេលាម៉ោង៦ព្រឹក ថ្ងៃពុធ ១៤រោច ខែបមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១១ ខែកក្កដា ឆ្នាំ២០១៨ នៅចំណុចផ្លូវលំគ្រោះក្រហម ស្ថិតក្នុងភូមិទួលស្ពឺ ឃុំតាលន់ ស្រុកស្អាង ខេត្តកណ្តាល ។
សមត្ថកិច្ចថា រថយន្តម៉ាក ហុីយ៉ាន់ដាយ ពណ៌ស ពាក់ផ្លាកលេខភ្នំពេញ2z – 6298 អ្នកបើកបរឈ្មោះគង់ ឡុងភេទប្រុស អាយុ៦២ឆ្នាំ មានទីលំបច្ចុប្បន្នភូមិតាលន់ ឃុំតាលន់ ស្រុកស្អាង ខេត្តកណ្តាល បានបើកបរពីទិសខាងជើង ទៅទិសខាងត្បូង មានដឹកដីខ្សាច់ លុះមកដល់ចំណុចកើតហេតុខាងលើ រថយន្តក៏បានឈប់នៅមុខផ្ទះឈ្មោះចាន់ សុផាតភេទស្រី អាយុ៣០ឆ្នាំ ជាអ្នកលក់ចាប់ហួយ ដើម្បីទិញស្រាប៊ៀរ១កំប៉ុង ពេលនោះ ឈ្មោះចាន់ សុផាត ជាអ្នកលក់ ក៏បានយកស្រាប៊ៀរ ទៅឲ្យឈ្មោះគង់ ឡុង ដែលអង្គុយនៅក្នុងរថយន្ត ស្រាប់ពេលនោះកុមាររងគ្រោះឈ្មោះ តុង ចាន់មុន្នីសត្យា ភេទប្រុស អាយុ 2ឆ្នាំ ត្រូវជាកូន បានដើរតាមពីក្រោយមក ចូលអង្គុយក្រោមរថយន្ត ដោយម្តាយ និងអ្នកបើកបរ មិនបានដឹងឡើយ លុះពេលរថយន្តចេញដំណើរ ក៏បានកិនកុមាររងគ្រោះបែកក្បាលស្លាប់ភ្លាមៗនៅនឹងកន្លែងកើតហេតុ ។
ក្រោយពេលកើតហេតុអ្នកបើកបរ បានរត់គេចខ្លួនបាត់ ។ កម្លាំងនគរបាលប៉ុស្តិ៍តាលន់ និងផ្នែកចរាចរណ៏ស្រុកស្អាង បានចុះពិនិត្យវាស់វែង និងយករថយន្តមករក្សាទុក រងចាំដោះស្រាយតាមនីតិវិធី ៕
