ភ្នំពេញ៖ តារាជួរមុខប្រចាំព្រះរាជាណាចក្រ ថៃកញ្ញា Bella Ranee ទទួលបានការស្វាគមន៍យ៉ាងច្រើនពីអ្នកគាំទ្រក្នុងព្រឹត្តិការណ៍ជំនួបពិសេសមួយជាមួយអ្នកគាំទ្រ។ ជំនួបនេះធ្វើឡើងក្រោយពីនាង មានឱកាសចូលក្រាបបង្គំគាល់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត។
កាលពីព្រឹកថ្ងៃទី ១១ ខែកក្កដា ឆ្នាំ ២០១៨នេះ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សព្វព្រះរាជហឫទ័យប្រោសព្រះរាជទាន ឯកឧត្តម Panyarak Poolthup ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រថៃប្រចាំព្រះរាជាណាចក្រកម្ពុជា ដឹកនាំគណៈប្រតិភូទូរទស្សន៍ PNN និងតារាសម្តែងថៃ Bella Ranee ចូលក្រាបថ្វាយបង្គំគាល់ នាព្រះរាជដំណាក់គន្ធបុប្ផា ព្រះបរមរាជវាំង។ ក្នុងថ្ងៃដដែលនេះដែរតារាស្រីរូបនេះក៏បានទៅជួបអ្នកគាំទ្រផ្ទាល់នាកម្មវិធី “ជំនួបតារាភីអិនអិន ២០១៨” ដែលមានទីតាំងនៅផ្សារទំនើបអ៊ីអន សែន សុខ នៃព្រឹត្តិការណ៌គម្រប់ខួប៣ឆ្នាំនៃទូរទស្សន៍ភីអិនអិននោះ។ ក្រៅតារាមកពីប្រទេសថៃរូបនេះក៏មានការ ចូលរួមពីសំណាក់តារាសម្តែង តារាចម្រៀងកម្ពុជាដូចជា វ៉ៃ ហាំង យូប៊ីន អេតវីន ណារ៉ា ជីមមី peth mai ឌីឌី ក្រុមតារាចម្រៀង Original Song Small World Small Band និងតារាក្នុងរឿងភាគល្បីៗ ជាច្រើនទៀតរបស់ភីអិនអិន ជាពិសេសគឺវត្តមានតារាសម្តែងថៃដ៌ល្បីកញ្ញា បេឡារ៉ានី។កញ្ញា បេឡា រ៉ានី បានមកកាន់ទឹកដីនៃប្រទេសកម្ពុជាម្តងរួចមកហើយកាលពីកន្លងទៅជាមួយនឹងការស្វាគមន៍ខ្លាំងពីអ្នកគាំទ្រនៅកម្ពុជា ហើយពេលនេះនាងបង្ហាញវត្តមានបន្ទាប់ពីភាពយន្តភាគថ្មីរឿង”បុព្វេសន្និវាស”ដែលនាងសម្តែងជាតួឯកកំពុងចាក់ផ្សាយលើកញ្ចក់ទូរទស្សន៍នោះ។
អ្នកចូលរួមទាំងអស់គ្នា បានមកជួបប្រិយមិត្តអ្នកគាំទ្ររបស់ខ្លួន ដោយបានបង្ហាញជូននូវអ្វីដែលពិសេស សប្បាយៗថែមទាំងផ្តល់ឪកាសដល់គាំទ្រអាចឡើងថតរូបលេងហ្គេមកម្សាន្ត និងបានស្តាប់ការបកស្រាយបទចម្រៀងពិរោះៗថែមទៀតផង។ ក្រៅពីបានជូបជាមួយពួកគាត់ ហើយអ្នកគាំទ្រក៏បានផ្ទុះសំណើចសើចក្អាកក្អាយពីសំណាក់តារាកំប្លែងពីរដួងគឺនាយ ក្រិន និង កញ្ញា ប្រិមប្រិយជាដើម៕ ដោយ វឌ្ឍនា
