ខេត្តព្រះសីហនុ៖ កាលពីព្រឹកថ្ងៃទី១៧ ខែវិច្ឆិកា ឆ្នាំ២០១៥កន្លងមកនេះ ក្រុមតន្ត្រីជើងទឹកសហរដ្ឋអាមេរិកបានបង្កើនភាពរីករាយដល់កុមារតាមរយៈការច្រៀងចម្រៀងនិងលេងកម្សាន្តនៅក្នុងអង្គការម្លប់តាប៉ាងស្ថិតនៅភូមិទី៨ សង្កាត់ទី៨ ក្រុងព្រះសីហនុ ខេត្តព្រះសីហនុ ។
ក្នុងឱកាសនោះដែរលោក ចូ អាខូស្តា ខមសូវែនធែ(JOSE ACOSTASEVENTHFLT)ប្រធានក្រុមតន្ត្រីរបស់កងទ័ពជើងទឹកអាមេរិកបានមានប្រសាសន៍ ក្រុមរបស់លោកដែលមកសម្តែងជូនកុមារបានស្តាប់ចម្រៀងនិងលេងកម្សាន្តសរុបទាំងអស់មាន៧នាក់ ។
លោកបានបន្តថា ការមកសម្តែងនេះគឺដើម្បីបង្កើនភាពរីករាយដល់កុមារទាំងអស់នេះដែលពួកគេខ្វះភាពកក់ក្តៅនិងភាពរីករាយ។ក្រៅពីនេះក៏ដូចជាផ្តល់ឪកាសដល់កុមារទាំងអស់នោះបានលេងកម្សាន្តជាមួយកងទ័ពជើងទឹកអាមេរិកដូចជាការលេងកីឡា បាល់បោះ បាល់ទាត់ជាដើម។បន្ថែមពីលើនេះគឺអាចឲ្យកុមារទាំងអស់នេះបានឃើញនូវការស្លៀកពាក់ឯកសណ្ឋានរបស់កងទ័ពជើងទឹកអាមេរិកទោះបីជាគេគ្មានឪកាសឡើងនាវាចម្បាំងក៏ដោយនោះ ។
លោកបានបង្ហាញនូវក្តីរីករាយថា ក្រុមរបស់ពួកយើងបានមកកាន់ប្រទេសកម្ពុជាជាច្រើនលើកមកហើយគឺតែងតែមានភាពរីករាយជាមួយកុមារទាំងអស់នោះផងដែរ ។
លោក អ៊ីវ សៅរិន នាយកអង្គការម្លប់តាប៉ាង បានមានប្រសាសន៍ថា ការមកសម្តែងរបស់កងទ័ពជើងទឹកនេះគឺជាការលើកទឹកចិត្តឲ្យកុមារមានភាពក្លាហាន បង្កើននូវភាពស្និតស្នាលដល់ពួកគេរវាងកុមារនិងកុមារ រវាងកុមារនិងមនុស្សធំក៏ដូចជារវាងកុមារនិងកងទ័ពជើងទឹកអាមេរិកផងដែរ។ក្រៅពីការសម្តែងសិល្បះជូនកុមារទស្សនាកងទ័ពអាមេរិកក៏មានផ្តល់ជូននូវសម្ភារៈប្រើប្រាស់ សម្ភារៈកីឡានិងសម្ភារៈសិក្សាមានដូចជាសៀវភៅប៊ិចជូនដល់កុមារផងដែរ ។
លោកបានបន្តថា អង្គការរបស់លោកបានបង្កើតឡើងនៅឆ្នាំ២០០៣ដោយផ្តល់ការអប់រំសិក្សាក្នុងនិងក្រៅប្រព័ន្ធ.ផ្តល់សេវាសុខភាពព្យាបាលដោយឥតគិតថ្លៃ និងសេវាជាច្រើនទៀត។គោលបំណងរបស់អង្គការផ្តល់សេវាកម្មដល់ពួកគាត់ដើម្បីជួយពួកគាត់ឲ្យគេចផុតពីជីវិតតាមចិញ្ចើមថ្នល់រួចបញ្ជូនពួគគាត់ទៅក្នុងគ្រួសាររបស់ពួកគាត់វិញ។អង្គការរបស់យើងមិនមែនជាមណ្ឌលក្មេងកំព្រានោះទេ ។
លោកបានបញ្ជាក់ថា បច្ចុប្បន្ននេះអង្គការរបស់យើងផ្តល់សេវាកម្មដល់កុមារប្រមាណជា៤.៥០០នាក់នៅក្រុងព្រះសីហនុហើយពួគគេភាគច្រើនជាកុមារតាមចិញ្ចើមថ្នល់។ អង្គការអាចដំណើរការបានមកដល់សព្វថ្ងៃនេះតាមរយៈការស្នើសុំមូលនិធិមកពីក្រៅប្រទេសមានដូចជាប្រទេសអូស្ត្រាលី. ហុងកុង. សហរដ្ឋអាមេរិកនិងអង់គ្លេសជាពិសេសនោះបានមកពីអង្គការយូនីសេហ្វ ៕
ដោយ៖ ស ដារ៉ា