ខេត្ដសៀមរាប៖ បុរសម្នាក់ត្រូវឡានដឹកដីរបស់ក្រុមហ៊ុនចិន បើកបុកពេញទំហឹង បណ្ដាលឲ្យស្លាប់ភ្លាមៗនៅនឹងកន្លែងយ៉ាងអាណោចអាធ័ម ខណៈដែលជនរងគ្រោះ ជិះម៉ូតូធ្លាក់ជង្ហុកដួលលើផ្លូវក្នុងដំណើរច្រាសទិសគ្នា រីឯអ្នកបើកឡានបានប្រឹងបើករត់ដែរតែត្រូវសមត្ថកិច្ចដេញតាមក្របួចជាប់ ។
ហេតុការណ៍នេះកើតឡើងកាលពីម៉ោង២និង៤០នាទី ថ្ងៃទី១៧ ខែវិច្ឆិកា ឆ្នាំ២០១៥ ស្ថិតលើដងផ្លូវគ្រួសក្រហមលេខ២៦៦ ស្ថិតក្នុងភូមិត្រពាំងភ្លោះ ឃុំពង្រលើ ស្រុកជីក្រែង ។
សាក្សីបានឲ្យដឹងថា នៅពេលវេលាម៉ោង២ និង៤នាទីរសៀល ជនរងគ្រោះ បានជិះម៉ូតូដឹកប្រពន្ធមកទិសជើង ប៉ុន្ដែពេលធ្វើដំណើរ ម៉ូតូបានធ្លាក់ជង្ហក់ ហើយដួល ស្រាប់តែរថយន្ដដឹកដីក្រុមហ៊ុនចិនបាន បើកបញ្ច្រាសទិសគ្នាបុកនិងកិនតែម្ដង ស្របពេលដីហុយខ្លាំងមើលផ្លូវមិនឃើញផង ។
ប្រភពពីសមត្ថកិច្ចនគរបាលស្រុកជីក្រែងបានឲ្យដឹងថា ជនរងគ្រោះស្លាប់ក្នុងហេតុការណ៍មានឈ្មោះ ឆេង សំណាង ភេទប្រុស អាយុ៣១ឆ្នាំ ទីលំនៅភូមិអូរ ឃុំខ្វាយស្រុកជីក្រែងបើកបរម៉ូតូម៉ាកហុងដាសេ១២៥ សេរីឆ្នាំ២០១៥ ពណ៌ខ្មៅ ពាក់ស្លាកលេខសៀមរាប1T-4010 ក្នុងដំណើរពីត្បូងទៅជើង។ ចំណែកឡានដឹកដីប្រភេទបែនដែលបង្កមាន ពណ៌លឿងពាក់ស្លាកលេខAT153.0025បើកបរដោយឈ្មោះតាន់ ផង ភេទប្រុស អាយុ៣៥ឆ្នាំមានស្រុកកំណើតបឹងក្រាញ់ ឃុំស្វាយលួង ស្រុកកណ្តៀង ខេត្តពោធិ៍សាត់ បច្ចុប្បន្នស្នាក់នៅក្នុងក្រុមហ៊ុនរបស់ចិនដែលកំពុងធ្វើផ្លូវទំនប់ម្កាក់ក្នុងស្រុកជីក្រែង ។
សមត្ថកិច្ចបានបន្ដថា បុរសរងគ្រោះបានជិះម៉ូតូពីទិសខាងត្បូងទៅជើង លុះដល់ចំណុចកើតហេតុម៉ូតូនោះបានធ្លាក់ជង្ហុកដួលហើយស្របពេលជាមួយគ្នានោះមានរថយន្តប្រភេទបែនដឹកដីបើកយ៉ាងលឿនក្នុងដំណើរច្រាសទិសគ្នា ក៏បានបុកហើយកិនស្លាប់ភ្លាមៗនៅនឹងកន្លែងតែម្តង ។ បន្ទាប់ពីកើតហេតុតៃកុងឡានព្យាយាមបើតរត់គេច ប្រមាណជាង១០គីឡូម៉ែត្រទើបកម្លាំងសមត្ថកិច្ចស្ទាក់ចាប់បាននៅចំណុចប៉ុស្តិ៍នគរបាលឃុំខ្វាវតែម្តង ។
លោកបានបញ្ជាក់ថា បន្ទាប់ពីប្រគល់សាកសពឲ្យទៅក្រុមគ្រួសារយកធ្វើបុណ្យ រថយន្តបង្កនិងម៉ូតូរងគ្រោះគឺបានយកទៅរក្សាទុកនៅអធិការដ្ឋាននគរបាលស្រុកជីក្រែងរងចាំដោះស្រាយតាមផ្លូវច្បាប់។ ចំណែកតៃកុងដែលបានឃាត់ខ្លួនគឺបានរៀបចំសំណុំរឿងបញ្ជូនទៅកាន់ការិយាល័យនគរបាលចរាចរណ៏ខេត្តដើម្បីចាត់ការបន្ត រីឯគ្រួសារជនរងគ្រោះបានមកដាក់ពាក្យបណ្តឹងនៅអធិការនគរបាលស្រុកដោយទាមទារប្រាក់ជម្ងឺចិត្តចំនួន៣៥០០ដុល្លារនិងសុំថ្លៃជួសជុលម៉ូតូនិងយកមកធ្វើបុណ្យតាមប្រពៃណី ។
គួរបញ្ជាក់ថា នៅតាមបណ្ដោយផ្លូវពីស្រុកជីក្រែមានរថយន្ដដឹកដីក្រុមហ៊ុនជាច្រើនគ្រឿង បានធ្វើចរាចរណ៍ ដោយមានដីហុចខ្លាំង បណ្ដាលឲ្យគ្រោះថ្នាក់ចរាចរណ៍ជាបន្ដបន្ទាប់ និងបានប៉ះពាល់ដល់សុខភាពពលរដ្ឋខ្លាំងផងដែរ ៕
ដោយ៖ ជានិរន្ដរ៍