ភ្នំពេញ៖ អាជ្ញាធររាជធានីភ្នំពេញសម្រេចផ្ទេរភារៈកិច្ចទទួលខុសត្រូវបញ្ហាសំរាមទៅតាមខណ្ឌទាំង ១២វិញ ដើម្បីងាយស្រួលក្នុងការគ្រប់គ្រងសំរាមនៅនឹងមូលដ្ឋានរបស់ខ្លួនអោយកាន់តែ ប្រសើរ ជៀសជាងពេលមានបញ្ហាឆ្លើយដាក់គ្នា ។
សាលារាជធានីភ្នំពេញត្រៀមអោយអាជ្ញាធរខណ្ឌទាំង១២ ចុះហត្ថលេខាកិច្ចសន្យាគ្រប់គ្រងសំរាមជាមួយក្រុមហ៊ុនស៊ីនទ្រីវិញនៅពេលឆាប់ៗនេះ ដោយរួមទាំងផ្ទេរពីការបង់ថ្លៃ សេវាប្រមូលសំរាមនៅអគ្គីសនីកម្ពុជា មកបង់នៅតាមខណ្ឌវិញដែរ ដើម្បីបង្កើនការទទួលខុស ត្រូវរឿងសំរាមឲ្យបានកាន់តែល្អ។
លោក ប៉ា សុជាតិវង្សអភិបាលរាជធានីភ្នំពេញបានថ្លែងដូច្នេះក្នុងកិច្ចពិភាក្សាលើសេចក្តីកិច្ចសន្យាគ្រប់គ្រងសំរាមរវាងខណ្ឌទាំង១២ និងក្រុមហ៊ុនស៊ីនទ្រីនៅព្រឹកថ្ងៃទី១៨ ខែវិច្ឆិកាដោយបានចាត់ទុកថា សំរាមជាបញ្ហាដ៏ធំដោយត្រូវយកចិត្តទុកដាក់ជាអាទិភាព ដើម្បីលើកកម្ពស់ គុណភាពសុខភាពអនាម័យបរិស្ថាននិងសោភណ្ឌភាពរាជធានិភ្នំពេញ។ លោកអភិបាលបញ្ជាក់ថា ការទំលាក់ភារៈកិច្ចឲ្យខណ្ឌជាអ្នកទទួលខុសត្រូវវិញនេះ ដោយសារតែ ខណ្ឌនៅគៀកនឹងប្រជាពលរដ្ឋផ្ទាល់ដឹងពីស្ថានភាពទុកដាក់សំរាម និងការបង្កើតសំរាម ងាយស្រួលក្នុងការដោះ ស្រាយ។
គម្រោងផ្លាស់ប្តូររូបភាពថ្មីនៃការគ្រប់គ្រងនេះ ត្រូវបានគេមើលឃើញថាបន្ទាប់ពីការគ្រប់គ្រង សំរាមរវាងសាលារាជធានីភ្នំពេញនិងក្រុមហ៊ុនស៊ិនទ្រីនៅពុំទាន់បានល្អ ដោយសំរាមនៅតែ មានគំនរនៅតាមដងផ្លូវឬមុខផ្ទះប្រជាពលរដ្ឋ ដែលបានកើតឡើងពីការប្រមូលសំរាមមិនទាន់ មានពេលវេលាច្បាស់លាស់ធ្វើអោយប្រជាពលរដ្ឋរអ៊ូរទាំនិងថ្នាំងថ្នាក់មកលើអាជ្ញាធរ។
លោកសេង សាវី ប្រធានក្រុមហ៊ុនស៊ីទ្រីបានបញ្ជាក់ថា ផែនការថ្មីនេះនឹងត្រូវគម្របដណ្តប់ទូទាំង96សង្កាត់ទោះបីនៅជាយក្រុងក៍ដោយកត្រូវប្រមូលសំរាមដែរ ហើយបង្កើតជា ទីលានចាក់សំរាមថ្មីចំនួន៣កន្លែងផ្សេងទៀតក្រៅពីទីលានចាក់សំរាមដង្កោ គឺមាននៅក្នុងខណ្ឌ សែនសុខ ខណ្ឌជ្រោយចង្វារ និងខណ្ឌច្បារអំពៅ។
សូមបញ្ជាក់ថា ៖ កិច្ចសន្យាគ្រប់គ្រងសំរាមរវាងខណ្ឌ និងក្រុមហ៊ុនស៊ីនទ្រី នឹងធ្វើឡើង១០ឆ្នាំ ម្តង។ ដោយឡែកក្នុងមួយថ្ងៃៗប្រជាពលរដ្ឋក្នុងរាជធានីភ្នំពេញបានបញ្ជេញសំរាមដឹកទៅកាន់ទី លានចាក់សំរាមដង្កោរចាប់ពី១៥០០តោន ដល់១៨០០តោន ៕
ដោយ៖ សំរិត
