ភ្នំពេញ ៖ សម្ភារៈអេឡិចត្រូនិក និងព័ត៌ មានវិទ្យា ដែលមានតម្លៃប្រមាណជា ៧៥.៥៨៥ ដុល្លារ ត្រូវបានរដ្ឋាភិបាលចិនផ្តល់ដល់វិទ្យាស្ថានការទូត និងទំនាក់ទំនងអន្តរជាតិ នាព្រឹកថ្ងៃទី២៤ ខែកក្កដា ឆ្នាំ២០១៨នេះ នៅទីស្តីការក្រសួងការបរទេស ក្រោមអធិបតីភាពលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងលោកស្យុង ប៉ូ (Xiong Bo) ឯកអគ្គរដ្ឋទូតចិនប្រចាំកម្ពុជា។
យោងតាមសេចក្តីប្រកាសព័ត៌មានរបស់ក្រសួងការបរទេសបានបញ្ជាក់ថា « អំណោយរបស់ប្រទេសចិននាពេលនេះ ចូលរួមចំណែកដល់ការធ្វើឲ្យគំនិតផ្តួចផ្តើមរបស់រដ្ឋមន្ត្រីក្រសួងការបរទេស និងសហ ប្រតិបត្តិការអន្តរជាតិ មានចីរភាព និងពង្រឹងសមត្ថភាពដំណើរការរបស់វិទ្យា ស្ថានការទូត និងទំនាក់ទំនងអន្តរជាតិ»។ ការគាំទ្ររបស់ចិននេះ ជាការឆ្លើយតបទៅនឹងតម្រូវការរបស់វិទ្យាស្ថាន ក្នុងការពង្រឹងសមត្ថភាពអ្នកការទូតអាជីពរបស់កម្ពុជា លើផ្នែក ICT Digital Economy និងការទូត ព្រមទាំងអនុញ្ញាតឲ្យវិទ្យាស្ថានពង្រឹងសកម្ម ភាពទំនាក់ទំនងសាធារណៈ និងសកម្មភាពបណ្តុះបណ្តាលស្តីពី Communication Skill (បំនិនខាងគមនាគមន៍) ការថ្លែងជាសាធារណ និងភាសាបរទេស។
សេចក្ដីប្រកាសរបស់ក្រសួងបញ្ជាក់បន្ថែមថា ការប្រគល់សម្ភារៈនេះបានធ្វើឡើងតាមសំណើរបស់វិទ្យាស្ថានការទូត និងទំនាក់ទំនងអន្តរ ជាតិ ទៅស្ថានទូតចិនប្រចាំកម្ពុជា ដើម្បីជួយសម្រួលដល់ដំណើរការរបស់វិទ្យាស្ថាន និងការរៀបចំវគ្គបណ្តុះ បណ្តាលដល់មន្ត្រីការទូត និងក្រសួងស្ថាប័នពាក់ព័ន្ធរបស់កម្ពុជា ។
គួរបញ្ជាក់ថា មកទល់នឹងពេលនេះមាន រយៈពេល៦០ឆ្នាំមកហើយ នៃការបង្កើតទំនាក់ទំនងការទូតកម្ពុជា-ចិន៕
