ភ្នំពេញ៖ យុវជនម្នាក់ជិះម៉ូតូលឿន ប្រហែលមើលមិនឃើញរថយន្តក្រុមហ៊ុនស៊ីម៉ងត៍អូដ្ឋ នៅពីមុខ ដែលគ្មានដាក់ភ្លើងសញ្ញា បានជ្រុលចង្កូតទៅបុកពីក្រោយ បណ្ដាលឲ្យផុងលលាដ៍ក្បាលស្លាប់នៅនឹងកន្លែងកើតហេតុភ្លាមៗ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២នឹង៣០នាទីរំលងអធ្រាត្រ ឈានចូលថ្ងៃទី២០ ខែវិច្ឆិកា ឆ្នាំ២០១៥ តាមបណ្តោយផ្លូវលេខ៣៧១ ស្ថិតក្នុងភូមិត្រោតជ្រុំ៤ សង្កាត់បឹងទំពុន ខណ្ឌមានជ័យ រាជធានីភ្នំពេញ ។
ជនរងគ្រោះមានឈ្មោះ វ៉ាន់ ញៀន អាយុប្រមាណជាង២០ឆ្នាំ ជាបុគ្គលិកបណ្តែតនៅក្នុងរោងចក្រស្រាបៀរកម្ពុជា និងមិនទាន់ដឹងថារស់នៅទីណានោះទេ ។
បើតាមសាក្សីអ្នកដែលនៅកន្លែងកើតហេតុបានឲ្យដឹងថា កន្លែងកើតហេតុខាងលើ គេបានឃើញរថយន្តក្រុមហ៊ុនស៊ីម៉ង់ត៍អូដ្ឋត៍ដឹកដែកបាន ចតចោលតាមបណ្តោយផ្លូវលេខ៣៧១ បន្ទាប់ក្រោយមក ក៏ស្រាប់តែមានយុវជនម្នាក់ជិះម៉ូតូ ហុងដាឌ្រីម សេ១២៥ ពណ៍ខ្មៅ ពាក់ស្លាកលេខ ភ្នំពេញ 2Dh-2076 ជិះក្នុងទិសដៅពីរលិចទៅកើត មកបុកពីក្រោយពេញទំហឹងបណ្ដាលឲ្យផុងលលាហ៍ក្បាលស្លាប់ភ្លាមៗនៅនិងកន្លែងកើតហេតុ។
ប្រភពដដែលបានបន្តថា ដោយសារផ្លូវងងឹត ហើយរថយន្តមិនមានដាក់ភ្លើងសញ្ញាផងនោះ ទើបបានបណ្ដាលឲ្យយុវជនម្នាក់ជិះម៉ូតូជ្រុលទៅបុកដែកដែលដាក់លើរថយន្ត បណ្តាលឱ្យផុងលលាហ៍ក្បាលស្លាប់ក្នុងធ្លុកឈាមយ៉ាងអាណោចអាធម៌នៅនឹងកន្លែងកើតហេតុបែបនេះ ។
ក្រោយពេលកើតហតុសមត្ថកិច្ចមូលដ្ឋានបានមកដល់កន្លែងកើតហេតុ និងបានសហការជាមួយជំនាញ ធ្វើការវាស់វែង យករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយទៅតាមផ្លូវច្បាប់ ចំណែកសពជនរងគ្រោះ សមត្ថកិច្ចបានទំនាក់ទំនងទៅក្រុមគ្រួសារសពឱ្យមកទទួលយកទៅធ្វើបុណ្យតាមប្រពៃណី ៕
ដោយ៖ ភារ៉ា ដង្កោ
