ខេត្តពោធិ៍សាត់៖ ប្រទះឃើញសាកសពបុរសវ័យចំណាស់ម្នាក់ អណ្ដែតក្នុងទឹកអូរនៅតាមបន្ទាត់ព្រំដែនកម្ពុជាថៃ ដែលគេសង្ស័យផឹកស្រាស្រវឹងជោគជាំ ចូលទៅរាយមង នៅទីនោះ។
ហេតុការណ៍ភ្ញាក់ផ្អើលប្រទះឃើញសាកសពអណ្ដែតទឹកអូរខាងលើ កាលពីព្រឹកព្រលឹមថ្ងៃទី១៩ ខែវិច្ឆិកា ឆ្នាំ២០១៥ ត្រង់ចំណុចព្រំដែនកម្ពុជាថៃ ក្នុងទឹកអូរសួស្ដី ស្ថិតក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ។
ជនរងគ្រោះត្រូវបានគេស្គាល់ឈ្មោះ ជួប ហ៊ុន ភេទប្រុស អាយុ ៥៥ឆ្នាំ មានទីលំនៅភូមិ.ឃុំកើតហេតុ ។
ប្រភពពត៌មានពីនគរបាលស្រុកវាលវែង បានឱ្យដឹងថា ក្រោយពីសមត្ថកិច្ចចុះស្រាវជ្រាវត្រួតពិនិត្យយ៉ាងម៉ត់ចត់ ជុំវិញកន្លែងកើតហេតុ និងមានការបំភ្លឺពីក្រុមសាច់ញាតិផងនោះ ឃើញថាបុរសរងគ្រោះគាត់ទៅធ្វើចំការនៅតំបន់នោះជាប្រចាំ ហើយគាត់ឧស្សាហ៍ផឹកស្រាស្រវឹងជារៀងរាល់ថ្ងៃផងដែរ ម្យ៉ាងទៀតគាត់ក៏ចុះរាយមងនៅទីនោះជារើយៗដូច្នេះសមត្ថកិច្ចអាចសន្និដ្ឋានបានថា សង្ស័យផឹកស្រាស្រវឹងចុះទៅងូតទឹក ឬរាយមង ព្រោះកាលរសៀលថ្ងៃទី១៨ មុនកើតហេតុក្រុមសាច់ញាតិបានទៅរកគាត់ដល់ទីនោះដែរ ប៉ុន្ដែរកមិនឃើញ លុះព្រឹកព្រលឹមថ្ងៃទី១៩ ថ្ងៃកើតហេតុក៏ប្រទះឃើញសាកសពអណ្ដែតទឹកតែម្ដង ។
ប្រភពបន្ដទៀតថា ដូច្នេះករណីនេះជនរងគ្រោះពិតជាស្លាប់ដោយសារលង់ទឹកពិតប្រាកដមែន ក៏បានប្រគល់ឱ្យក្រុមសាច់ញាតិ ធ្វើបុណ្យតាមប្រពៃណី ៕
ដោយ៖ ប៉ឹម ពិន
