ប្រទេសចិនបានអះអាងថា ជនបរទេស២៨នាក់ដែលដឹកនាំការវាយប្រហារភេរវកម្មត្រូវបានសម្លាប់ បន្ទាប់ពីការវាយប្រហារទៅលើតំបន់អណ្តូងរ៉ែ ។
មន្ត្រីរដ្ឋាភិបាលក្នុងតំបន់បានបញ្ជាក់ថា កងកម្លាំងសន្តិសុខចិនស្ថិតនៅភាគខាងលិចដាច់ស្រយាលខេត្តស៊ីនជាង បានសម្លាប់ក្រុមភេរវកម្ម២៨នាក់ បន្ទាប់ពីក្រុមទាំងនេះបានធ្វើសកម្មភាពវាយប្រហារទៅលើអណ្តូងរ៉ែមួយកន្លែងកាលពីខែកញ្ញា ឆ្នាំ២០១៥ ស្ថិតក្រោមការបញ្ជាដឹកនាំដោយក្រុមជ្រុលនិយមក្រៅប្រទេសនោះ ។
ប្រភពព័ត៌មានខាងលើនេះផ្សព្វផ្សាយដោយទីភ្នាក់ងារគ្រប់គ្រងដោយរដ្ឋស្ថិតនៅតំបន់ស៊ីនជាង ដែលជាការផ្សព្វផ្សាយដំបូងគេបំផុតដែលមានការបញ្ជាក់ជាសាធារណៈដោយមន្ត្រីរដ្ឋាភិបាលនោះ ទាក់ទងការវាយប្រហារកើតឡើងកាលពីថ្ងៃទី១៨ ខែកញ្ញា ឆ្នាំ២០១៥ ស្ថិតនៅអណ្តូងធ្យូងថ្ម Sogan ក្នុងតំបន់ AKSU ហើយដែលមានការផ្សព្វផ្សាយថា បានបណ្តាលឲ្យមនុស្ស១៦នាក់បាត់បង់ជីវិត ក្នុងនោះរួមមានមន្ត្រីប៉ូលិស៥នាក់ផងដែរ និង១៨នាក់ផ្សេងទៀតរងរបួស ។
ទីភ្នាក់ងារព័ត៌មានវិទ្យុអាស៊ីសេរី RFA បានផ្សព្វផ្សាយព័ត៌មានដំបូងគេកាលពី២ខែមុនមកហើយទាក់ទងហេតុការណ៍ហិង្សាខាងលើនេះ ដោយបានបញ្ជាក់ថា មនុស្សយ៉ាងហោចណាស់៥០នាក់បានបាត់បង់ជីវិត ។
ប្រភពព័ត៌មាន Xinjiang Daily បានផ្សព្វផ្សាយថា ក្រុមជនវាយប្រហារបន្ទាប់ពីធ្វើសកម្មភាពបានរត់ភៀសខ្លួនទៅកាន់តំបន់ភ្នំ ហើយអាជ្ញាធរបានចាប់ផ្តើមធ្វើប្រតិបត្តិការស្វែងរកក្រុមជនវាយប្រហារទាំងនោះ ដោយមានការចូលរួមពីពលរដ្ឋប្រមាណ១០.០០០នាក់ផងដែរ ហើយបានរៀបចំអន្ទាក់ចាប់ក្រុមជនវាយប្រហារទាំងនោះតែម្តង ។
ប្រភពបន្តទៀតថា ក្រោយរយៈពេល៥៦ថ្ងៃនៃប្រតិបត្តិការនេះ កម្លាំងសន្តិសុខខេត្តស៊ីនជាងបានបំផ្លាញកម្ទេចក្រុមភេរវកម្មទាំងនោះ ដែលជាក្រុមស្ថិតក្រោមការដឹកនាំបញ្ជាដោយផ្ទាល់ពីក្រុមផ្តាច់ខ្លួនជ្រុលនិយមនៅក្រៅប្រទេស ។ ក្រុមជនវាយប្រហារ២៨នាក់ត្រូវបានសម្លាប់ ។
រដ្ឋាភិបាលចិនបានអះអាងថា ខ្លួនប្រឈមការគំរាមកំហែងយ៉ាងខ្លាំងក្លាពីក្រុមឧទ្ទាម និងក្រុមជ្រុលនិយមស្ថិតនៅខេត្តស៊ីនជាំងដែលសម្បូរធនធានរ៉ែ ព្រំដែនភាគកណ្តាលអាស៊ី ដែលមនុស្សរាប់រយនាក់បានបាត់បង់ជីវិតដោយសារតែអំពើហិង្សាក្នុងមួយឆ្នាំៗនោះ ។
ក្រុមសិទ្ធិមនុស្សបានលើកឡើងថា ប្រទេសចិនមិនដែលបានបង្ហាញភស្តុតាងជាក់ស្តែងទាក់ទងក្រុមឧទ្ទាមវាយប្រហារទៅលើកម្លាំងរដ្ឋាភិបាលនោះឡើយ ហើយថា រដ្ឋាភិបាលនេះបានរឹតបន្តឹងទៅលើសិទ្ធិជំនឿសាសនា វប្បធម៌របស់ជនជាតិដើមភាគតិចអ៊ុយហ្គ័រដែលរស់នៅក្នុងខេត្តស៊ីនជាងនោះ ទើបជាហេតុនាំឲ្យមានការផ្ទុះហិង្សាកើតឡើង ។ ទោះបីយ៉ាងណា ការចោទប្រកាន់ពីសំណាក់ក្រុមសិទ្ធិមនុស្សបែបនេះ ត្រូវរដ្ឋាភិបាលចិនច្រានចោលជានិច្ច ៕
ប្រែសម្រួល៖ ថាច់ យ៉ាត
