ខេត្តពោធិ៍សាត់៖ កម្លាំងនគរបាលអធិការដ្ឋានស្រុកក្រគរ សហការជាមួយកម្លាំងប៉ុស្ដិ៍នគរបាលរដ្ឋបាលក្បាលត្រាច ឃាត់ខ្លួនបុរសជាមុខសញ្ញាប្រើប្រាស់សារធាតុញៀន និងចោរកម្ម ។
កាលពីព្រឹកថ្ងៃទី២០ ខែវិច្ឆិកា ឆ្នាំ២០១៥ ត្រង់ចំណុចក្នុងបរិវេនវិទ្យាល័យហ៊ុនសែនក្រគរ ស្ថិតក្នុងភូមិត្រពាំងស្វាយ ឃុំក្បាលត្រាច ស្រុកក្រគរ ខេត្តពោធិ៍សាត់ ។
ប្រភពពីសមត្ថកិច្ចចុះអនុវត្តន៍ បានឱ្យដឹងថា បុរសសង្ស័យត្រូវបានឃាត់ខ្លួន ឈ្មោះ សុខ ផេង អាយុ ៣៦ឆ្នាំ រស់នៅភូមិសំរោង ឃុំក្បាលត្រាច ស្រុកក្រគរ ខេត្តពោធិ៍សាត់ ។ ក្នុងនោះកម្លាំងដកហូតវត្ថុតាង កាំបិតត្នោត១ ស្រវ៉ាក់ទាក់សត្វឆ្កែពេលយប់១ និងម៉ូតូ ១គ្រឿង ។
ប្រភពបន្តថា ការឃាត់ខ្លួនជនសង្ស័យខាងលើ ខណៈមានប្រជាពលរដ្ឋរាយការណ៍មកថា រូបគេនឹងបក្ខពួកមួយចំនួនទៀត កំពង់ធ្វើសកម្មភាពជក់ថ្នាំញៀន ហើយបុរសរូបនេះកន្លងមកសមត្ថកិច្ចធ្លាប់ឃាត់យកមកអប់រំច្រើនលើកច្រើនសារពាក់ព័ន្ធនឹងប្រើប្រាស់សារធាតុញៀន បង្កការអុកឡុកព្រមទាំងជាមុខសញ្ញាចោរកម្មនៅក្នុងមូលដ្ឋានផងដែរ ។
ប្រភពបន្តទៀតថា ជនសង្ស័យត្រូវបានបញ្ជូនទៅស្នងការដ្ឋាននគរបាលខេត្តពោធិ៍សាត់ ដើម្បីបន្តតាមនីតិវិធីហើយ កាលពីរសៀលថ្ងៃទី២០ ខែវិច្ឆិកា ឆ្នាំ២០១៥ ៕
ដោយ៖ ប៉ឹម ពិន
