ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានបញ្ជាក់ថា៖ រដ្ឋបាលរាជធានីភ្នំពេញ និងបង្កើននូវភាពងាយស្រួលលើការគ្រប់គ្រងចំណូល និងទិន្នន័យអ្នកដំណើរតាមរថយន្តក្រុង និងកាណូត និងដើម្បីផ្តល់ភាពងាយស្រួលដល់អ្នកដំណើរផងនុះ ពិសេសការបង់កម្រៃសេវាដឹកជញ្ជូនសាធារណៈរថយន្តក្រុង និងកាណូត បានឆាប់រហ័ស និងមានសុវត្ថិភាពខ្ពស់ ក៏ដូចជាជួយសម្រួលដល់ អតិថិជនក្នុងការធ្វើដំណើររបស់បងប្អូនប្រជាពលរដ្ឋ រដ្ឋបាលរាជធានីភ្នំពេញ បានឯកភាព ចុះហត្ថលេខាលើអនុស្សរណៈ ចាប់ដៃគូរវិនិយោគ យល់គ្នារវាងរដ្ឋាករស្វយ័តដឹកជញ្ជូនសាធារណៈ រថយន្តក្រុងរាជធានី (City Bus) និងធនាគារអេស៊ីលីដា ភីអិលស៊ីលើការប្រើប្រាស់សេវាអេស៊ីលីដាយូនីធីទាន់ចិត្ត(QR Code) សម្រាប់ប្រតិបត្តិការបង់កម្រៃសេវាជិះរថយន្ដក្រុង និងកាណូត
លោក ឃួង ស្រេង បានបញ្ជាក់បែបនេះ ខណៈលោក ជាអធិបតីភាព ក្នុងពិធីចុះហត្ថលេខា លើអនុស្សរណៈ យោគ រវាងរដ្ឋបាលរាជធានីភ្នំពេញ និងធនាគារអេស៊ីលីដារ កាលពីរសៀលថ្ងៃព្រហស្បតិ៏ ១២កើត ខែស្រាពណ៏ ឆ្នាំចសំរឹទ្ធិស័កព.ស២៥៦២ ត្រូវនិងថ្ងៃទី២៣ សីហា ២០១៨ នៅសាលារាជធានីភ្នំពេញ ។
លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ បានបញ្ជាក់ថា៖ ការប្រើប្រាស់សេវាអេស៊ីលីដា ឃ្យូអរកូដ នេះ គឺមានភាពងាយស្រួល សម្រាប់ការគ្រប់គ្រងចំណូល និងទិន្នន័យអ្នកដំណើរតាមរថយន្តក្រុង និងកាណូត និងផ្តល់ភាពងាយស្រួលដល់អ្នកដំណើរក្នុងការបង់កម្រៃសេវាដឹកជញ្ជូនសាធារណៈរថយន្តក្រុង និងកាណូត បានយ៉ាងឆាប់រហ័ស និងមានសុវត្ថិភាពខ្ពស់ ដែលបានជួយសម្រួលដល់ការធ្វើដំណើររបស់បងប្អូនប្រជាពលរដ្ឋ កាត់បន្ថយការចំណាយ ចំណេញ ពេលវេលា មានសុវត្ថិភាព និងមានផាសុកភាព ចូលរួមកាត់បន្ថយការកកស្ទះចរាចរណ៍ គ្រោះថ្នាក់ចរាចណ៍ ស្របតាមគោលនយោបាយ និងអនុសាសន៍ ដ៏ខ្ពង់ខ្ពស់ របស់រាជ រដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ។
លោកបន្តទៀតថា៖ រដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ មានសេវាដឹកជញ្ជូនរថយន្តក្រុងសាធារណៈចំនួន៨ខ្សែ ដែលមានរថយន្ត ១៥៥គ្រឿង កំពុងទទួលបានការពេញនិយមពីសំណាក់ប្រជាពលរដ្ឋ ក្នុងការប្រើប្រាស់រថយន្តក្រុងកាន់តែច្រើនដែលមានចំនួនអ្នកធ្វើដំណើរពី ២ម៉ឺន ទៅ២ម៉ឺន១ពាន់នាក់ ក្នុងមួយថ្ងៃ ។ រដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ ក៏មានសេវាដឹកជញ្ជូនផ្លូវទឹកចំនួន១ ខ្សែ ពីស្ថានីយ៍ឬស្សីកែវ ទៅស្ថានីយ៍តាខ្មៅផងដែរ។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា ការជ្រើសរើស ធនាគារអេស៊ីលីដា ភីអិលស៊ី ជាដៃគូសហប្រតិបត្ដិការក្នុងការបង់កម្រៃសេវាដឹកជញ្ជូនសាធារណៈរថយន្តក្រុង និងកាណូត តាមរយៈសេវាអេស៊ីលីដាយូនីធីទាន់ចិត្ត (ACLEDA Unity ToanChet)នេះ អ្នកដំណើរអាចទូទាត់កម្រៃដឹកជញ្ជូន រថយន្តក្រុង និងកាណូត បានភ្លាមៗ ដោយស្វ័យប្រវត្តិ តាមរយៈស្លាកសញ្ញា អេស៊ីលីដា ឃ្យូអរកូដ ដែលមានបិទនៅលើរថយន្តក្រុង និងកាណូត ។
លោកបន្តថា ៖ សេវាអេស៊ីលីដាយូនីធីទាន់ចិត្ត (ACLEDA Unity ToanChet) របស់ធនាគារ អេស៊ីលីដា ភីអិលស៊ី ជាសេវាធនាគារតាមរយៈទូរស័ព្ទចល័ត ដែលដំណើរការដោយប្រព័ន្ធ Android និងiOS ដើម្បីទូទាត់ និងទិញទំនិញ គ្រប់ទីកន្លែងតាមរយៈស្លាកសញ្ញា អេស៊ីលីដា ឃ្យូអរកូដ ប្រកបដោយភាពងាយស្រួល រហ័សទាន់ចិត្ត និងមានសុវត្ថិភាពខ្ពស់ ។
លោកបានបញ្ជាក់ថា៖ គិតមកត្រឹមថ្ងៃនេះ មានអ្នកចុះឈ្មោះប្រើប្រាស់សេវាអេស៊ីលីដាយូនីធីទាន់ចិត្ត (ACLEDA Unity ToanChet) ជាលក្ខណៈបុគ្គល មានចំនួន ៦២៤.៦៨៤ និងជាដៃគូមានចំនួន ៧.០២៤ ។
ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនប្រាំ គឺធនាគារ អេស៊ីលីដា ឡាវ លីមីធីត អេស៊ីលីដា ស៊ីឃ្យួរឹធី ភីអិលស៊ី វិទ្យាស្ថាន ពាណិជ្ជសាស្ត្រ អេស៊ីលីដា ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា និងអេស៊ីលីដា ប្រូភើធី អិលធីឌី ព្រមទាំងមានការិយាល័យតំណាងនៅសាធារណរដ្ឋ សហភាពមីយ៉ាន់ម៉ា ។
ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង ៥,៤៣ ពាន់លានដុល្លារអាមេរិក សមតុល្យឥណទានសរុបចំនួន ៣,២៥ពាន់លានដុល្លារ អាមេរិក និងប្រាក់បញ្ញើសន្សំសរុបចំនួន ៣,៤៨ ពាន់លានដុល្លារអាមេរិក និងមានអតិថិជនប្រមាណជាង ២,៥ លាននាក់ គិតត្រឹមដំណាច់ខែកក្កដា ឆ្នាំ២០១៨ នេះ ។
លោកឃួង ស្រេង អភិបាលរាជធានីភ្នំពេញ បានបញ្ជាក់ថា៖ ការបង្កើតអោយមានការប្រើប្រាស់សេវាអេស៊ីលីដាយូនីធីទាន់ចិត្ត( QR Code )នេះធ្វើឡើងដើម្បីសម្រួលការលំបាករបស់បងប្អូន ប្រជាពលរដ្ឋ អោយបានរហ័សទាន់ចិត្តលើការបង់កម្រៃសេវាដឹកជញ្ជូនសាធាររណៈរថយន្តក្រុងនិងកាណូត ខណៈដែល បច្បប្បន្ននេះមានរថយន្តក្រុងចំនួន ១៥៥គ្រឿង បាននឹងកំពុងរត់លើផ្លូវចំនួន ៨ខ្សែ មានចំនួនអ្នកធ្វើដំណើរពី ២ម៉ឺន ទៅ២ម៉ឺន១ពាន់នាក់ ក្នុងមួយថ្ងៃ ហើយជាគម្រោងរដ្ឋបាលរាជធានីនឹងបន្ថែមចំនួនខ្សែរត់ថែមទៀត។
លោកឃួង ស្រេង បានបញ្ជាក់ថា៖ ការបង្កើតអោយមានការប្រើប្រាស់សេវាអេស៊ីលីដាយូនីធីទាន់ចិត្ត(QR Code ) សម្រាប់ប្រតិបត្តិការបង់កម្រៃ សេវាដឹកជញ្ជូនសាធាររណៈរថយន្តក្រុងនិងកាណូតនេះ វានឹងកាត់បន្ថយកម្លាំងកម្មពលកម្ម កាត់បន្ថយបុគ្គលិកច្រើន ហើយការ គ្រប់គ្រង់ចំណូល ក៏មិនបានបាត់បង់ប្រាក់ផងដែរ។
លោកឃួង ស្រេង បានបញ្ជាក់ថា ៖ និយាយបែបនេះ មិនមែនចោទ បុគ្គលិកដែលធ្លាប់បំពេញការងារនេះកន្លងមកធ្វើអោយបាត់ឬលួចលុយនោះទេ នេះដោយសារតែបច្ចេកវិទ្យាទំនើប ដែលទៀមទាអោយយើងប្រើប្រាស់សេវានេះ។
លោកឃួង ស្រេង ក៏បានណែនាំឱ្យ ប្រធានរដ្ឋករស្វាយ័ត ដឹកជញ្ជូនត្រូវមើលបុគ្គលិករបស់ខ្លួន ពេលកាត់បន្ថយ បុគ្គលិក ត្រូវសម្រួលពួកគាត់ទៅធ្វើកន្លែងណាមួយ ដោយត្រូវធ្វើរបាយការណ៍មករដ្ឋបាលរាជធានីភ្នំពេញ ពោលគឺធ្វើយ៉ាង ណាកុំអោយពួកគាត់មានសន្តិអារម្មណ៍ ភណ្ឌច្រឡំ ដោយនេះជាជំហានអភិវឌ្ឍន៏ ដែលត្រូវប្រើប្រាស់បច្ចេកទេសទំនើបហើយ។
លោកក៏បានធ្វើការណែនាំអោយរដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ និងធនាគារត្រូវអនុវត្ត នៃការចុះហត្ថលេខានេះអោយបានល្អ ពិសេសត្រូវ ពិនិត្យជាប្រចាំចំពោះម៉ាស៊ីន ទូទាត់ប្រាក់ជៀសវាងការខូច បង្កការលំបាកដល់ប្រជាពលរដ្ឋ ៕ ដោយ៖ សំរិត
