ខេត្តមណ្ឌលគិរី៖ បុរសម្នាក់ជិះម៉ូតូជែងមិនប្រយ័ត្នក៏បុកជាមួយរថយន្ត ដែលបើកបរច្រាស់ទិសគ្នាបណ្តាលអោយ ស្លាប់ភ្លាមៗ នៅកន្លែងកើតហេតុ កាលពីព្រឹកថ្ងៃទី២៥ ខែវិច្ឆិកានេះ នៅមុខផ្លូវចូលរមណីយដ្ឋាន ចំការកាហ្វេ ស្ថិតក្នុងក្រុងសែនមនោរម្យ ។
សាក្សីនៅកន្លែងកើតហេតុបាននិយាយថា ជនរងគ្រោះបានជិះម៉ូតូម្នាក់ឯង ក្នុងល្បើនលឿនទិសដៅចេញពីទីរួមខេត្តតាមបណ្តោយផ្លូវជាតិលេខ ៧៦ ពេលមកដល់ក្បែរកន្លែងកើតហេតុ មិនបានបង្អង់ល្បឿនទេហើយថែមទាំងវ៉ារថយន្តទេសចរណ៍ដែលកំពុង ចង្អៀតតកន្ទុយគ្នាទៀតផង។ ខណៈពេលកំពុងវ៉ានោះក៏បានវ៉ាក់អើជាមួយរថយន្តសាំយ៉ុងមួយគ្រឿងបើកបរក្នុងទិសដៅច្រាសគ្នា បណ្តាលឲ្យបុកពេញទំហឹងលាន់ដូចរន្ទះ។ ជនរងគ្រោះដែលជិះម៉ូតូបានស្លាប់ភ្លាមៗនៅកន្លែងកើតហេតុ ចំណែកអ្នកបើបរថយន្តសាំយ៉ុង មិនមានអ្នករងរបួសនោះទេ ។
សមត្ថកិច្ចចរាចរណ៍ផ្លូវគោកបានអោយដឹងថា គ្រោះថ្នាក់នេះកើតឡើងដោយសារការខ្វាះការប្រុងប្រយ័ត្នរបស់អ្នកបើបរម៉ូតូ។ ជនរងគ្រោះមានឈ្មោះ រ៉យ ត្រើន ជាចៅសង្កាត់រមនា មានអាយុ៤៨ឆ្នាំ ។
បច្ចុប្បន្នសាកសពជនរងគ្រោះត្រូវបានក្រុមគ្រួសារ ដឹកយកទៅធ្វើបុណ្យតាមប្រពៃណី ចំណែកម៉ូតូ និងរថយន្ត សមត្ថកិច្ចបានអូសយកមករក្សាទុក នៅស្នងតការដ្ឋាននគរបាលខេត្តមណ្ឌលគិរី ដើម្បីដោះស្រាយតាមច្បាប់ ៕
ដោយ៖ ឦសាន
