ព្យុះកំណាច Florence បានបំផ្លាញ ពីររដ្ឋ គឺរដ្ឋ ការ៉ូលីណា ខាងជើងនិង ខាងត្បូង បំផ្លាញទ្រព្យសម្បត្តិនិងអាយុជីវិតជាច្រើន ។ មកទល់ពេលនេះពលរដ្ឋនៅមិនទាន់អាចវិលត្រឡប់ទៅកាន់ ផ្ទះសម្បែងរបស់ខ្លួននៅឡើយ ទេ។
ប្រធានាធិបតីអាមេរិក នៅព្រឹកថ្ងៃទី២០ខែកញ្ញា បានទៅកាន់តំបន់ភាគខាងជើង រដ្ឋ Carolina ដើម្បីត្រួតពិនិត្យ ការខូចខាត និងសួរសុខទុក្ខដល់ពលរដ្ឋ ដែលរងគ្រោះដោយព្យុះ Florence បង្ករឡើង។
នៅតំបន់ New Bern ភាគខាងជើង រដ្ឋ Carolina ប្រធានាធិបតីត្រាំ បានចែកចាយស្បៀងអាហារដល់ពលរដ្ឋ ដោយផ្ទាល់ដៃ ។ ពលរដ្ឋក្នុងតំបន់បានបង្ហាញការសប្បាយចិត្តខ្លាំង ដែលបានប្រធានាធិបតី មកសួរសុខទុក្ខបើទោះបីពលរដ្ឋរងការបាត់បង់ទ្រព្យសម្បត្តិជាច្រើនដោយការបំផ្លាញពីព្យុះFlorence។
តាមរបាយការណ៍ ពីមន្ត្រីគ្រប់គ្រងគ្រោះអាសន្នក្នុងតំបន់បានបញ្ជាក់ថា ព្យុះ Florence បានសម្លាប់មនុស្ស ៣៧នាក់ ។ក្នុងពេលជាមួយគ្នានេះ អភិបាលរដ្ឋ North Carolina បានអំពាវនាវដល់ពលរដ្ឋ រាប់ពាន់នាក់ ដែលបានភៀសខ្លួន កុំទាន់វិលត្រឡប់ទៅកាន់ផ្ទះរបស់ខ្លួនវិញដោយសារស្ថានភាព មិនទាន់អំណោយផល។
លោកត្រាំបានបញ្ជាក់ពេលទៅសួរសុខទុក្ខពលរដ្ឋថា«យើង នឹងមិនភ្លេចនូវការបាត់បង់របស់អស់លោកអ្នកនោះឡើយយើងនឹងមិនបោះបង់លោកអ្នកឡើយ »។
នៅក្នុងដំណើរទៅសួរសុខទុក្ខពលរដ្ឋ រងគ្រោះដោយសារព្យុះ របស់ប្រធានាធិបតីដូណាលត្រាំលើកនេះមិនឃើញមានភរិយារបស់លោក ទៅជាមួយនោះឡើយ ដោយសារតែកន្លងមក ពេលទៅសួរសុខទុក្ខពលរដ្ឋរងគ្រោះដោយព្យុះដូចគ្នា ភរិយារបស់លោកត្រាំរងការរិះគន់យ៉ាងខ្លាំង ពេលពាក់ស្បែកជើងគេង ទៅតំបន់រងគ្រោះដោយព្យុះនិងទឹកជំនន់៕
ដោយ៖ មែវ សាធី
