នៅក្នុងសន្តរកថា នៅមហាសន្និបាទអង្គការសហប្រជាជាតិ ប្រធានាធិបតីកូរ៉េខាងត្បូង លោក​ម៉ូនជេអីន​បានអំពាវនាវ​ឲ្យបណ្តាប្រទេសជុំវិញពិភពលោក មានសកម្មភាពវិជ្ជមាន ទៅលើកូរ៉េខាងជើង ក្រោយពេលមេដឹកនាំ គីមជុងអ៊ុន មានជម្រើសថ្មី នៅក្នុងការបោះបង់កម្មវិធីបរមាណូ ដើម្បីអភិវឌ្ឍន៍សេដ្ឋកិច្ច។

   សារព័ត៌មាន​ Channel News Asia ​បានផ្សាយថា៖ លោក​ Moon ​បានសសើរដល់មេដឹកនាំកូរ៉េខាងជើង គីម ជុងអ៊ុន ចំពោះមុខមេដឹកនាំជុំវិញពិភពលោក នៅក្នុងមហាសន្និបាត ។ លោក ម៉ូន បញ្ជាក់ថា មេដឹកនាំកូរ៉េខាងជើងបានផ្លាស់ប្តូរនយោបាយ នៅឧប្បទ្វីបកូរ៉េ លុបការប្រឈមមុខដាក់គ្នា ដើម្បីទទួលបានសន្តិភាពនិងការអភិវឌ្ឍន៍។

លោក ម៉ូន បញ្ជាក់ថា «កូរ៉េខាងជើង បានសម្រេចបោះបង់ចោលភាពឯកកោជាច្រើនឆ្នាំ​កន្លងមក ដោយវិលត្រឡប់ចូលជាមួយសហគមន៍ អន្តរជាតិជាថ្មីឡើងវិញ ។ នេះជាពេលវេលាដែលសហគមន៍អន្តរជាតិ​ ត្រូវតែមានសកម្មភាពវិជ្ជមាន ទៅលើជម្រើសនយោបាយថ្មីរបស់មេដឹកនាំគីមជុងអ៊ុន ។

ប្រធានាធិបតីកូរ៉េខាងត្បូង​បានលើកឡើងពីគម្រោងអនុវត្ត ជាច្រើនដំណាក់កាលនៅក្នុងការ​លុបបំបាត់បរមាណូ និងមីស៊ីលនៅកូរ៉េខាងជើង  ដើម្បីទទួលការលុបទណ្ឌកម្មពី អង្គការសហប្រជាជាតិ។ ប៉ុន្តែសំណើររបស់ភាគីកូរ៉េខាងត្បូង បង្ករឲ្យមានការមន្ទិលសង្ស័យពីអាមេរិកនិងជប៉ុន ដោយប្រទេសទាំងពីរបានបញ្ជាក់ថា កូរ៉េខាងជើង ចាំបាច់ត្រូវតែលុប បំបាត់បរមាណូទាំងស្រុង ទើបលុបទណ្ឌកម្ម។

ប៉ុន្តែប្រធានាធិបតីកូរ៉េខាងត្បូង វិញ បានលើកឡើងថា សហគមន៍អន្តរជាតិ​ គួរតែមាន សុទិដ្ឋិនិយមចំពោះ មេដឹកនាំគីមជុងអ៊ុន​។ លោកបន្តទៀតថា «យើងចាំបាច់ត្រូវតែ ជួយ លោក គីម ឲ្យមានទំនុកចិត្តនិង ទឹកចិត្តនៅក្នុងការរំសាយអាវុធបរមាណូនិងមីស៊ីល ដែលជាសកម្មភាពត្រឹមត្រូវបំផុត។យើងត្រូវតែលើកទឹកចិត្ត ដើម្បីឲ្យដើរនៅលើវិថីសន្តិភាព យូរអង្វែង បញ្ចប់ការប្រឈមមុខដាក់គ្នា។

ជាមួយគ្នានេះដែរ រដ្ឋមន្ត្រីក្រសួងការបរទេសអាមេរិក លោក​ Mike Pompeo ​បានជួបជាមួយសមភាគី​កូរ៉េខាងជើង លោក​ Ri yong Ho នៅទីក្រុងញ៉ូវយ៉ក ហើយក្រោយមក រដ្ឋមន្ត្រីការបរទេសអាមេរិកបានប្រកាសថា នឹង វិលត្រឡប់ទៅកាន់ទីក្រុងព្យុងយ៉ាងនៅខែក្រោយដើម្បីជម្រុញការរំសាយបរមាណូ កាន់តែលឿន។

កាលពីឆ្នាំ ២០១៧ អាមេរិកនិង អង្គការសហប្រជាជាតិ បានអនុម័តដាក់ទណ្ឌកម្ម ដល់ទៅ ៣លើក​លើសេដ្ឋកិច្ចកូរ៉េខាងជើង ដើម្បីកាត់បន្ថយប្រភពចំណូលសម្រាប់បម្រើវិស័យ ផលិតបរមាណូ ។  ពេលនេះ ទាំងចិននិងរុស្ស៊ី បានស្នើរដល់អាមេរិក លុបទណ្ឌកម្មកូរ៉េខាងជើង ដើម្បីជាកម្លាំងជម្រុញដល់ទីក្រុងព្យុងយ៉ាង អនុវត្តនៅការសន្យារបស់ខ្លួនឲ្យបានឆាប់បំផុត។

បើទោះបី ទំនាក់ទំនងរវាងអាមេរិក​និងកូរ៉េខាងជើង ល្អប្រសើរជាងមុន ប៉ុន្តែ អាមេរិក បានកត់សម្គាល់ឃើញថា​កូរ៉េខាងជើង នៅតែមិនទាន់មានជំហានច្បាស់លាស់ក្នុងការ រំសាយអាវុធ បរមាណូ ។ នៅក្នុងជំនួប​ថ្មី រវាងមេដឹកនាំកូរ៉េទាំងពីរ លោក គីមជុអ៊ុន បានយល់ព្រម រំលាយទីតាំងសាកល្បង បរមាណូនិងមីស៊ីល ក្រោមការ ឃ្លាំមើលពីអន្តរជាតិ ប្រសិនបើទីក្រុងវ៉ាស៊ីនតោន មានសកម្មភាព វិជ្ជមាននោះ។

តើនឹងមានទំនុកចិត្តថា​មេដឹកនាំកូរ៉េខាងជើង ព្រមបោះបង់កម្មវិធីបរមាណូ ដែលបានខិតខំអភិវឌ្ឍន៍ទាំងលំបាក?

ប្រធានាធិបតីកូរ៉េខាងត្បូង លោក ម៉ូនជេអីន បាន សង្កត់ធ្ងន់ថា ថ្វីបើ មេដឹកនាំ គីម ជុងអ៊ុន ជាមេដឹកនាំវ័យក្មេង​ តែលោកជាមនុស្សយល់ដឹង ហេតុផល ជាមនុស្សស្មោះត្រង​និងគោរពទៅតាមពាក្យសន្យារបស់ខ្លួន គ្រប់ពេល វេលា។ 

   លោកធ្លាប់បានសន្យាជួយពលរដ្ឋកូរ៉េខាងជើងរួចផុតពី សង្គ្រាម និងភាពក្រីក្រ ហើយពេលនេះ លោក គីម កំពុងតែអនុវត្ត។កន្លងមក លោក គីម បានសន្យាថា «លុបបំបាត់​អាវុធនុយក្លេអ៊ែរ​ចោល​ទាំងស្រុង​ពីឧបទ្វីប​កូរ៉េ» ពេលនេះអ្វីដែលលោក​ និយាយកំពុងតែក្លាយទៅជាការពិត បន្តិចម្តងៗ។

នៅក្នុងបទ​សម្ភាសន៍ជាមួយស្ថានីយ​ទូរទស្សន៍អាមេរិក Fox News នៅថ្ងៃអង្គារនេះ (ម៉ោង​នៅអាមេរិក) លោក មូន ជែអ៊ីន ក៏បានអះអាងដែរថា លោកមាន​ជំនឿចិត្តយ៉ាងមុតមាំ​ថា កូរ៉េខាងជើង នឹងរំសាយចោល​អាវុធនុយក្លេអ៊ែរ ព្រោះវាគឺជាពាក្យ​សន្យាចេញពី​មាត់របស់​លោក គីម ជុងអ៊ុន។ 

នៅក្នុងបទសម្ភាសន៍នោះ លោក មូន បានសង្កត់ធ្ងន់យ៉ាងដូច្នេះថា «ខ្ញុំជឿថា មនុស្សជា​ច្រើនមិន ជឿឡើយថា កូរ៉េខាងជើង​នឹងរំសាយអាវុធ​នុយក្លេអ៊ែរ​តាមការសន្យា ដោយសារតែ​ការសន្យា និងកិច្ចព្រមព្រៀង​បែបនេះបាន​បរាជ័យ​ជាច្រើនដងរួចមក​ហើយ… ក៏ប៉ុន្តែកិច្ចព្រមព្រៀង​ចុងក្រោយនេះ គឺខុសគ្នា​ទាំងស្រុងពីកិច្ចព្រមព្រៀង​មុនៗ ដ្បិតវាត្រូវបាន​ព្រមព្រៀង ដោយ​ប្រធានាធិបតីអាមេរិក និងមេដឹកនាំ​កូរ៉េខាងជើង​ដោយផ្ទាល់»។

គួររំលឹកថា លោក គីម ជុងអ៊ុន បានសន្យារំសាយ​អាវុធនុយក្លេអ៊ែររបស់ខ្លួន នៅក្នុងជំនួបកំពូល​នៅសិង្ហបុរី កាលពីថ្ងៃទី១២ ខែមិថុនា ជាមួយលោក ដូណាល់ ត្រាំ។ ប៉ុន្តែ​អ្នកជំនាញជាច្រើន បានរិះគន់​លើកិច្ចព្រមព្រៀងនេះ​ដោយអះអាងថា វាមិនបានបញ្ជាក់​លម្អិតពីមធ្យោបាយ​ជាក់លាក់ ក្នុងការរំសាយ​អាវុធនុយក្លេអ៊ែរឡើយ។

បច្ចុប្បន្ន​លោក មូន ជែអ៊ីន កំពុងស្ថិតនៅក្នុង​សហរដ្ឋមេរិក ដើម្បីចូលរួមកិច្ចប្រជុំ​មហាសន្និបាតអង្គការ​សហប្រជាជាតិ​ក្នុងទីក្រុង ញូយ៉ក ខណៈមានការរំពឹងទុក​ជាច្រើនថា ក្រុមមន្ត្រីកូរ៉េខាងជើង និងអាមេរិក នឹងជួបពិភាក្សា​គ្នាស្ដីពីការរៀបចំ​ជំនួបកំពូលរវាង លោក ត្រាំ និង​លោកគីម ជាលើកទី ២។

​ជាមួយគ្នានេះដែរ មេដឹកនាំកូរ៉េខាងជើង គីមជុងអ៊ុន នឹងបំពេញទស្សនកិច្ច​ទៅកាន់ ទីក្រុងសេអូល កូរ៉េខាងត្បូង នៅក្នុងខែធ្នូឆ្នាំ នេះ ដើម្បីបន្តរិតចំណងមិត្តភាព សាមគ្គីភាពរវាងបងប្អូន កូរ៉េទាំងពីរ ។ ក្រុមអ្នកឯកទេសបានលើកឡើងថា ប្រសិនបើ លោក គីមទៅកាន់កូរ៉េខាងត្បូង ហើយ មានជំនួបជាលើកទីពីរ ជាមួយប្រធានាធិបតីអាមេរិក នោះ ការរំសាយបរមាណូ នឹងត្រូវធ្វើឡើងក្នុងពេលឆាប់ មុនការគ្រោង ទុក៕

ដោយ៖ មែវ សាធី