ខេត្តកោះកុងៈ យុវជនម្នាក់ ស្រវឹងស្រា បើកបរម៉ូតូក្នុងស្ថានភាពល្បឿនលឿនមិនពាក់មួកសុត្ថិភាពមក ដល់លើស្ពានដែក បណ្ដាលឲ្យរអិលដួលខ្លួនឯងបោកក្បាលស្លាប់យ៉ាងអាណោចអាធ័មក្រោយពេល បញ្ជូនមកព្យាបាលនៅមន្ទីរពេទ្យបង្អែកខេត្តបានមួយស្របក់។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២និង៣០នាទីរសៀល ថ្ងៃ សុក្រ ១១ រោច ខែ ភទ្របទ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៥ ខែតុលា ឆ្នាំ២០១៨ នៅចំណុចលើស្ពានដែកផ្លូវប៉ាក់ខ្លង ឃុំប៉ាក់ខ្លង ស្រុកមណ្ឌលសីមា ខេត្តកោះកុង។
មន្រ្តីនគរបាល ស្រុកមណ្ដលសីមាបានឲ្យដឹងថា ជនរងគ្រោះឈ្មោះ ខ្មៅ ម៉ៃ ភេទប្រុស អាយុ២២ឆ្នាំ មុខរបរ កម្មករ មាទីលំនៅភូមិចាំយាម ឃុំប៉ាក់ខ្លង ស្លាប់ក្រោយពេល បញ្ជូនមកព្យាបាលនៅមន្ទីរពេទ្យបង្អែកខេត្តបានតែបន្តិច ។
ក្រោយកើតហេតុ សមត្ថកិច្ចជំនាញចរាចរណ៍ទៅដល់វាស់វែងហើយបានប្រគល់សពជនរងគ្រោះឲ្យក្រុមគ្រួសារធ្វើបុណ្យតាមប្រពៃណី ៕