ភ្នំពេញ៖ ក្តីកង្វល់របស់ផលិតករចំពោះហានីភ័យនៃវិស័យភាពយន្តខ្មែរនៅលើទីផ្សារក្នុងស្រុកនៅតែកើតមាននៅឡើយខណៈការជួយជ្រោមជ្រែងពីស្ថាប័នដែលពាក់ព័ន្ធនឹងវិស័យនេះមិនទាន់ត្រូវបានយកចិត្តទុកដាក់បានទូលំទូលាយនៅឡើយ។ ក្រៅពីនេះផលិតករក៏បានបង្ហាញក្តីព្រួយបារម្ភនៃការធ្លាក់ចុះជាថ្មីនៃវិស័យមួយនេះក្រោយពីសង្កេតឃើញរោងភាពយន្តដែលបានទិញសិទ្ធិរឿងបរទេសល្បីៗ មកដាក់បញ្ចាំងឲ្យជល់ចំថ្ងៃតែមួយនឹងការចាប់ផ្តើមចាក់បញ្ចាំងភាពខ្មែរ។
ចាប់ពីដើមឆ្នាំ ២០១៨មកគេសង្កេតឃើញថាចំនួនភាពយន្តខ្មែរដែលប្រកាសសម្ពោធដាក់បញ្ចាំងនៅលើរោងភាពយន្តទំនើបៗហាក់មានការថយចុះបើធៀបនឹងឆ្នាំមុនៗ។ ថយចុះក្រោយពីផលិតករជាច្រើនបានសម្រេចចិត្តផ្អាកការផលិត និងអ្នកខ្លះត្រឹមបន្ថយការផលិតយោងលើហេតុផលមិនអាចទប់ទល់នឹងការចំណាយ ជាច្រើន និងប្រឈមនឹងការខាតបង់ច្រើន ដែលក្នុងនោះក៏ត្រូវប្រឈមរួមទាំងប្រថុយនឹងការចាក់បញ្ចាំងដំណាលគ្នានឹងភាពយន្តបរទេសល្បីៗជុំវិញពិភពលោក។
ជាក់ស្តែងថ្មីៗនេះភាពយន្តខ្មែរបែបរន្ធត់រឿង”ចងពារ” ដែលត្រូវប្រកាសចាក់បញ្ចាំងលើកដំបូងនៅថ្ងៃទី៥ខែតុលានេះ ត្រូវជួបជាមួយដៃគូប្រជែងនឹងភាពយន្តរបស់ឥណ្ឌូនេស៊ីបែបរន្ធត់ដូចគ្នាគឺរឿង”សំណែនខ្មោច”។ ការបារម្ភនេះដែរស្របពេលដែលគេគិតថាអ្នកទស្សនាអាចនឹងមានអារម្មណ៍រារែកនឹងសម្រេចចិត្តជ្រើសរើសការចូលទស្សនាភាពយន្តបរទេសជំនួសការចូលទស្សនាភាពយន្តខ្មែរនោះ។
ប្រធានសមាគមភាពយន្តកម្ពុជា លោក ឆាយ បូរ៉ា បានបញ្ជាក់នៅលើហ្វេសប៊ុកផ្ទាល់ថា”រឿងខ្មែរដ៏កំសត់ ត្រូវមកជល់ជាមួយរឿងបរទេសដ៏សម្បើម ដែលជាប្រភេទរឿង ខ្មោចដូចគ្នា។លោកបន្តថា “រឿងប្រភេទខុសគ្នាខ្ញុំមិនថា តែនេះរឿង អាស៊ី ប្រភេទរឿងខ្នោចដូចគ្នា។ ចេញថ្ងៃតែមួយដូចគ្នា”។ លោកចោទសួរជាសំណួរថាតើវាសនារឿងខ្មែរទៅជាយ៉ាងណា? លោកពិតជានឹកស្មានមិនដល់ ថាពេលវេលាមានច្រើន ថ្ងៃណាក៏អាចដាក់បញ្ចាំងបាន ហេតុអីបានជាមិនដាក់រឿងទាំងពីរអោយឃ្លាតគ្នាបន្តិចទៅ? ទុកឱកាស់អោយរឿងខ្មែរដកដង្ហើម បានខ្លះផងបានទេ លោកម្ចាស់អ្នកដាក់កម្មវិធី ? ភាពយន្ត ខ្មែររអិល មកដល់មាត់ជ្រោះហើយ កុំរុញខ្នងបន្ថែមអី។ ប្រសិនបើអ្នកជាជនបរទេស អ្នកប្រហែលមិនយល់ពីការឈឺចាប់មួយនេះទេ។
លោក ឆាយ បូរ៉ា លើកឡើងថា កង្វះបទពិសោធន៍ផលិតរបស់ផលិតករខ្មែរមួយចំនួននាពេលបច្ចុប្បន្ន កំពុងតែទាញទម្លាក់វិស័យភាពយន្តខ្មែរឱ្យធ្លាក់ចុះជាថ្មីម្ដងទៀត។ លោក ឆាយ បូរ៉ា អះអាងដូច្នេះ ដោយមើលឃើញកុនខ្មែរជាច្រើននាពេលថ្មីៗ បានដាក់បញ្ចាំងតាមរោងភាពយន្តនានា ហាក់មិនសូវទទួលការគាំទ្រពីទស្សនិកជន ព្រោះតែគុណភាព ភាពយន្តរបស់ផលិតករខ្លះនៅមានកម្រិតទាប ខណៈកុនបរទេសកំពុងវាយលុកខ្លាំង។ផលិតករ និងជាចាងហ្វាងផលិតកម្ម ដើមត្នោត រូបនេះ និយាយថា ក្នុងចំណោមភាពយន្ត ១០ ដែលបានដាក់បញ្ចាំងតាមបណ្ដារោងភាពយន្ត គឺមានតែ ២ទៅ៣រឿងប៉ុណ្ណោះ អាចរកចំណូលបាន ហើយចំណូលនោះទៀតសោធ គឺភាគច្រើនបានត្រឹមទប់ទល់នឹងការចំណាយប៉ុណ្ណោះ ខណៈ៧ ទៅ៨រឿងផ្សេងទៀត គឺតែងតែខាត។
ថ្លែងបញ្ជាក់ពីទុក្ខលំបាកស្រដៀងគ្នានេះផងដែរ ចាងហ្វាងផលិតកម្ម RED Picture បានលើកឡើងថា”អ្នកពិបាកខ្លាំងគឺរឿងខ្មែរប្រាកដណាស់ ព្រោះរឿងបរទេគេយកមកតម្លៃថោក បើខាតក៏ខាតតិចភាគលាភខុសគ្នា ៥ភាគរយ។លោកថា រឿងខ្មែរទោះរឿងខ្លាំងតែក៏ត្រូវបែងចែកកៅអី ចំណាយច្រើន តិចទៀតលោកត្រូវទៅនាំរឿងបរទេសមកបញ្ចាំងម្តងវិញហើយមើលទៅ ថតរឿងខ្មែរមួយរឿងអាចយករឿងបរទេសមកបញ្ចាំង៣រឿងឯណោះ។
អ្នកដឹកនាំសម្តែង លោក មានុតរាជ បានថ្លែងស្រដៀងគ្នានេះដែរថាបញ្ហាប្រឈមនៃវិស័យភាពយន្តនៅតែច្រើនហើយផលិតករ ទាំងអស់នៅតែលើកជាសំណើរដដែលដែលចង់ឲ្យមានការជួយពីស្ថាប័នពាក់ព័ន្ធពិសេសក្រសួងវប្បធម៌ និងវិចិត្រសិល្បៈ។ លោកថាការកម្រិតចាក់បញ្ចាំងភាពយន្ត ការកំណត់ពន្ធនាំចូល និងការជួយបង្កើនចំណែកចំណូលពីការចាក់បញ្ចាំងមកឲ្យផលិតកម្ម ក៏ជាចំណែកដែលផលិតករជាច្រើនត្រូវការដើម្បីរស់បន្ត និងជំរុញឲ្យពួកគាត់មានទឹកចិត្ត មានដើមទុនបង្កើនគុណភាពប្រកួតប្រជែង។ លោកនៅតែរំពឹងថាស្ថាប័នពាក់ព័ន្ធនឹងមិនព្រងើយកន្តើយចំពោះបញ្ហាជាច្រើនរបស់ផលិតករបន្តទៅទៀតទេ៕ ដោយ វឌ្ឍនា