ភ្នំពេញ៖នគរបាលនៃអគ្គនាយកដ្ឋានអន្តោប្រវេសន៍ សហការជាមួយកម្លាំងជំនាញនៃមន្ទីរប្រឆាំងគ្រឿងញៀនក្រសួងមហាផ្ទៃ ចាប់ខ្លួនមេខ្លោងជួញដូរគ្រឿងញៀនជនជាតិប៊ែលហ្សិកម្នាក់ ។
មន្ត្រីមន្ទីរប្រឆាំងគ្រឿងញៀន បញ្ជាក់នៅថ្ងៃទី៦ ខែតុលា នេះ ថា កាលពីថ្ងៃទី៤ ខែតុលា វេលាម៉ោង ១៨៖១៥នាទី កន្លងទៅ កម្លាំងជំនាញនគរបាលនៃអគ្គនាយកដ្ឋានអន្តោប្រវេសន៍ សហការជាមួយកម្លាំងជំនាញ នៃមន្ទីរប្រឆាំងគ្រឿងញៀន បានស្រាវជ្រាវ និងឈានដល់ការចាប់ខ្លួនមេក្លោងជួញដូរគ្រឿងញៀនម្នាក់ជាជនជាតិប៊ែហ្សិក។
ការចាប់ខ្លួននេះ គឺយោងតាមដីកាបង្គាប់ឱ្យចាប់ខ្លួន-ឃុំខ្លួន ចុះថ្ងៃទី១៣ ខែកក្កដា ឆ្នាំ២០១៨ ចេញលោក ម៉េង តូនី ប្រធានក្រុមប្រឹក្សាជំនុំជម្រះ នៃសាលាដំបូង រាជធានីភ្នំពេញ ប្រព្រឹត្តចំណុចច្រកចេញដំណើរ នៃប៉ុស្តិ៍ច្រកទ្វារអន្តរជាតិបាវិត ស្ថិតក្នុងភូមិបាវិត កណ្តាល សង្កាត់-ក្រុងបាវិត ខេត្តស្វាយរៀង ។
សូមបញ្ជាក់ថា ជនជាប់ចោទរូបនេះត្រូវបានតុលាការកាត់ទោសកំបាំងមុខ ដោយផ្តន្ទាទោសដាក់ ពន្ធនាគារ អស់មួយជីវិត និងពិន័យជាប្រាក់ចំនួន ៨០លានរៀល ពាក់ព័ន្ធនឹងករណីជួញដូរគ្រឿង ញៀនឆ្លងដែនដោយខុសច្បាប់ តាមជើងអាកាស ពីប្រទេសប្រេសីល ឆ្លងកាត់ថៃ ចូល មកកម្ពុជា ដែលសមត្ថកិច្ចកម្លាំងជំនាញបានបង្រ្កាបកាលពីថ្ងៃទី១០ ខែមករា ឆ្នាំ២០១៨ វេលាម៉ោង២០៖១៣នាទី នៅចំណុចច្រកអ្នកដំណើរ ៕
ដោយ៖ ចេស្តា
