ភ្នំពេញ៖ បុរស ម្នាក់ដែលសមត្ថកិច្ចសង្ស័យផឹកស្រាស្រវឹងបានបើករថយន្ត រេចង្កូតទៅបុករនាំងបាំងក្បាលរ៉ូប៊ីណេទឹកបណ្តាលឲ្យវៀចចង់បាក់ហើយជ្រុលទៅបុកបង្គោលភ្លើងបំភ្លឺផ្លូវអស់មួយដើមទៀត ។
ឧប្បត្តិហេតុនេះកើតឡើងនៅវេលាម៉ោង២និង៤០នាទីរំលងអធ្រាត្រ ឈានចូលថ្ងៃទី២៧ខែវិច្ឆិកាឆ្នាំ២០១៥នេះ ត្រង់ចំណុចមុខច្រកចូលភោជនីយដ្ឋានឡាក់គីស្តារនិងផ្កាឈូកទិព្វ លើកំណាត់ផ្លូវព្រះមុនីរ៉េត ក្នុងសង្កាត់ផ្សារដើមគ ខណ្ឌទួលគោក។
ប្រភពព័ត៌មានពីនគរបាលប៉ុស្តិ៍ផ្សារដើមគ បានឲ្យដឹងថា មុនពេលកើតហេតុមានបុរសមិនស្គាល់ឈ្មោះម្នាក់ បើករថយន្តម៉ាកកូរ៉ូឡាពណ៌ទឹកប្រាក់ពាក់ស្លាកលេខភ្នំពេញ 2K 4976តាមបណ្តោយផ្លូវព្រះមុនីរ៉េតក្នុងទិសដៅពីលិចទៅកើតដោយស្ថានភាពស្រវឹងហើយងងុយដេក។ លុះមកដល់ចំណុចកើតហេតុរថយន្តនេះបានរេចង្កូតមកខាងស្ដាំទៅបុកចំរនាំងដែកដែលដាក់ឃាំងក្បា លរ៉ូប៊ីណេទឹករបស់អង្គភាពពន្លត់អគ្គីភ័យលាន់ស្នូរដូចរន្ទះបណ្ដាលអោយវៀចចង់បាក់ដល់ដីហើយរថយន្តមិនទាន់ អស់ល្បឿនបានជ្រុលទៅជាប់បង្គោលភ្លើងបំភ្លឺផ្លូវទើបរថយន្តទៅមុខលែង។
ប្រភពព័ត៌មានដដែលឲ្យដឹងទៀតថា ក្រោយពេលកើតហេតុរថយន្តបង្កទៅមុខលែងរួច ហើយក្រឡេកមើលអ្នកបើកបរនៅក្នុងរថយន្តមិនមិនមានរងរបួសទេ ទើប សមត្ថកិច្ចស្ទួចយករថយន្តនេះនិងនាំអ្នកបើកបរស្រវឹងទៅកាន់ការិយាល័យនគរបាលចរាចរណ៍ផ្លូវគោក ដើម្បីចំណត់ការសងសំណងខូចខាតរបស់រដ្ឋ ៕
ដោយ៖ ប្រាថ្នា
