ខេត្តពោធិ៍សាត់៖ ស្ទាវបើកម៉ូតូលឿនដូចហោះក្នុងទីប្រជុំជនជ្រុលបុកលោកយាយដើរឆ្លងផ្លូវពេញទំហឹងបណ្តាលឱ្យរងរបួសធ្ងន់ ពេលបញ្ជូនទៅសង្គ្រោះស្លាប់ ។

កាលពីវេលាម៉ោង ២២និង១៥នាទីយប់ ថ្ងៃទី២៥ ខែវិច្ឆិកា ឆ្នាំ២០១៥ ត្រង់ចំណុចកោះសំពៅមាស ស្ថិតក្នុងភូមិក្បាលហុង សង្កាត់ផ្ទះព្រៃ ក្រុង-ខេត្តពោធិ៍សាត់ ។

ប្រភពពីនគរបាលចរាចរណ៍ខេត្តប្រាប់ថា លោកយាយរងគ្រោះស្លាប់មានឈ្មោះ គី ឈា អាយុ៦២ឆ្នាំ រស់នៅភូមិ-សង្កាត់កើតហេតុ ហើយការគ្រោះថ្នាក់ខាងលើ ខណៈគាត់ដើរឆ្លងក្នុងទិសដៅពីកើតមកលិចលុះឆ្លងជិតដល់ចិញ្ចឹមផ្លូវស្រាប់តែមានម៉ូតូមួយគ្រឿង មកបុកពេញទំហឹងបណ្ដាលឱ្យរងរបួសធ្ងន់ដូចគ្នា រួចបញ្ជូនទៅមន្ទីរទេព្យបង្អែកខេត្តពោធិ៍សាត់ភ្លាមៗ ប៉ុន្តែគ្រានោះលោកយាយបានស្លាប់ទៅហើយ ។

ប្រភពបន្តថា យុវជនរងរបួសធ្ងន់ដែរនោះឈ្មោះ ប៉ក់ ស៊ីក អាយុ២០ឆ្នាំ រស់នៅភូមិ-ឃុំវាល ស្រុកកណ្ដៀង ខេត្តពោធិ៍សាត់ ជាអ្នកបើកបរម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខ បាត់ដំបង1E-2253 ធ្វើដំណើរក្នុងទិសដៅពីត្បូងទៅជើង ។

ប្រភពបញ្ជាក់ទៀតថាវត្ថុតាងម៉ូតូយកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត ចំណែកជនរងរបួសដែរនោះ និងអ្នកបើកបរម៉ូតូជំនាញកំពុងដាក់កម្លាំងការពារដើម្បីបន្តតាមនិតិវិធី ៕

ដោយ៖ ប៉ឹម ពិន