ខេត្តកោះកុង៖ ស្នេហាយុវវ័យបច្ចុប្បន្នដូចផ្លេកបន្ទោរ ឃើញភ្លាម ស្រឡាញ់ភ្លែត ។ មិនត្រឹមតែប៉ុណ្ណោះ ពិធីសាស្ត្រនៃការទាក់ទង ក៏មិនលំបាកនោះដែរ ។ បច្ចេកវិទ្យាទំនើបក្រៅពីប្រព័ន្ធទូរស័ព្ទ គេក៏អាចទាក់ទងគ្នាតាមបណ្តាញផ្សេងៗ ដូចជាហ្វេសប៊ុកជាដើម ។ មានអ្នករងគ្រោះច្រើនហើយដោយសារហ្វេសប៊ុកនេះ ។ ប៉ុន្តែល្បិចនៃដៃគូស្នេហាតាមរយៈហ្វេសប៊ុកនៅតែមានវិធីច្រើនយ៉ាង ។
ជាក់ស្តែងបុរសម្នាក់ឈ្មោះ លឹម ម៉េង ជាមន្ត្រីយោធាបម្រើការនៅរាជធានីភ្នំពេញ ត្រូវបាននគរបាលព្រហ្មទណ្ឌនៃស្នងការដ្ឋាននគរបាលខេត្តកោះកុងឃាត់ខ្លួនតាមបណ្តឹងរបស់នារីស្រស់ស្អាត២នាក់ថា បាននាំនាងពីភ្នំពេញមកលេងខេត្តកោះកុងបានមួយយប់ លុះព្រឹកឡើង ក៏លួចទូរស័ព្ទអាយហ្វូន២គ្រឿង (Iphone 6មួយគ្រឿង និង Iphone6 plus មួយគ្រឿង ) និងប្រាក់មួយចំនួន ហើយធ្វើដំណើរត្រឡប់មកភ្នំពេញម្នាក់ឯង ចោលពួកនាងនៅទីនោះ ។
លោក ឡាយ ម៉េងឡាំង ប្រធានការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកោះកុងបានឲ្យដឹងនៅព្រឹកថ្ងៃទី២៧ ខែវិច្ឆិកាថា យោងតាមបណ្តឹងពីនារីរងគ្រោះបានឲ្យដឹងថា បុរសឈ្មោះ លឹម ម៉េង អាយុ២៣ឆ្នាំអះអាងប្រាប់នារីរងគ្រោះថា ជាមន្ត្រីយោធា និងជាចៅរបស់លោកជំទាវដ៏មានឥទ្ធិពលម្នាក់ បានបបួលពួកនាងមកលេងខេត្តកោះកុង ក្នុងឱកាសព្រះរាជពិធីបុណ្យអុំទូក អកអំបុក សំពះព្រះខែ ។ នៅពេលមកដល់ខេត្តកោះកុង ពួកគេបានសម្រាកនៅក្នុងសណ្ឋាគារមួយ ហើយព្រឹកឡើង ស្រាប់តែឈ្មោះ លឹម ម៉េង បានប្រមូលយកទូរស័ព្ទ និងលុយមួយចំនួនគេចខ្លួនបាត់ ។ ពេលនោះ ពួកនាងៗបានទាក់ទងបងប្អូននៅរាជធានីភ្នំពេញ ។ បងប្អូនពួកនាងដែលជាមន្ត្រីនគរបាលនៅរាជធានីភ្នំពេញបានទាក់ទងមន្ត្រីនគរបាលខេត្តកោះកុង ឲ្យនាងដាក់ពាក្យប្តឹងនៅទីនោះ ។
មន្ត្រីនគរបាលនៃស្នងការដ្ឋាននគរបាលរាជធានីភ្នំពេញបានចាប់បុរសសង្ស័យនៅរាជធានីភ្នំពេញកាលពីថ្ងៃទី២៦ ខែវិច្ឆិកា ហើយបញ្ជូនត្រឡប់ទៅខេត្តកោះកុងវិញ ។
លោកឡាយ ម៉េងឡាំង បានឲ្យដឹងថា ជនសង្ស័យ នឹងត្រូវកសាងសំណុំរឿងបញ្ជូនទៅសាលាដំបូង ។ លោកបានបន្តថា នៅពេលសាកសួរជនសង្ស័យបានធ្វើឲ្យសមត្ថកិច្ចខេត្តកោះកុងវិលក្បុង ដោយម្តងនិយាយអីចេះ ម្តងអីចុះ និងបានអះអាងថា ខ្លួនជាចៅរបស់លោកជំទាវម្នាក់ផង ។ នៅពេលនោះគេឃើញលោកជំទាវម្នាក់កំពុងព្យាយាមរត់ការដោះស្រាយដើម្បីឲ្យជនសង្ស័យបានរួចពីការចោទប្រកាន់ ។
គេកំពុងរង់ចាំមើលថា តើសមត្ថកិច្ចនគរបាលខេត្តកោះកុង និងសាលាដំបូងខេត្តនេះ ចាត់វិធានការសំណុំរឿងនេះយ៉ាងដូចម្តេច? ឬមួយក៏ត្រូវខ្លាចឥទ្ធិពលលោកជំទាវម្នាក់នោះមែន? បើយ៉ាងដូច្នេះ អាចនឹងមានផ្សេងបន្តទៀត ក្រៅពីនារី២នាក់ខាងលើនេះ ៕
ដោយ៖ ហេង សូរិយា
