ភ្នំពេញ៖ កញ្ញា ឌី លីកា Miss Grand Cambodia ដែលបានស្លៀកឈុតតំណាងជាតិ មានឈ្មោះថា “ទេពីស្រីសួគ៌បវរឦសានបុរៈ” បន្តទទួលបានពិន្ទុខ្ពស់ជាងគេបំផុតពីការ Like និង Share ក្នុងព្រឹត្តិការណ៍ប្រកួតសម្រស់ Miss Grand International 2018នៅប្រទេសមីយ៉ាន់ម៉ា។
ក្រោយដាក់ឲ្យមានការបោះឆ្នោតជុំទី២ស្វែងរកអ្នកមានពិន្ទុខ្ពស់ជាងគេនោះគឺពេលនេះគេបានរកឃើញកញ្ញាឯកទាំង៥នាក់រួចហើយក្នុងនោះកម្ពុជាបន្តនាំមុខអស់កញ្ញាឯកទាំងអស់។ ការប្រកាសនេះធ្វើឡើងក្រោយពីកញ្ញាឯកកម្ពុជាត្រូវជួបប្រកួតជាមួយម្ចាស់ម្កុដកំពូលសម្រស់ប្រចាំប្រទេស១០ផ្សេងទៀតដែលត្រូវបានជ្រើសរើសដោយគណកម្មការ។
លំដាប់ពិន្ទុ លើឈុតតំណាងជាតិ របស់ Miss Grand កម្ពុជាបានវ៉ាដាច់ Miss Grandវៀតណាម ឈរលើកកំពូលតារាង។ ចំណាត់ថ្នាក់លេខ៣ពីការបោះឆ្នោតបានទៅលើកញ្ញាឯកមកពីប្រទេស ឥណ្ឌូនេស៊ី ចំណាត់ថ្នាក់ទី៤គឺប្រទេសមិចស៊ិចកូ និងទី៥ប្រទេស ប៉ារ៉ាហ្គាយ។ ចំណែកឯឈុតតំណាងជាតិ៥ប្រទេសផ្សេង ដែលជ្រើសរើសដោយគណៈកម្មការនៃការប្រកួត Miss Grand International 2018 នឹងត្រូវប្រកាសក្នុងពេលដ៏ខ្លីខាងមុខ នេះដើម្បីរួមគ្នាប្រកួតជាថ្មីដោយជ្រើសរើសយកម្ចាស់ជ័យលាភីស្លៀកឈុតតំណាងជាតិ ដោយការសម្រេចពីគណកម្មការប្រកួត។
គួរបញ្ជាក់ដែរថាឈុតតំណាងជាតិទាំង២០ តំណាងជាតិទាំងអស់បានដាក់ឲ្យបោះឆ្នោតនៅលើបណ្តាញសង្គមម្តងទៀត ដោយជម្រុះនៅសល់តែ១០ឈុតប៉ុណ្ណោះ ក្នុងនោះមានឈុតតំណាងជាតិចំនួន៥ ជ្រើសរើសតាមរយៈការបោះឆ្នោត និង៥ទៀតជាការជ្រើសរើសដោយគណៈកម្មការប្រកួត។
ឈុតតំណាងជាតិ Miss Grand International 2018 ដែលល្អបំផុតនឹងត្រូវជ្រើសរើសដោយគណៈកម្មការ ឯការប្រកាសលទ្ធផលធ្វើឡើងនៅវគ្គផ្តាច់ព្រ័ត្រ នាថ្ងៃទី២៥ ខែតុលា ឆ្នាំ២០១៨៕ ដោយ វឌ្ឍនា
