ខេត្តកណ្តាល៖ ស្ត្រីម្នាក់ដើរឆ្លងផ្លូវត្រឡប់មកពីជួបអតិថិជនរបស់ខ្លួនបម្រុងឡើងជិះរថយន្តឈ្នួលទៅលំនៅដ្ឋាននៅឯខេត្តកំពង់ចាមវិញ ខណៈកំពុងដើរឆ្លងផ្លូវក៏ត្រូវម៉ូតូមួយគ្រឿងបើកបុកពេញមួយទំហឹង បណ្តាលឲ្យដួលបោកទៅលើផ្លូវជាតិរងរបួសយ៉ាងធ្ងន់ធ្ងរ។ ក្រោយពីមានហេតុការណ៍កើតឡើងស្ត្រីរងគ្រោះត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យ តែជាអកុសលបានដាច់ខ្យល់ស្លាប់នៅលើរថយន្តសង្រ្គោះបន្ទាន់ ។ ដោយឡែកអ្នកបើកបរម៉ូតូត្រូវបានសមត្ថកិច្ចនគរបាលឃាត់ខ្លួន ដើម្បីកសាងសំណុំរឿងចាត់ការតាមច្បាប់ ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១៥ និង២០នាទី ថ្ងៃទី២៩ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ៦ ត្រង់ចំនុចចន្លោះស្ពានលេខ១៣-១៤ ស្ថិតក្នុងភូមិកណ្ដាល ឃុំព្រែកអញ្ចាញ ស្រុកមុខកំពូល ខេត្តកណ្ដាល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា ស្ត្រីដែលត្រូវបានម៉ូតូបុកស្លាប់នោះមានឈ្មោះរឿង ប៉េងហុង អាយុ៤៥ឆ្នាំ មុខរបរ ជាអ្នកលក់ពពុះសណ្តែក មានទីលំនៅក្នុងភូមិសាមគ្គី ឃុំបុសខ្នុរ ស្រុកចំការលើ ខេត្តកំពង់ចាម ។ ចំណែកឯអ្នកបើកបរម៉ូតូដែលត្រូវបាននគរបាលឃាត់ខ្លួននោះមានឈ្មោះ ហ៊ុំ សុខនៅ ភេទប្រុស អាយុ២១ឆ្នាំ ជនជាតិខ្មែរ មានទីលំនៅភូមិជើងឌិក ឃុំប្រាំយាម ស្រុកស្រីសន្ធរ ខេត្តកំពង់ចាម បើកម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ1E-5302 ។
ប្រភពដដែលបានបន្តថា នៅមុនពេលកើតហេតុស្ត្រីរងគ្រោះបានជិះរថយន្តពីភ្នំពេញគោលបំណងឆ្ពោះទៅខេត្តកំពង់ចាម ខណៈជិះដល់ចំណុចកើតហេតុស្ត្រីរងគ្រោះបានឲ្យរថយន្តឈ្នួលឈប់ចាំរួចក៏ចុះទៅជួបជាមួយអតិថិជនរបស់ខ្លួននៅម្ខាងផ្លូវ ។ ក្រោយពីជួបអតិថិជនរួចមកស្ត្រីរងគ្រោះបានដើរឆ្លងផ្លូវជាតិលេខ៦ក្នុងទិសដៅលិចទៅកើតឆ្ពោះទៅរថយន្តឈ្នួលដែលឈប់ចាំវិញ ។ ពេលកំពុងដើរក៏ត្រូវម៉ូតូហុងដាឌ្រីមបើកបរក្នុងទិសដៅពីត្បូងទៅជើងបុកពេញមួយទំហឹង បណ្តាលឲ្យដួលបោកទៅលើផ្លូវជាតិរងរបួសយ៉ាងធ្ងន់ធ្ងរ ។
ក្រោយពីមានហេតុការណ៍កើតឡើងស្ត្រីរងគ្រោះត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យ តែជាអកុសលបានដាច់ខ្យល់ស្លាប់នៅលើរថយន្តសង្រ្គោះបន្ទាន់ ។ ដោយឡែកអ្នកបើកបរម៉ូតូត្រូវបានសមត្ថកិច្ចនគរបាលឃាត់ខ្លួន ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
