ភ្នំពេញ៖ ស្ត្រីជនជាតិបរទេសពីរនាក់ជិះម៉ូតូឆ្លងផ្លូវ ជិះបានពាក់កណ្ដាលផ្លូវត្រូវបានបុរសម្នាក់ជាជនជាតិបរទេសដូចគ្នាជិះម៉ូតូបុកចំពីចំហៀងបណ្ដាលឲ្យរងរបួសធ្ងន់ស្រាលបីនាក់ ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២១ និង១០នាទីយប់ ថ្ងៃទី២៩ ខែវិច្ឆិកា ឆ្នាំ២០១៥ ស្ថិតនៅតាមបណ្ដោយផ្លូវ២៧១ កែងផ្លូវលេខ៤៦៤ ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ ។

ប្រភពព័ត៌មានពីប្រជាពលរដ្ឋដែលឃើញហេតុការណ៍នេះបានប្រាប់ឲ្យដឹងថា មុនពេលកើតហេតុគេឃើញមានស្ត្រីជនជាតិបទេសពីរនាក់ជិះម៉ូតូមួយគ្រឿងម៉ាកហង់ដាTODAY ពណ៌ក្រហមលាយស ពាក់ស្លាកលេខភ្នំពេញ1CB-2267 ទិសដៅពីកើតទៅលិចតាមបណ្ដោយផ្លូវ៤៦៤ ឆ្ពុះទៅផ្លូវ២៧១ ហើយបានជិះឆ្លងផ្លូវ តែបានតែពាក់កណ្ដាលផ្លូវ ស្រាប់តែមានបុរសម្នាក់ជាជនជាតិបរទេសដូចគ្នាជិះម៉ូតូហង់ដា អាត្រៃ ពណ៌សលាយខៀវ ពាក់ស្លាកលេខ ណ6364 ភព1 ជិះក្នុងទិសដៅពីត្បួងទៅជើង តាមបណ្ដោយផ្លូវ២៧១ ក្នងល្បឿនលឿនល្មម ខណៈដែលមកដល់ចំណុចកើតហេតុបានជ្រុលទៅបុកម៉ូតូToday  ដែលជិះដោយស្ត្រីពីរនាក់នោះពេញទំហឹងតែម្ដង បណ្ដាលឲ្យរងរបួសធ្ងន់ ត្រូវបានរថយន្តសាមុយដឹកយកទៅមន្ទីរពេទ្យសង្គ្រោះភ្លាមៗ ។ រីឯបុរសជាជនជាតិបរទសដែលជិះម៉ូូតូមកបុកនោះរងរបួសស្រាល ។

ក្រោយពេលកើតហេតុសមត្ថកិច្ចមូលដ្ឋាន និងជំនាញបានចុះដល់កន្លែងកើតហេតុនិងធ្វើការវាស់វែង រួចដឹកយកម៉ូតូទាំងពីរគ្រឿងនោះទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរងចាំដោះស្រាលតាមផ្លូវច្បាប់ ៕

ដោយ៖ ស រស្មី