ភ្នំពេញ៖ រថយន្តបាឡែនមួយគ្រឿងបានការខូចខាតស្ទើរទាំងស្រុង ដោយសារតែត្រូវដើមដូងងាប់មួយដើមនៅក្នុងរបងបរិវេណវត្តកោះ បានរលំសង្កត់ពីលើ កាលពីវេលាម៉ោង១០និង៣០នាទីព្រឹកថ្ងៃទី៣០ ខែវិច្ឆិកា ឆ្នាំ២០១៥នៅចំណុចផ្លូវលេខ១៧៨ជាប់របងវត្តកោះចំហៀងខាងត្បូងក្នុងសង្កាត់បឹងរាំង ខណ្ឌដូនពេញ តែមិនបណ្ដាលឲ្យមានមនុស្សរងរបួសនោះទេ ។
ប្រភពបានឲ្យដឹងថា រថយន្តដែលរងការខូចខាតនោះ ម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ2X-1923ជារបស់ប្រជាពលរដ្ឋមិន(ទាន់ស្គាល់ឈ្មោះ) ដែលរស់នៅម្តុំកន្លែងកើតហេតុនោះ ត្រូវរងការខូចខាតទាំងស្រុងត្រង់ដំបូលខាងលើ ។
ប្រភពដដែលបានឲ្យដឹងទៀតថា នៅមុនកើតហេតុ គេឃើញរថយន្តបាឡែនមួយគ្រឿងនោះជិះមកឈប់ចត នៅចិញ្ចើមផ្លូវលេខ១៧៨ក្បាល ទៅទិសខាងលិច។ មួយសន្ទុះក្រោយមក ស្រាប់តែដើមដូងមួយដើមដែលងាប់ផុយឫសជាយូរមកហើយនៅក្នុងរបងបរិវេណវត្តកោះ បានរលំឆ្លងដួលរំលងរបងវត្ត ចេញមកក្រៅក៏សង្កត់លើរថយន្តកាមរីបាឡែនមួយគ្រឿងនោះ បណ្តាលឲ្យខូចខាតដំបូលលើទាំងស្រុង តែមិនបង្កគ្រោះថ្នាក់ដល់មនុស្សនោះទេ។
បន្ទាប់ពីកើតហេតុអាជ្ញាធរមូលដ្ឋាន បានចុះទៅដល់កន្លែងកើតហេតុ នាំគ្នាអារកាត់ដើមដូងនោះចេញដើម្បីជួយសម្រួលដល់ម្ចាស់ឡានឆាប់បានយកទៅជួសជុលដោយខ្លួនឯងវិញ ៕
ដោយ៖ វិបុល
